冧 Auditee 祕技?

好多時都聽到有人會問一個問題，就係 Auditor 應該點樣先能夠跟 Auditee 好好相處呢？點樣先至令到啲 Auditee 對自己冇咁惡死呢？點樣先至唔駛吓吓俾人串串貢咁呢？我諗，問得呢條問題嘅 Auditor，一定係曾經接觸過一啲唔係幾好相與嘅 Auditee，心靈曾經受過不少創傷先至會咁樣問，否則，問嘅人就一定係人見人愛，再唔係就係本性好戇居，有心去找死嘅！

查實，除非個 Auditor 係全智賢咁嘅樣又或者係周秀娜咁嘅身，否則，個 Auditee 冇乜理由無啦啦對你鬼死咁好個播？！坦白講，做得 Auditor，出得嚟行，老早就應該食得咸魚抵得渴，預咗野野拆得掂，頂得順，先至會入呢行架啦！

從經驗上觀察所得，Auditee 對 Auditor 唔好，大概不外乎源於三種心理：

1) 佢睇你唔起！！如果俾人起晒底，發覺個 Auditor 實在係「冇料到」，咁人哋仲駛俾面你？仲駛有運行？

2) 佢心靈深處其實好鬼死怕你，因此歇斯底里地，一見到 Auditor 就全身起晒刺，以進為退，以攻為守啫；

3) 以上兩者皆是。

如果中正第一點，咁就抵死喇！即使走去揾埋啲乜鬼冧 Auditee 祕技，都晒鬼氣啦！

如果係中第二點，個 Auditor 應該喺心底裡面好憐憫個 Auditee 先至係，或許個 Auditor 對 Auditee 只送上一個情深款款嘅同情眼神，可能就足以將對方溶化喇。

至於第三點，可能係最常出現嘅情況，執生啦！

人頭落地

對於寫審計報告的人來說，一個可能最不想見到，但往往又有機會發生的後果，是當審計報告出了街之後，隨後見到有人要因此而「人頭落地」。

記得以前所跟的師傅，好著意要我們好好去學好寫審計報告。在初出茅廬時，師兄們曾提點過，不要為那些對自己百般刁難的 Auditee 而感不快，因為，筆桿始終都是在我們那裡。自己從前特別對一些辛辣的筆法感興趣，不過隨著在這行的日子多了一點點，耳聞眼見死人的事件多了（不管是否與自己有關），以致現在落筆都希望儘量做到恰到好處，以免又見血光。

最近出了一份審計報告之後，不久便傳來有關的會計師被 Director 開刀的消息，雖然說，管理層選擇用如何的方法去跟進那些審計發現，是自己管不了的事，而事件是借刀殺人又好，是死有餘辜也好，也不關自己的事。然而，心情多少總有點被影響了。

話歸回頭，世事又豈能儘如人意？但求無愧於心算了！

香港政府忠告市民.....

香港政府咁苦心去忠告市民，簡直無嘢好講！！

（註：鳴謝鹿米館又再介紹以上嘅猛片）

驚蟄之後

三月六日嗰日係驚蟄，按節氣，一班仲係喺冬眠狀態嘅牛鬼蛇神理應醒吓喇，係時候出返嚟走動吓喇。點知，說時遲，那時快，驚蟄嘅第二日又即刻凍番，今日仲係好鬼死凍嗰隻添。咁樣，按規矩要振作番吓嘅街坊朋友，又有大條道理龜縮番，set 番自己去 sleeping mode 喇！

今早，天寒地凍，我決定搭巴士返工，因為暖笠笠，搖吓搖吓，確係會好瞓一啲。

我明白，好多人都同我一樣，其實一直仲係冬眠緊。大家身體嘅機能係會差啲架喇，但係，就算點差都好，點都唔做得喺一部全密封嘅空調巴士入面放臭屁嘅！今早無聲無色地遇到呢啲突襲，又唔知係邊個做，架車又開唔到窗，毒氣又唔散，好想死！

好辛苦先捱到落車，隨即呼吸番幾口清新啲啲咁多嘅空氣。去到公司樓下，誰不知入咗部lift之後，門一關上，又再嚟過不明氣體恐怖襲擊，阿媽救命！

講故仔

有次跟Andy老師打邊爐，在大家飲多咗兩杯之後，作故仔吹水之餘又講起女人.....

話說有條友叫摩西，佢係埃及嘅王子嚟（查實佢暗瓦底係希伯來血統，唔係埃及人，至於點解咁無厘頭，講故請唔好駁故）。

有日摩西冇乜嘢搞，諗住出去浦吓，點知撞正兩條友打交，一個係埃及人，另一個係希伯來人。摩西一向都想當希伯來人係自己友，所以就幫拖打瓜咗個埃及仔喇。

第二日，啲希伯來人又開拖，不過今次係自己人打自己人。摩西好好心咁諗住去排解吓，點知俾希伯來人寸番轉頭不特止，仲話要爆佢大鑊添！

法老王好快就知道咗呢兩件事，發悔氣話要殺咗摩西。不過，話到底摩西都係王子嚟，佢殺幾多個二打六都根本唔算得係乜嘢大件事，no big deal！法老嬲，實際係嬲佢性格反叛唔生性，嬲佢做事手指拗出唔拗入啫。其實摩西只要去氹番吓法老，應該就冇咩事。

但摩西選擇離家出走，因為佢有個解唔開嘅心結.....

摩西離家出走去到一個外地嘅地方叫做米甸，又遇到米甸人俾人蝦，摩西今次又出手相助，點知，米甸人就感激到要將個女嫁俾佢。從此，摩西甘於安身自己喺外人嘅地方。

之後，上帝呼召摩西去帶領希伯來人出埃及，摩西隨即耍手兼擰頭，事關摩西有個解唔開嘅心結.....

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
當男人在外面面對街外嘅女姓，好多時都可以做到長袖善舞，手到拿來。只因行走江湖一些時日，總能夠參透到啲待人處世嘅祕技。嗰啲唔會上心嘅外人，又總係好懂得對自己好。

但，偏偏面對自己視為最親密最自已人嘅女人，卻總覺摸不著頭腦，永遠估佢唔到。

因為，自己女人看自己這個男人，不在乎 "What you are doing"，而卻在乎so call: "What you are being." 然而，呢點真係好攞命。

騰雲駕霧

這幾天都是反應遲鈍九唔搭八懞口懞面，皆因喉嚨發炎之後又口腔發炎，活該！

在這霧春三月天裡，總常有騰雲駕霧飄渺雲海間之覺，是自己因吸風飲露而乘雲御龍於仙境中？抑或是內臟濕熱加啪丸過度而弗吓弗吓？天知道？！

此刻目光仍然呆滯兼四肢乏力腦脹脹，不過又幾過癮，難得糊塗嘛！

元宵有感

君今天晚上要加班，我一個人，去了教會的元宵晚會，幫手擔擔抬抬。

晚會在教會的天台舉行，在節目開始後我就沒甚麼好做的了，我獨自躺在一角，欣賞天上一輪晈潔明月。

偶然，傳來了一闕歌聲，令我忽然好想念今天晚上不在身邊的她，好多以前經過了的回片段回憶，一下子都湧上了心頭。

曾經踏遍路途千萬里，途中跌倒過攀不起； 
無望的心感困累，全然交瘁，無助身軀早已沒有力氣。

徬徨中遇見熱誠的膀臂，人潮中碰倒你多驚喜， 

前路即使千尺浪，得你在身旁，縱使呼呼風雨仍覺甚美！ 

能在絕望孤單中偶然遇到你，是我根本不配受的福氣。 

來日禍困迎面，滿途挑戰，能贈我勇氣，完全是你。

（年月縱過去，未忘掉你）

Don't ask stupid question

有位小妹妹同事打咗個 MSN 俾我：

同事：我朋友(註：?)想考 CIA（註：即係Certified Internal Auditor）。
我：好事呀！
同事：係唔係要考 4 張 paper 架？去邊度買書同 past paper 呀？商務有冇？
我：商務？妳估妳仲係考緊會考咩？
同事：咁邊度呀？個試係點架？

我心諗，個試我九世前考個播，家陣變成點我都想知！

我：妳不如上網 search 吓啦。
同事：咁去邊先有資料呀？

其實我好有衝動想打：Google
但後尾我都係打咗：http://www.theiia.org/

財爺派 floppy

【明報專訊】每年財爺公布預算案時，都會就議員早前交嘅提問作出書面回應，聽落好似好貼心，但衰在今年嘅回應就儲存喺隻磁碟（floppy）度，喺而家呢個數碼年代，要搵部電腦可以讀到磁碟，真係唔容易，結果就玩死唔少議員！

＊＊＊＊＊＊＊＊＊＊＊＊＊＊＊＊

一隻 floppy 嘅像徵意義遠勝千言萬語！！

呢隻 floppy～～

代表好明白到學生喺電腦學習上嘅需要（例如 floppy）；

代表好明白香港市民，特別係年輕人嘅所想所求（例如 floppy）；

代表香港好需要高科技（例如 floppy）；

代表財爺好明白經濟（例如 Demand & Supply)；

代表財爺已經好清楚香港、以致世界嘅發展方向（例如用 floppy）；

代表財爺好懂得應付日新月異嘅經濟危機（派 floppy & 派糖)；

代表已經積極回應各階層嘅訴求（喺晒隻 floppy 度，咪話睇唔到喎）。

有情飲水飽？

早前鹿米館介紹咗以上嘅廣告俾我睇，之後，我同一班麻甩佬打邊爐，講開女人時又講開呢個廣告。

唔好理個廣告點解咁鬼死長同埋點樣無厘頭，從內容嚟睇佢的確有幾分討論價值，尤其當一班佬大家飲多咗兩杯之後，就更加多嘢講喇！

忽然有啲好奇，唔知啲妹妹仔睇完呢個廣告會覺得點呢？


當年今日：
四旬期