2009年6月12日

由停課想起...

昨日,政府突然頒令全港小學兼夾幼稚園要停課十四日,一時間,攪到好多家長話好頭痕,因為佢地唔知點睇實d細路好。

原來,獨留d細過14歲嘅細蚊仔(14歲仲係細蚊仔?)喺屋企係犯法嘅。我好好奇呢條例係唔係新出嘅呢?點解我細個果陣冇人話過我知嘅?

想番起,我同我個妹其實好細個就已經開始俾人單獨留喺屋企架喇,我老媽話番俾我聽,原來喺我兩三歲果陣,有次冇大人喺屋企,我將我當時幾個月大嘅妹當公仔咁玩,差d玩死咗佢喎。

到我大小小三四歲咁上下,我老媽喺垃圾房執咗隻貓仔番泥,話冇大人倍我地兩兄妹嘅時候都有隻貓倍吓喎,點知我地扯下佢d鬚之馬,隻衰貓竟然咬到我地流晒血!

細個住屋邨,家家戶戶嘅小朋友都係俾d大人塔住喺屋企架啦;記得喺夏天嘅時候,家家打開大門,我地d小朋友個個兩手hold住幢鐵閘,努力想伸個頭出去跟對面同隔離屋嘅小朋友傾計,依家諗番起,真係好有監獄風雲feel架!

我阿媽話佢家教好好嘅,佢好嚴咁唔准我地落街玩,所以佢好proud of 我同我個妹冇變做街童。不過除咗落街,其他所有嘢佢話由得我地自由發展喎(即係理得你!),所以到我大d,我就開始通冷巷跑,屋邨四通八達,搞得嘅嘢都搞過。

細個好多時冇大人喺度嘅時候,就要識得自已照顧自已,我最拿手就係餸頭餸尾炒冷飯,依家諗起都覺得自已好勁!

原來依家14歲仲要俾大人看住;回想我14歲果年,己經約女同學去 wild camp 喇。

12 則留言:

  1. 14 歲就約女同學去 wild camp???? 哇乜得你咁早熟呀!

    我小時候未至於要煮飯做家務但 14 歲己經識煮嗄蒸肉片/肉餅同最拿手煲湯!

    第一次煲湯好好笑,等我有時間都寫返編文記念嗄先!

    回覆刪除
  2. the8:

    中三十四、五歲開始同d女仔玩埋d,差唔多啦。

    熱切期待妳果煲湯!


    浪子:

    多謝光臨!

    乜唔係到18歲先至扑扑趣嘅咩?

    回覆刪除
  3. 18歲以下都係扑扑趣, 不過比人告就大鑊。

    回覆刪除
  4. 我媽媽也是為了把我們困在家裡養, 不得在街上玩, 所以沒有像其他孩子一樣變了街童而自豪.

    我記得我在四歲之後, 很多時候, 媽媽上街買菜, 我也是和兩歲的妹妹獨留家中的. 可能是比較膽小, 所以沒出什麼意外.

    不過, 我那一代, 實在是很平常的情況, 感覺上, 不是有太多由此產生的意外. 我想, 其中一個原因是那時候的環境不太複雜, 孩子也比訓練得較機警和自律一點. 加上資訊不發達, 出了意外也不會廣泛報導, 而且, 追究起來, 會認為是孩子不對的多, 父母的責任較細.

    回覆刪除
  5. 14歲果年,己經約女同學去 wild camp 喇。
    >>>>>有冇出事 ?kakakak

    回覆刪除
  6. richma:

    原來,大家嘅童年生都係差唔多!


    篤篤篤撐:

    我從小已經學懂好識照顧自己照顧人,點會有事呢?

    回覆刪除
  7. 14歲我巳返左香港啦...都係自己坐車.放學.四圍去...好似去過長沙露營添!

    回覆刪除
  8. 在the8看到你的留言想起馬來西亞舊同學佢每次house gathering都係什錦炒飯所以給我改花名"炒飯男"!

    回覆刪除
  9. 我有個舊同事好犀利,佢12歲己經入左赤柱痞,一痞就七年。(係寄宿)

    回覆刪除
  10. >>己經約女同學去 wild camp 喇。
    你去拍"月半彎"mtv 呀???

    你講開又係, 你當個妹係公仔, 我家姐又係當我公仔, 將我抱下抱下, 哎呀...頂頭添...哇哇..自此我頭頂有一條好長既疤痕!
    而家有頭髮, 睇唔到呀!

    回覆刪除
  11. 自由行:

    去拍"月半彎"?哈哈,好似係。

    回覆刪除