2009年7月16日

不可一 不可再

呢排唔知揩過啲乜鬼衰嘢,昨日一早起身發覺出咗好多風疹,好鬼死痕。我即刻走去睇醫生(3866),個醫生二話不說就叫個姑娘幫我打咗支針,然後當然最緊要俾錢先至有葯攞啦。

我本來打算睇完醫生就番工架喇,點知發覺自己開始high high 哋。我打番公司睇吓咩環境,誰知啲同事話公司剛啱發現咗兩件H1N1,依家風頭火勢,睇過醫生死返屋企唞吓當係幫忙喎。

我返到屋企,食埋劑葯仲 high!個人飄吓飄吓,個頭fing 吓 fing 吓咁,真係幾鬼死爽!我開始明白點解啲青少年朋友咁喜歡索K揩天喇,原來喺個迷幻世界入面,雖然個頭好fing,但個腦係唔識轉嘅,一下子個人好似好抽離咁,好loosely!忽然間我想起一個從前喺正生出嚟嘅朋友,我曾經問佢當初點解要濫葯,佢反問番我:究竟毒品可怕,抑或空虛可怕?我而家識答佢喇:梗係毒品可怕啦!

昨日胡胡渾渾咁high 咗一日,今早望住包葯,我已經唔敢再掂佢喇。我同自己講,雖然同佢一齊嘅呢段感覺真係好美妙,但係,我畢竟係正經人家嚟家嘛;因此,不可一,不可再!

10 則留言:

  1. 不可一,不可再. 可以三!!

    回覆刪除
  2. "究竟毒品可怕,抑或空虛可怕?", 呢句說話好熟口面喎,呀!我記得啦,曾經有套港產片叫"門徒",由吳彥袓做主角,劉德華做配角,吳彥袓係套片入面講過呢番說話。

    回覆刪除
  3. 好怕食西藥,尤其要上班真係好high架!
    風疹我通常食百利通(成藥)好快好番,但個人都會wor wor 地.

    回覆刪除
  4. 敏感止痕藥通常都係食完好 high....

    飲多啲水休息嗄喇!

    >>"究竟毒品可怕,抑或空虛可怕?"

    空虛唔可怕呀...間唔時空虛嗄都幾好咖! 不過依家啲後生仔空虛既定義太大喇!

    回覆刪除
  5. 浪人:

    Em....原來你係損友,哈哈。


    Bittermelon:

    係呀,呢句嘢出自「門徒」架。呢套片對毒品問題好有認識,好正!

    果句嘢真係一個喺正生畢業出嚟嘅女仔親自同我講嘅,好能代表佢地嘅心聲。


    聶秀康:

    我今日已經冇食啲葯,不過仲high到今朝。


    the8:

    謝謝關心!

    我都想明白吓佢地嘅空虛同我嘅空虛有咩唔同,我都想做番後生仔。

    回覆刪除
  6. 睇中醫可能好小小?
    沖個熱水涼,多多休息,飲多D水...

    回覆刪除
  7. Denzel:

    係呀,我都諗住食中葯。BTW, 謝謝關心:)

    回覆刪除
  8. 中藥, 好得徹底, 不過慢.

    病, 也要有閒, 才可以調理得好一點.

    回覆刪除
  9. 聶秀康:

    我會再try龜苓膏tim!


    richma:

    其實我唔算得乜嘢大病,不過呢個可能係個signal,我要調理一下身子。

    回覆刪除