2011年9月22日

我以後唔再睇《爽報》

網上圖片
《爽報》出街唔夠幾日,已經到處被人喊打,好些學校明言不准學生閱讀,Facebook 亦已經出現咗譴責群組,似乎呢份鹹濕報紙,都有啲出師不利之勢。

我覺得肥佬黎要搞到行鹹報呢一步棋,好有可能佢已經走投無路諗到冇得好諗,情形就好似香港舊式戲院沒落,間間執笠前都變晒做鹹片戲院咁,希望在滿足鹹濕佬呢個小眾但穩定嘅市場時,盡量爭取呼吸埋最後一啖氣。

但我覺《爽報》前途比起鹹片戲院更加難搞。鹹濕佬好快入咗戲院就唔係咁易俾人認出佢鹹濕嘅本相,但《爽報》喺鹹濕佬番工嘅時間派俾佢,佢唔通在街邊睇?在巴士睇?在港鐵睇?在公司睇?咁即係在女途人、女乘客、女同事面前承認自己嘅鹹濕身份?用份《信報》包住佢留番屋企睇都係辦法,但鹹濕佬屋企實有大把好嘢啦,番到家仲駛睇呢啲小兒科?!

我唔係鹹濕佬,所以我以後都唔會再攞《爽報》嚟睇咁鬼麻煩!

***************
後記:
壹傳媒旗下免費報紙《爽報》充斥色情內容,惹起教育界、社福界及家長團體群表不滿,淫褻物品審裁處更將《爽報》「眼兒媚」專欄的首兩期網上聲音版和第二期的文字版,暫定評級為第二類物品(不雅物品),即不得向十八歲以下人士發布或出售。(25/9/2011東方日報)

當年今日:
中秋速寫

40 則留言:

  1. 我都唔明點解爽報會攪到咁多人唔爽?!

    我只係覺得, 爽報冇我預期中咁 "爆".

    回覆刪除
  2. 佢最令人唔爽嘅,係佢過份 cheap,呢樣野,𡨴俾人知,莫俾人見,大忌!

    回覆刪除
  3. 大鑊!!!...... 等我仲話『冇我預期中咁 "爆"』tim!......

    回覆刪除
  4. 梁巔巔:

    哈哈,你唔小心暴露咗身份喇^^

    回覆刪除
  5. ?

    .....I see! 你誤會喇. 我唔係壹傳媒嘅人.

    "等我仲話『冇我預期中咁 "爆"』tim!......" <--- I just meant 我 cheapest! ^~

    回覆刪除
  6. 梁巔巔:

    我仲以為你嫌佢唔夠咸濕添^^

    回覆刪除
  7. 爽報多了些少情色內容, 其實沒甚麼大不了, 但好多香港人都仲係內裡open, 外表斯文, 對關乎性方面的事物從小受到壓抑, 性教育近乎空白, 完全唔敢公開探討, 仲要動不動罵人係鹹濕佬, 呢種違反人性的壓抑, 損害心理健康, 絕對要不得. 爽報的出現, 希望可以改善社會風氣, 讓更多人可以掙脫無謂的束縛, 心理上趨向健康正常, 與世界接軌.

    回覆刪除
  8. 匿名:

    對!色情內容總有人鍾意,所以呢個市場小眾但穩定囉!

    回覆刪除
  9. Ebenezer 兄: 冇錯! 嫌唔夠! ^~

    匿名: 嘩! 肥佬黎應該請我哋!

    嗱, 唔好唔同意我, 如果唔係, 我好瘀皮~ XDDDDD

    回覆刪除
  10. 哇哇哇,樓上嗰位,你去攞個吹氣公仔週街行喇,或者將兩個用過嘅避孕套吊住當耳環喇!

    審塩花就係性教育?未有爽報之前就係性壓抑?睇十九才子嘅T back 小說就係與世界接軌?你講乜0 野?

    回覆刪除
  11. 以便兄,

    係情色, 唔係色情, 爽報的情色內容沒有淫褻成份, 十分健康.

    展示或描述人體美不是灑鹽花, 藝術雕刻甚至會展示性器官, 無知者或會認為是色情, 其實這些人亟需基本的性教育. 爽報有陶才子的情色短篇小說, 性閉塞者不懂欣賞, 或會斥之為淫褻, 但正常人會欣賞其文筆及寫作技巧, 閱出趣味.

    回覆刪除
  12. 梁巔巔:

    我點敢叫你瘀皮呀^^

    回覆刪除
  13. 兩位匿名兄:

    自已喜歡不喜歡情色或者色情也好,喜好嘅野好主觀,別人好難去干涉。

    但同樣地,亦干涉唔到別人點睇自己嘅嗜好,正如我阻止唔到別人睇我唔起一樣。

    回覆刪除
  14. 以便兄,

    這個不單純是個人嗜好或喜歡與否的問題, 藝術與色情的分野, 有主觀的成份, 亦有頗為客觀的準則. 如果不戴有色眼鏡看爽報, 其內容絕無色情成份, 對其內容不喜歡的讀者, 可能會覺得沈悶, 喜歡的, 則會領略到其趣味所在.

    回覆刪除
  15. 匿名兄:

    小弟一直寫 blog,都知道有三樣話題,是可以拗得沒完沒了的,就是:政治、宗教和藝術。

    我絕對尊重你喜歡爽報及你覺得它有藝術價值。然而小弟相反不喜爽報和覺得它不是藝術,我想,大家就各自表述吧。

    回覆刪除
  16. 佢原先係想人爽死,但係街上太唔方便了

    回覆刪除
  17. hkeric:

    太多人搶搞到你拎唔到?

    回覆刪除
  18. 熱血宅男:

    個個都唔同佢爽,呢鋪肥佬黎都唔慌唔爽喇。

    回覆刪除
  19. 以便兄,

    我也絕對尊重你不喜歡爽報及你覺得它不是藝術. 不過, 藝術就是藝術, 即使閣下不喜歡, 它依然是藝術, 祇是閣下不欣賞或不懂得欣賞而已. 正如許多人都不欣賞嚴肅文學、戲曲或古典音樂, 但無損其為藝術. 爽報陶才子的文章是文學藝術, 儘管不是人人欣賞.

    回覆刪除
  20. 嘿嘿,唔係色情係藝術,唔係強姦係慰安,唔係非禮係有禮,唔係性侵係專驅鬼 ...

    尊貴的法官同陪審員,係你地戴咗有色眼鏡去判案咋,你地判乜0 野案呀!

    呵呵,任你噏咯,你話樹!

    回覆刪除
  21. 兩位匿名兄:

    哈哈,我都話可以拗到沒完沒了啦:)

    回覆刪除
  22. 我無攞過爽報,
    唔知佢有幾鹹,
    不過唔洗封膠袋嘅,
    鹹唔得去邊啦,
    依家份份報紙都有風月版架拉,
    邊個理你睇爽報吖?
    況且佢之所謂鹹照甜故都好似無乜特別,
    同東方啲咪差不多,
    同以前新夜報無得比,
    嗰時入便啲鹹故真係鹹得有道理,
    睇到少年時期的我"眼火爆"呀,
    陶生啲所謂"鹹故"真係得啖笑,
    直情老少咸宜呀!
    所以爽報根本唔可以列入鹹報,
    佢只係一份普通嘅免費廣告宣傳紙喳!

    回覆刪除
  23. 更正:
    嗰時嗰份鹹報應該叫"今夜報"先啱!
    sorry!

    回覆刪除
  24. 我就唔夠胆喺地鉄一個唔識嘅女生旁边睇+九才子那篇色乜咯!

    係咪色情,哩個就係 tester 喇!

    回覆刪除
  25. 新鮮兄:

    嘩!今夜報你都識,証明你真係有識之士!

    果份野好似在小弟仲食緊奶時在屋企發現過嘅失傳古籍,果時我已經發現,原來古代嘅人已經相當咸濕^^

    回覆刪除
  26. laulong:

    校長,如果你在地鐵一個唔識嘅女生旁邊睇,你d學生一定好高興,因為又有野唱。

    回覆刪除
  27. haha, 你話用收音機播埋+九才子口述出黎,唔俾女生摑都俾佢勁閙變態喇!

    回覆刪除
  28. 細過果時有次俾我發現我阿公係今夜報嘅讀者

    回覆刪除
  29. 大鄉俚
    我仍未睇過
    唔知鹹成點?

    回覆刪除
  30. 在很久以前, 報章頭版刊登女性的露乳照片, 屬於平常事, 沒有人覺得教壞人, 沒有人要求禁制. 今日, 香港的所謂"衛道之士"彷彿是從石頭爆出來的, 沒有親身體驗, 也沒有讀過歷史, 看到老少咸宜的才子作品就大呼小叫, 將藝術貶為色情, 將性感照視作淫照, 指鹿為馬, 歪曲事實, 這些人不但心理狀態非常不健康, 並且喪失辨斷事實的基本能力.

    回覆刪除
  31. 睇報紙都係想得知天下事,與及一些人的見解.如果要睇咸濕嘢,不如買本蛇貓狗嚟睇咪仲爽.爽報跟台灣版一樣走咸咸地路線,但正經內容又缺乏,睇完等於無睇,再係咁,咪盞D讀者走夾唔呌?

    回覆刪除
  32. laulong:

    仲要一路聽,一路笑口淫淫,死未?!

    回覆刪除
  33. l.minor:

    拿,又一証明古代嘅人已經相當咸濕喇^^

    回覆刪除
  34. 卡臣:

    今夜報呢份野.....簡直淫賤不能移,哈哈。

    回覆刪除
  35. Bittermelon:

    你提起「蛇貓狗」,又令我想番起細果在學校跟同學仔唱嘅校園民歌:

    龍虎豹好睇,好睇,但係又好鬼貴....

    回覆刪除
  36. 作為女性我吾覺得有什麼問題,有些人又要睇又要鬧,跟住自己又有性需要,望靚女,溝靚妹未一樣咁樣衰,總之這是很平常的事,也慶幸香港傳媒還可百花齊放,看與不看都是過人選擇,無需大驚小怪,又要扮匿名,呢種男人至系cheap!人與畜生的分別是人懂得自我約束。

    回覆刪除
  37. 李小姐及各友好網友:

    估不到小弟這帖文引來如此激烈的討論及反應,實在始料不及。然而我覺得各方好友,具名又好,不具名又好,在此彼此坦誠分享,怎樣看都是好事。

    我覺得,從來有個人立場及真誠的意見者,都值得尊重。而各立場及意見是自己所讚成同意與否,本人希望儘量做到對事不對人,而即使是跟自己相反的意見,我也要設法維護,這是我的立場。

    在此,再次感激大家積極的分享。

    回覆刪除