2013年9月25日

新派茶餐廳

網上圖片
大家有冇幫襯過啲外表裝修到懶有 concept 嘅茶餐廳?我在香港不同地區都分別在呢類新派茶餐廳領過嘢,估唔到今日又中招。

今日要去某舊區,下午難得有啲空閒時間蛇下王,諗住一條冷嘆吓下午茶,見有間光光鮮鮮嘅茶餐廳就走咗入去。

間嘢冇乜人,我估呢區啲人冇乜文化,唔鐘意飲下午茶啫,所以冇乜在意。

我坐低二話不說,「熱檸茶!」

「仲有冇菠蘿包呢?」「有嘅,有嘅。」個侍應姨姨含糊咁答。但其實我睇到牆上餐牌雞乸咁大隻字寫住,有菠蘿油下午茶餐。

「咁要多個菠蘿包添啦唔該!」

個姨姨忽然問我:「菠蘿油跟咩?」我見佢論論盡盡,急瞄去個水吧度,發現個哥仔雞手鴨腳,倒瀉籮蟹咁,心知大鑊,呢班友肯定唔係做茶餐廳出身!

我好清楚再同姨姨講,我係要熱檸茶同埋菠蘿包啫,唔係要菠蘿油!之後姨姨又兩次同水吧講話我要菠蘿油,我又耐心客氣咁同佢講多兩次:我要杯熱檸茶,再要個菠蘿包啫。

我以為個樓面姨姨個腦轉唔到,個水吧哥哥都聽到我實情要啲乜啦,點知,佢俾咗杯餐檸茶我,得兩片檸檬!我心諗,你當我叫菠蘿油餐走牛油,收盡咪得廿幾蚊!?你俾杯正正經經嘅檸茶我,單係杯茶都收到我十幾蚊啦,你點做茶餐廳呀?

埋單時姨姨寫我張單收十蚊,我碌大雙眼問佢,十蚊?真唔真呀?姨姨唯有寫多兩蚊在張單上,收我十二蚊。

10 則留言:

  1. 係喎,屋企附近都開咗幾間呢類茶餐廳,有一次都係食到焗住道氣,個哥哥仔唔知咩係杯芽好立克,佢問另一阿姐,又唔識,呢樣都算,叫過第樣。
    之後一伙計拎碟嘢嚟,論論盡盡,最火滾係佢擺嘢時到了少少汁,佢就咁拎我剛抹完筷子的紙巾嚟抹碟邊,跟手仲要將紙巾就咁留在碟邊上,挨到碟中的食物!忍耐極高的我都忍不住火滾了!

    回覆刪除
  2. 香港人既特色。不過大陸都會咁。
    沙嗲牛肉麵變雪菜肉絲米,叫佢換,換返返黎個碗麵,全部都係蟻既浮屍(個時中學生,當年唔興投訴)。
    呢D餐廳分分鐘做得長過D有心既茶餐廳。
    出黎做野遇到呢D情況,我試過同D夥記嘈,條友好型咁同我講︰「搵食啫,犯法呀。」
    王子華到呢。

    回覆刪除
    回覆
    1. 張子房:

      估唔到講開茶餐廳,各有各經歷!

      話時話,撈茶餐廳係唔係真係好好搵,所以先會咁?

      刪除
  3. 就算有問題都唔敢出聲,
    驚俾人係食物中加料,
    最多以後唔幫襯喳。

    回覆刪除
    回覆
    1. 新鮮人:

      哈哈,細個時聽人講過,如果投訴d野唔好食,會俾人吐口水加料架。

      刪除
  4. 算啦, 如果佢地無咩生意的話, 你這次幫襯都算得上是鼓勵, 當做點善事.

    回覆刪除