2013年9月27日

舊文轉貼:爸爸受傷了

此帖原寫在很久很久以前,一直被塵封了在 Yahoo Blog 內,如上文所說,最近因打掃那古舊札記集子,故此執拾了此帖出來。


這是零六年三月三十一日的事了。

中午,忽然接到君來電,說父親正在急症室,大致知道他被賊劫,手傷了。

晚上探望過他,感恩的是他不需要住院,只是給賊人打了幾拳,倒下在地時弄斷了手骨。

事源有人到他的舖頭冒警要錢,父親走去找警察求助但找不著,回來打算致電報警,賊人便打了他,街坊因看不過眼將賊人捉住,再報警,二十多分鐘後,警察才來到把賊人拉了。

感恩賊人被拉了,但同時見父親處理這事時,忽然很覺得他真的老了,腦筋退化了;心情有點沈重!

2013年9月26日

絲絲記憶

為了替儲了在 Yahoo Blog 的舊帖搬家,因此,我把那個很少出文的私密扎記集再由頭到尾地梳理了一番,好些似已被淡忘了的前塵往事,又一次翻倒了出來,結果一下子地,心情再被牽動了。

人大了,總有些經歷是刻骨銘心到一個地步是可以滲出血水來的。未敢忙,但也不想隨便再碰!Yahoo本來就是我用來封存這些帖子的堆填區,但想不到,原來沒有地方是可以永久埋藏絲絲的記憶。


2013年9月25日

新派茶餐廳

網上圖片
大家有冇幫襯過啲外表裝修到懶有 concept 嘅茶餐廳?我在香港不同地區都分別在呢類新派茶餐廳領過嘢,估唔到今日又中招。

今日要去某舊區,下午難得有啲空閒時間蛇下王,諗住一條冷嘆吓下午茶,見有間光光鮮鮮嘅茶餐廳就走咗入去。

間嘢冇乜人,我估呢區啲人冇乜文化,唔鐘意飲下午茶啫,所以冇乜在意。

我坐低二話不說,「熱檸茶!」

「仲有冇菠蘿包呢?」「有嘅,有嘅。」個侍應姨姨含糊咁答。但其實我睇到牆上餐牌雞乸咁大隻字寫住,有菠蘿油下午茶餐。

「咁要多個菠蘿包添啦唔該!」

個姨姨忽然問我:「菠蘿油跟咩?」我見佢論論盡盡,急瞄去個水吧度,發現個哥仔雞手鴨腳,倒瀉籮蟹咁,心知大鑊,呢班友肯定唔係做茶餐廳出身!

我好清楚再同姨姨講,我係要熱檸茶同埋菠蘿包啫,唔係要菠蘿油!之後姨姨又兩次同水吧講話我要菠蘿油,我又耐心客氣咁同佢講多兩次:我要杯熱檸茶,再要個菠蘿包啫。

我以為個樓面姨姨個腦轉唔到,個水吧哥哥都聽到我實情要啲乜啦,點知,佢俾咗杯餐檸茶我,得兩片檸檬!我心諗,你當我叫菠蘿油餐走牛油,收盡咪得廿幾蚊!?你俾杯正正經經嘅檸茶我,單係杯茶都收到我十幾蚊啦,你點做茶餐廳呀?

埋單時姨姨寫我張單收十蚊,我碌大雙眼問佢,十蚊?真唔真呀?姨姨唯有寫多兩蚊在張單上,收我十二蚊。

2013年9月23日

SimCity: 香港超強颱風

超強颱風天兔即將襲港,未知風暴情況對香港的影響將會如何,但願它不會如溫黛般兇惡。

多年前,在網上曾有一個視頻,模擬香港受到超強颱風正面吹襲的情況,也但願這個只是想像出來的情況好了。

預告版


完整版

2013年9月21日

我們的議員


究竟我們的小朋友,如何看待現時香港的政治實況呢?他們如何評價如今的政黨?到底在年青人的心目中,當下的議員是怎樣的質素呢?或者,可以由以下的兩段短片,窺探到他們的心聲。

警告:
以下兩段短片,俱言詞粗鄙,內容空廢,極不適合人類觀看。


2013年9月19日

明月幾時有?

中秋的晚上,你眼中的月亮到底有多圓?有多美?

明月幾時有 把酒問青天
不知天上宮闕 今夕是何年

我欲乘風歸去 唯恐瓊樓玉宇
高處不勝寒 起舞弄清影 何似在人間

轉朱閣低綺戶照無眠
不應有恨何事長向別時圓
人有悲歡離合 月有陰晴圓缺
此事古難全 但願人長久
《水調歌頭》蘇軾
 


2013年9月17日

好歌分享:《從不喜歡孤單一個》

打敗仗,今日病咗,放工後去睇完醫生返嚟,發現自己把聲磁性咗好多,鬼死咁 Sexy!

點知,上 facebook 打開老婆今早 send 俾我條片,發現,竟然.................

有人把聲磁性過我,型仔過我,Sexy 過我!!??點解?點解??

2013年9月14日

惡頂!

網上圖片
九月十三日,星期五。果日係真真實實嘅黑色星期五!因為,當日要食一餐完完全全由背脊骨落嘅政治飯。

同枱當中有個低頭男加埋兩個港媽,個低頭男坐正喺個上菜位度,一坐底就話Q之你,只顧住玩佢嘅 Whatsapp 同埋 Line,因為哥仔個三叔電話嘅畫面實在太過大,個個人都見到晒佢 send Line 用緊果啲核核突突公仔。

條友仔真係當正自己玩緊 Whatsapp 同 Line 係可以大叉晒嘅,下下上菜時放在佢面前啲嘢,自自然然就會有阿四仲手去幫佢接埋、擺好位,大家幫佢斟茶遞水就更加係老奉添架啦,不特止,佢睬吓人都有味添過喎!

點菜係港媽們嘅嚐好,一點就點足九萬幾樣嘢(我知道,最後食到成枱剩的話,佢地一定唔會傷身食多兩件,而係會迫啲男性動物監粗食晒佢),呢個時候個低頭男就即刻起頭,開聲反抗話唔好!兩個港媽即時眼例例,好一副唔怕折墜嘅咀臉。

港媽 A 開始講佢點幫個女搵 play-group 啲嘢,又咁、又咁、又咁咁咁…..

我冇出聲只係聽,心中卻對佢講:妳有病牙?妳個女連牙都未出,坐都未穩喎?!

港媽 B 就教佢一定要開始準備定點報聖乜乜聖物物學校,又話可以點駛橫手點拉關係…..

我又心諗,聖乜乜聖物物妳識得邊個呀?係,香港啲教會係唔爭氣,但冇妳講到去到咁腐敗吓嘛?我差啲想話佢知,知唔知好多教會學校係唔會賣賬架?知唔知連同宗牧師嘅仔女都冇面俾架?

港媽 B 忽然問我個仔讀咩學校?當年點樣搵學校?

我答佢我個仔只係讀緊屋邨學校,當年靠政府派位架咋。

結果,我又收到兩雙睇人唔起嘅眼神。

2013年9月11日

一堆廢話

歸隱了多年,最近 Andy 老師再次吹雞查經。以下的一堆廢話,算是提問,也算是分享:


網上圖片

長久以來,心中埋藏了一個問題,就是「查經」究竟是甚麼的一回事?

查經是否就如 Audit 經文?但以我這般低劣文化水平的人來說,平時連說話、書寫也覺表達困難,並且自知思路胡渾、總是語義不清辭不達意。當面對聖經,自家又如何有能力捉得到游走貫穿於書卷間的潛藏脈絡?耍得出諸如對譯文、對別國文字等等的序列解構、語意分析的上承功夫呢?

自己是以審計混飯吃的,知道世上根本沒有”絕對 Correct” 的財務報告的,因此,當作審查時但求合情合理合法合規便會放人一馬的了。然而,是否面對聖經,跟面對世事是兩碼子事,不可以同日而語的呢?因為聖經無謬誤,所以要求”絕對 Correct”的聖經解說,是絕對有可能?甚至是天經地義的呢?

世上智者雖如九牛一毛,但肯去在聖經中努力尋求真道者也著實不少。可是,千百年來集結無數能人異仕的努力,直到今日似乎仍未能完完全全正確地解得通這本上帝給世人的啟示,我這等腦生草之輩,拿起聖經來查,還敢期望甚麼?同樣地,看見別人查得不好,又豈敢造次多言?

自古以來世人不解這本「上帝給世人的啟示」是個不折不扣的歷史事實,那麼,其歷史意義又是甚麼?有甚麼啟示?敢問一個想是更重要的問題:天意何在?

上帝這又真又活的神給世人賜下了聖經,對之求真雖不易,但始終前人在這方面亦留下了不少足跡可供追尋;然而,「查經」如何求活?這是否根本就是虛無飄渺?是否比之求真更難?

2013年9月4日

我愛部落格

停了一陣子不出 Blog,懶得再寫的感覺又慢慢浮現,其實不時也會問自己,會不會從此一沉不起,靜靜地就此擱筆?

今天執筆,只因被 Yahoo 等網誌結業的消息所觸動,似乎忽然被提醒了:原來可以寫寫網誌,與別人在這種古老平台上閒聊胡扯,其實 也不一定是必然的事!

我覺得網誌跟寫日記不同,後者基本上是不會讓人看的,因此,日記的內容和寫法,對我來說是跟寫網誌有很大的分別,最起碼,我寫網誌是期望有人看,而網誌給我最大的滿足感,也正正就是可以和大家在留言欄上彼此交流溝通。

然而回望過去,好多以前常到的部落格已經好久再沒有新帖文了;好好多多以前熟悉的博客,從前天天在網上聊天,今天亦似乎消聲匿跡了,於我來說,這是我今日作為博客一份子的無奈及傷感。

不知到何時會輪到 Google Blogger 執笠,也許到時還可以保存以往出過的文章吧,但我怕的,是大家的留言,就此永遠消失。