2009年9月11日

我的中學回憶

自從九月開始以後,每日返工嘅時候,無論喺街、搭車,總會遇見好多一身水手裝呀、古典旗袍呀、雪白恤衫套裝呀等等清純打扮嘅學生,見到佢地,就令我不期然咁勾起已經埋藏咗好耐、好耐嘅中學生回憶。

我以前讀嘅中學係一間官校,係唔多堅嗰種學校。啲老師好鍾意話自己因為係公務員,所以好hea,所以教書係求求其其,是是但但架喇,但人工就幾好,吹咩?唔知係唔係當年受咗老師嘅影響,到我搵工嘅時間,我係完全冇諗過做公務員或者去教書。

我哋啲同學都有幫老師改花名架,例如「大煲湯」、「微波爐」等等。現在諗番起,都仲覺得好精警好好笑!跟現時一般學校一樣,當年都有同學賣吓丸仔,入吓黑社會,不過,嗰啲壞仔同學實情都係好有情義嘅,佢哋真係冇搞過自己同學,淨係喺學校出面玩嘢啫。

當年我阿媽對我係探用「自由發展」嘅理念(即係睬我都傻)。因此,我係從來未試過俾人私人補習過嘅。相反,喺我入U前,我就開始幫初中生補習喇。記得我補過一個中二生,正一舊飯咁,佢有個家姐其實同我差唔多年紀(唔知點解佢唔去教佢細佬),淨係鍾意喺我補習時陰陰咀笑,我俾佢玩死!

現在,偶然間腦海都有閃過讀中學時嘅點點滴滴,偶然間都想問候一句:「以前間中學俾人殺咗校未呢?」

12 則留言:

  1. 其實佢一直等緊你cut佢呀,哈哈。

    不過廿年後既佢係......

    依家家姐已經成為兩個細路既阿媽,腰圍三十八,每日鬧仔,成日問緊邊間中學好,定係送佢地去外國好而煩惱。搞到用晒成套SKII都唔夠,最後仍然搵變靚d同肥媽睇齊........

    等你夢想幻滅先,哈哈哈哈。

    回覆刪除
  2. 我係香港讀過幾年中學...d老師好鬼hea成日放學去打雀局!

    回覆刪除
  3. 冇做公務員 ? E+一定好後悔 !!!KAKAKA

    回覆刪除
  4. 咁你有無去研究點解個家姐會對著你陰陰咀笑?

    回覆刪除
  5. 鹿米館:

    你咁樣破碎我嘅幻夢?!嗚嗚嗚...

    回覆刪除
  6. 聶秀康:

    乜妳以前啲老師咁鬼坦白,連去打雀局都唔隱瞞?!真係可愛嘅啫:)

    回覆刪除
  7. 篤篤篤撐:

    係呀,直頭後悔到爆!!

    回覆刪除
  8. uncleray:

    佢家姐會唔會係笑我教得差呢?

    回覆刪除
  9. 人地家姐對著你陰陰咀笑?9成9睇中咗你啦.

    回覆刪除
  10. Bittermelon:

    真係?哎呀,錯過咗潻!

    回覆刪除
  11. 我讀嗰間津校又唔錯喎,
    大部份都有心機教,
    有啲仲係咪谷學生添,
    有時要看個別學校!

    回覆刪除
  12. 新鮮人:

    我都信唔係個個教書嘅都係冇熱誠嘅:)

    回覆刪除