2013年9月14日

惡頂!

網上圖片
九月十三日,星期五。果日係真真實實嘅黑色星期五!因為,當日要食一餐完完全全由背脊骨落嘅政治飯。

同枱當中有個低頭男加埋兩個港媽,個低頭男坐正喺個上菜位度,一坐底就話Q之你,只顧住玩佢嘅 Whatsapp 同埋 Line,因為哥仔個三叔電話嘅畫面實在太過大,個個人都見到晒佢 send Line 用緊果啲核核突突公仔。

條友仔真係當正自己玩緊 Whatsapp 同 Line 係可以大叉晒嘅,下下上菜時放在佢面前啲嘢,自自然然就會有阿四仲手去幫佢接埋、擺好位,大家幫佢斟茶遞水就更加係老奉添架啦,不特止,佢睬吓人都有味添過喎!

點菜係港媽們嘅嚐好,一點就點足九萬幾樣嘢(我知道,最後食到成枱剩的話,佢地一定唔會傷身食多兩件,而係會迫啲男性動物監粗食晒佢),呢個時候個低頭男就即刻起頭,開聲反抗話唔好!兩個港媽即時眼例例,好一副唔怕折墜嘅咀臉。

港媽 A 開始講佢點幫個女搵 play-group 啲嘢,又咁、又咁、又咁咁咁…..

我冇出聲只係聽,心中卻對佢講:妳有病牙?妳個女連牙都未出,坐都未穩喎?!

港媽 B 就教佢一定要開始準備定點報聖乜乜聖物物學校,又話可以點駛橫手點拉關係…..

我又心諗,聖乜乜聖物物妳識得邊個呀?係,香港啲教會係唔爭氣,但冇妳講到去到咁腐敗吓嘛?我差啲想話佢知,知唔知好多教會學校係唔會賣賬架?知唔知連同宗牧師嘅仔女都冇面俾架?

港媽 B 忽然問我個仔讀咩學校?當年點樣搵學校?

我答佢我個仔只係讀緊屋邨學校,當年靠政府派位架咋。

結果,我又收到兩雙睇人唔起嘅眼神。

16 則留言:

  1. 哈哈,我嗰班舊同事(男人)連去pub飲嘢都係講playgroup同幼稚園架,港媽講呢啲嘢真係好正常囉!

    回覆刪除
  2. 忍吓喇 。。。。。
    大人嘅 Play group
    喺咁嫁嘞!

    回覆刪除
    回覆
    1. the inner space:

      哈哈,我當然忍啦,仲可以點?

      刪除
    2. 冇理由撩鼻屎啫 。。。。。。不用降 class 相就!

      刪除
  3. 回覆
    1. 卡臣:

      食唔晒有男人包底嘛,又唔係由港媽哽!

      刪除
  4. 同佢地食飯真係悶爆呢.

    回覆刪除
  5. 唔算政治飯, 但你好嘢, 有碗唔會話碟. ^^

    回覆刪除
    回覆
    1. DeepC:

      哈,我無意穿穿她們那些不設實際的期望吧了。

      刪除