2012年4月27日

忍忍忍.....

網上圖片
多嘢做到嘔,其實我唔係好 mind 架,我 mind 嘅係做嘢做到谷X氣啫!

最近我老頂上面開多咗個新位,即係我老頂無啦啦多咗個老頂。呢位阿毛原來真係一位阿毛嚟嘅,佢冇 common sense 又成日驚驚青青,冇 technical 但又專蝦細路。見到佢,我吓吓火都嚟,但又要 hold 住、忍忍忍!

部門同事個個俾佢玩到冤氣沖天,有位妹妹仔日日著住好多好多好多衫(我私底下請教過教會入面嘅心理學家,妹妹仔好有可能已經黐咗線),巧京京!

我帶住另一位妹妹仔落 field 做嘢,諗住避吓世啦,點知.....點知妹妹仔個口真係好臭好臭呀,5呎以外都聞到呀,小姐,妳呢排係唔係心火盛呀?我理智同我講,呢件事係一定千祈絕對唔可以話返俾佢知架,要忍忍忍忍忍.....

啲 Auditee 都唔知係唔係有心裝我嘅,昨日無啦啦做台大龍鳳戲想表演俾我睇(佢哋可能真係唔知 Auditor 係天生手臭嘅),我一去到,台戲竟然即刻斷正,你哋係唔係有心攞嚟衰呀?坦白講,我真係好唔想又要跟你哋台蘇州屎架!

呢兩日,間中都會撞到有條唔戴 Bar,對波盪吓盪吓,兩粒的突晒嘅女在我面前經過。我嘅職業反應即刻響起咗戒備訊號:小心中伏!!唉,為保安全計,依家我出出入入都要搵埋個臭口妹傍住,之但係.....佢個口真係好臭喎。

日子點都要過,我唯有忍忍忍忍忍.....

2012年4月26日

我的 Diver's Watch

昨晚,終於忍不住買了這隻古董版的 Diver’s Watch 了。

某日,不經意地在一間鐘錶小店內看到了此款手錶,一時間,「那些年」的青蔥記憶忽被喚了回來,一個一個已逝的輕狂往事再在腦際中湧現,使人感受良多。

自己的少年時代,大概都是在泳池、海灘等等有水的地方渡過去了。當年,大多數時候,我都是坦坦蕩蕩地過日子:身上除了只穿上一條 Speedo 競賽型泳褲外,另外就只得一隻 Casio 的  Diver’s Watch 罷了,做人總是輕輕鬆鬆、瀟瀟灑灑,生活檢樸以外,就是檢樸!

以前喜愛戴 Diver’s Watch,其中一個原因是嚮往它予人的那份粗獷豪邁感覺,尤其當年要在海灘當拯溺更時,就會更似救生員,更易俾女溝。

曾經刻意地好想再找回以前戴過的那款 Diver’s Watch,後來才發現 Casio 已經把它停產了,因此,現在唯有選了這款差不多的精工錶來頂替,聊作安慰。

2012年4月8日

元朗韓食

前兩日,我同晞晞、老婆、另外帶埋個沙巴妹,專登山長水遠咁走咗入去元朗,目的係去試試一間韓國餐廳。

據講,間餐廳係由一家韓國人大大細細落手落腳打理,係間切切實實嘅家庭式小店,好細、好casual,老闆娘同個女做樓面,好好傾好友善,好有 family feel

老實講,除咗石頭飯、人蔘雞、韓式燒烤等等以外,韓國食物仲有啲咩我真係乜都唔識。老闆娘介紹咗好多好嘢俾我哋試,話通通都哋係用番地道口味做嘅菜,一試,果然真係同佢個女一樣,好正!

2012年4月3日

沽空「梁X英」

網上圖片
最近,有隻 IPO 叫做「梁X英」,雖然同佢做 Due Diligence  嘅時候就已經發現呢隻嘢可能有啲問題,但最終結果都係無損佢可以順利過關,能夠在七月一號正式上市嘅結局。喺上市當日,全香港市民都將會被過兩手,人人有份永不落空,冇得唔要!

最初,一般散戶對呢隻 IPO 嘅印象都好唔錯,不過隨後一眾傳媒、講古佬等等,日日喺度拼命係咁向佢唱淡,猛咁話隻嘢其實背後完全受造市者人為所操控,唔信得過。結果,終於令到市場普遍預期,呢隻嘢雖然上到市,但都將會對後市大大不利,尤其是對地產版塊負面嘅影響為甚。結果,大家未等到隻嘢正式登場,就已經有庄家搏晒老命咁叫大家做定沽空準備!

所謂千祈唔好跟個市場對著幹!我有位同事就係因為相信呢個道理,竟然真係好心狠手辣地,完全瞓晒身咁去等住食盡沽空「梁X英」呢個浪。佢仲話有 friend 同佢講過,聽聞阿李巨富會好快質低個樓市,去對沖隻 IPO 所帶來嘅衝擊咁喎。因此,呢位同事最近立刻賣咗層樓,一於坐定定等個樓市冧,實行切切實實地,曲線地去抽沽空「梁X英」嘅水!

老實講,投機嘅嘢點話得埋呢?我真係想溫馨地提示我同事一句:現在似乎幾幫大鱷正在互相開緊片,個市最後被挾高又好挾低又好,我地呢啲散戶結果都係被人漁肉居多,都係冇乜著數,因此不可不防,小心!小心!



(本文並非任何投資誘勸或建議)