2009年8月5日

放榜隨想曲

今日又係中學會考放榜日,例牌動作係傳媒會先去訪問吓啲十A九A嘅所謂「狀元」,俾佢地攞攞彩,訓勉吓d後輩;然後即時又影下啲咸苦咸忽嘅失敗者對比一下,跟住就會睇吓啲同學點樣徬徨點樣四處撲學校。到夜晚又例牌地搵人教大家點樣安慰考試失敗者嘅心情。呢個程序年年如是,往返無間。

坦白講,我雖然好替嗰啲十A九A生高興,但講到佢地係「狀元」,我覺得真係有啲過份抬擧,始終,佢地叻極都仲係只得中五程度,雖然佢地係中段排位賽贏到出嚟,但學習路途其實仲係前路漫漫,咁早就封個冇乜實用價值嘅「虛朵」俾佢地,萬一搞到同學變咗驕傲晒就好唔好喇。

又講吓嗰啲考試失敗者,失敗原因縱然個個唔同,但始終都係老套嗰句,中學會考衰咗係唔駛死嘅!眼看現今好多相識嘅英雄豪傑,佢地當年會考都試過甩腳,而家,佢地咪又一條條好漢咁,一身靚朵咁出嚟行!!不過又話歸轉頭,專業資格算不得甚麼,PhD也算不得甚麼,做人個格好同埋要有品先至係最重要。

會考放榜日是苦是甜,畢竟都係每一個人喺人生經歷裡面,好獨特好獨特嘅回憶,好值得好好去珍惜,好好去保守。記得自己當年喺會考放榜日,跟兩位女同學一起去撲學校,雖然當日好熱好辛苦,但係感受到同學間互相扶持互相鼓勵,當日心中嗰份溫暖,嗰份甘甜,今日仲係好回味。

7 則留言:

  1. "...專業資格算不得甚麼,PhD也算不得甚麼,做人個格好同埋要有品先至係最重要。"
    咁又係,個"格"同個"品"先最難學...所以先最值錢**!

    回覆刪除
  2. Denzel Leung:

    呢兩樣,小弟仍在努力學習中。

    回覆刪除
  3. 我記得當時認為會考成績就是一切,之後回看,其實只是人生的一小小部份,考得好的,起步點可以比別人前一點,考得不好的,雖然起步點後了點,但是人生路始終很漫長,後了點又如何呢?

    回覆刪除
  4. Bittermelon:

    對!正如我形容,中學會考只係中段排位賽而已,後面大把機會追番出嚟。

    回覆刪除
  5. 其實, 大家在中四至預科所讀所考的,除非搞研究, 否則又有幾多是實用的呢? 最重要反而是學動自學和思考的方法.

    相信大家在大學內應該見過不少高分低能吧?

    縱然考到100A, 但一到實戰, 一到生活, 便會把這些高分低能帶回無情現實了.

    回覆刪除
  6. >> 不過又話歸轉頭,專業資格算不得甚麼,PhD也算不得甚麼,做人個格好同埋要有品先至係最重要。

    同意 x 100

    人格,學校及課本係唔會教既!

    回覆刪除
  7. richmapoorma:

    對!學校所學的只不過是用來面對實務時的一點準備,且學校所學的隨時會過時。因此,不管是否仍在學校,保持著一個不斷求學的態度最實際。


    the8:

    雖然學校未必會好好咁教,但呢樣野一定要好俾心機咁去學!

    回覆刪除