報價的袐密

Blog 友篤篤篤撐出了帖問關於 iPhone 的 app 可否提供股票即時報價及到價提示。經老兄一問，才猛然想起，似乎香港在這方面，真的大大落後於國內。iPhone 是有 app 可提供到國內市場股票的即時到價提示的(例如“股票精灵”），反而香港這個所謂國際金融中心，在如此細微之處，已經見到落後之勢已現，怎不叫人心痛？

一個很好用的股票管理 iPhone app, Cashmain，最近忽然間停止了港股版，小弟細查原因，竟然給我有如下令人髮指的發現：

Cashmain 已經由 Apple Inc 收到香港交易所督察科(Compliance Section)的 Raymond Lo 通知，Cashmain 的iPhone版本傳播了未經香港交易所授權的市場價格。並要求Cashmain將Cashmain 股票管理及Cashmain Equity Chart從AppStore中移除。經與了解香港交易所督察科的Carmen Ho 聯絡後，我們得知不論即時及延時的香港交易所上市公司之股價資料都為香港交易所的產權，不能傳播給第三者，(原來連延時(不論多久)都屬於香港交易所，此等專利，大家可以考慮買點0388)， 有見及此Cashmain會考慮申請成為香港交易所的授權，但因成本昂貴及條件複雜，Cashmain需要詳細研究，(若有人或公司已有香港交易所授權，以及想與Cashmain合作延續此軟件者，請emailadmin@cashmain.net)，但因此等研究雖時，為免你們久等、Cashmain建議大家向Apple申請退還款項。方法如下......
(Quote 自 Cashmain Discussion Forum)


哈哈，好一個國際金融中心！

iPad 的疑惑

昨日大清早一起身，我老婆忽然好小鳥依人咁攬實我，喺我耳邊溫溫柔柔咁，好嬌嗲好溫馨咁低聲同我傾訴：「老公，剛剛喺半夜，蘋果好似出咗部新機喎，一定係好型仔好好用架喇，如果你送一部俾我嘅話，我諗我一定會好開心好有驚喜啫.....老公~~~」

我咁樣被嚇咗一嚇，即刻醒一醒，心諗：「唔使走去查通勝，都應該知今日係大事勿用喇。」

我轉身走去著電視，見到 Steve Job 介紹緊部 iPad，賣美金499起。雖然當時我仲未係好清楚呢部iPad究竟係乜東東，但單從外表同埋賣價嚟睇，我第一個感覺都覺得佢幾吸引。

好彩呢部野起碼要到三月先會有得賣，無形中即係俾咗大家有成個幾月嘅冷靜期，否則的話，會唔會有可能昨日我連牙都未刷，就俾人挾咗去 Apple Store 落 order 呢？

講返呢部 iPad，我由昨日到現在，都不斷圍繞著一個問題，就係對於已經用緊 iPhone 嘅廣大群眾嚟講，有冇需要用多部同 iPhone 功能九成一樣，只係個芒大啲(有9吋幾)嘅 iPad 呢？無疑iPhone 真係一部絕佳嘅掌上電腦，加上好多 app 真係超正，但缺點(亦係優點)係佢太細部，有時真係睇得唔多過癮。若果換部大啲嘅 iPad 喺手，應該會睇得再爽一啲，用得再流暢一啲。之不過，我會唔會揸著部咁大份嘅 iPad 出街四維浦呢？iPad support 3G，我會唔會將佢當電話用而唔駛再帶 iPhone 呢？若果有電話入，我會唔會貼部 iPad 喺耳仔邊呢？.....

哎呀，真係好多問題！！所以，我昨日花咗好多時間，不斷咁同啲 friend 係咁探索研究，好煩！

願以祝福作始

新的一年，願以祝福作始：

耶和華所賜的福使人富足，

並不加上憂慮。

(箴10:22）