2009年6月30日

問功課

早幾日,晞晞學校派番d考試卷,雖然話係一年級啫,不過我一睇,發覺真係好深!我心諗,點算?可能我真係連一年級嘅程度都未夠,我點教佢?

話說有一次,晞晞走去問媽媽功課,係一條 fill in the blank 嘅題目,要求將一個英文字母填上去,將佢變成一個有意思嘅英文字。晞晞已經填到頭兩個,但係第三個唔識填:


D UCK
L UCK
__UCK


媽媽諗都唔諗就答:「F 囖!」
我即刻hold住佢:「等我諗諗先!」

2009年6月29日

不完美的完美伴侶


昨夜西風凋碧樹,獨上高樓,望盡天涯路;
衣帶漸寬終不悔,為伊消得人憔悴;
眾裡尋他千百度,驀然回首,那人卻在燈火闌珊處。

2009年6月26日

「恨」未能儘愛

今早看Hana寫的「因為愛所以恨」,甚覺淋漓甚有味道。不期然,令我又聯想起猶太人所說的「恨」來。

在猶太人眼中,「恨」不是不愛;只是,奈何它只可能愛得比較少。跟愛相比,它未能盡心盡性,盡情盡力;「恨」,始終是愛得有缺憾!

在創世記中,因岳父的狡計,雅各娶了利亞為正室,雖然雅各不是不對利亞付出愛,只是這份愛始終帶著遺憾(見創29:31希伯來原文說利亞被「恨」)。到雅各可以得到拉結的時候,他所付出的愛,才得見完滿。

巧合地,我們廣東人所說的「恨」也很微妙;我說我「恨」見妳,不是我憎恨見到妳,而是我非常愛見到妳,只是未可成願,當中多少帶點缺欠。

「恨」,未能儘愛,當中缺憾的空隙,若以苦毒來填滿,就成了怨恨。若容許空隙一路存在,可能只有無休止無結果的期盼;若選擇放手,如Hana所說:雖然放走了愛,但同時也趕走了恨。

2009年6月25日

聚舊

昨日,唔知搞乜鬼,一日之間分別有兩個唔見咗好耐,佢地又互相唔識嘅舊同事打電話嚟,話要約我去聚吓舊。結果,一個約咗下星期見,一個就昨晚同佢去食晚飯。我放低電話時,心中好懷疑自己係唔係有d乜野事?點解d冇見咁耐嘅朋友都要嚟見吓我一面?!

昨晚見果位舊同事原來喺過往幾年station咗喺上海,今年剛剛回港,所以就搵吓我出嚟聚吓。同佢冇見咁耐,佢都係冇變,都係咁鍾意吹水,結果,噚晚我同佢喺間地踎酒樓吹水唔抺咀。

坦白講,大家男人老狗仍然可以長久keep住友誼,冇見好耐出到嚟仲有計傾真係好唔易,真係好珍惜!

2009年6月21日

賣物會

今天,我的教會在座堂背後的中學球場裡,攪了一個名為「助人自助」的小型賣物會。這賣物會的目的是去讓一些待業已久的朋友去做點買賣,雖然為期只是兩天,不知可起得多大的幫助,但起碼,這可作為一個機會, 讓大家彼此作一點比較實質和積極的支持和表示。

我特地帶了晞晞去其中的一個攤檔作幫手,想不到在今天32度的高溫下幫手叫賣,他一點也沒有喊辛苦,還很落力去拉客。

我不知晞晞今天能否明白這個賣物會的意義,但願有一天,他能親自去告訴我他今天所學到的。我想,這就是今年父親節他給我最好的禮物了。

2009年6月19日

貧窮人導賞團

唔講真係唔知,原來香港有d所謂『貧窮人導賞團』嘅嘢!

君因工作關係,上週被安排要倍埋一班細路去參加呢種團。聽佢講,果日大家坐上旅遊巴,浩浩蕩蕩幾十人,話要俾人車佢地去深水埗睇吓d貧窮人喎。誰不知原來係車咗去長沙灣,個導遊指住One New York附近d舊樓,就話有好多貧窮人喺度住架喇。之後就帶埋成棚人走去順寧道街市附近影相。最後,(竟然又係旅行團嘅指定動作)帶咗佢地去一間指定嘅商號入面,自由購物!

當晚君將呢單嘢講番俾我聽,大家都覺得好好笑。果班細路其實都知俾人老點,有個唯有咁樣講笑嚟自娛吓:「個搞手只係識路去泊佢部靚車嘅啫,佢點會知深水埗其實喺邊度吖?」

2009年6月16日

誰是我的鄰舍?

以前,曾經有一個宗教領袖來求問耶穌,問衪誰是他的鄰舍?意思即是在問,以他的身份,誰配得起親近他?誰配得起住在他的附近?


今天,梅窩居民反對正生書院遷入他們的社區,坦白說,他們的感受我是完全可以明白的。試想,假如你的子女身邊會有些過來人出現,你願意嗎?

我和君曾經定期地探訪過男童院,曾經也遇過不少想改好的孩子,在他們走出男童院的頭一個月其實是最關鍵的,我們一隊所謂導師最努力想做到的,是讓他們能儘快融入教會,否則,他們很快便會再找回從前的“朋友”,重回舊路。這又無他,始終他們好歹也需要友伴。

然而事實上,不是所有人都好願意孭起他們的。試想,你是否真的願意你的寶貝仔女同些不確定一定改好的人來往?是否有額外資源去特別作照顧?何不做些更有成本效益的事…..


耶穌反問那宗教領袖:你是誰的鄰舍?意思是說,需要你去作伴扶持的,是甚麼人?

基督教正生書院是神親自收納浪子的地方。 我信正生書院是上帝的工作,上帝自會好好去收拾處理,等著眺!

2009年6月14日

有冇試過夜晚一個人搭lift?

冇試過夜晚一個人搭lift?有冇試過夜晚搭lift時遇過一d不可思義嘅嘢?

以下係一次真人真事嘅經歷,細膽嘅朋友,我建議你都係唔好睇落去!


喺好多年前,當時我仲係讀緊中學,仲係住喺屋邨。有一晚,我去完自修室溫習番屋企,大概10點咁上下,唔算好夜,不過條老化左嘅舊式屋邨己經冇乜行人經過,四週仲黑鬼嘛嘛。我去到升降機大堂,都係一個人都冇,打開咗lift門,裡面冇人,得我一個走咗入去。

lift慢慢行,我就慢慢開始聽到有人唱歌,由初初好微弱至到越來越大聲,d歌詞我係完全聽唔清楚,之不過我可以好肯定,呢種歌我係從來都未聽過嘅。

Lift門打開,前面竟然唔係平常見慣嘅十三樓,而係去咗另一個朝代,部lift出面煙霧迷漫,歌聲原來係呢層樓傳出泥,lift口左右前面有兩排人身穿白袍企晒喺度,佢地件白袍由頭垂到落腳,個個雙手垂下,頭望地下,背住我企,所以我見唔到佢地個樣,只係聽見佢地喊。果度其實好昏暗,我只見到附近有d火光,前面好似有個大壇,有d似閻王殿!當時我第一個反應係:唔通部lift載咗我番去舊時果度?

忽然間,果d著白袍嘅中間走左個出泥跳吓跳吓,我定睛一睇,佢係唐三藏!

我俾條友嚇到我叫佢阿媽。妖!發生咩事呀?其中一件白袍回頭望吓我,我睇清楚d佢個樣.....佢咪係.....住喺走廊尾嘅?!我定一定神,省起佢屋企早幾日俾大耳窿放火燒死咗幾件個播!

唔通,佢地貪lift lobby地方闊落d,喺度就地打薺超渡?

PS: 當時其實正在做緊超渡法事,d白袍係著咗孝服嘅家屬,個唐三藏係法師,d歌係由佢唱經所造成嘅。

2009年6月12日

由停課想起...

昨日,政府突然頒令全港小學兼夾幼稚園要停課十四日,一時間,攪到好多家長話好頭痕,因為佢地唔知點睇實d細路好。

原來,獨留d細過14歲嘅細蚊仔(14歲仲係細蚊仔?)喺屋企係犯法嘅。我好好奇呢條例係唔係新出嘅呢?點解我細個果陣冇人話過我知嘅?

想番起,我同我個妹其實好細個就已經開始俾人單獨留喺屋企架喇,我老媽話番俾我聽,原來喺我兩三歲果陣,有次冇大人喺屋企,我將我當時幾個月大嘅妹當公仔咁玩,差d玩死咗佢喎。

到我大小小三四歲咁上下,我老媽喺垃圾房執咗隻貓仔番泥,話冇大人倍我地兩兄妹嘅時候都有隻貓倍吓喎,點知我地扯下佢d鬚之馬,隻衰貓竟然咬到我地流晒血!

細個住屋邨,家家戶戶嘅小朋友都係俾d大人塔住喺屋企架啦;記得喺夏天嘅時候,家家打開大門,我地d小朋友個個兩手hold住幢鐵閘,努力想伸個頭出去跟對面同隔離屋嘅小朋友傾計,依家諗番起,真係好有監獄風雲feel架!

我阿媽話佢家教好好嘅,佢好嚴咁唔准我地落街玩,所以佢好proud of 我同我個妹冇變做街童。不過除咗落街,其他所有嘢佢話由得我地自由發展喎(即係理得你!),所以到我大d,我就開始通冷巷跑,屋邨四通八達,搞得嘅嘢都搞過。

細個好多時冇大人喺度嘅時候,就要識得自已照顧自已,我最拿手就係餸頭餸尾炒冷飯,依家諗起都覺得自已好勁!

原來依家14歲仲要俾大人看住;回想我14歲果年,己經約女同學去 wild camp 喇。

2009年6月9日

公義原則

【本報訊】協助吸毒青少年改過自身的正生書院擬遷入梅窩,遭部份居民反對,保安局局長李少光呼籲居民以平常心看待,給予書院支持。不過,有居民及區議員批評當局作決定前缺乏諮詢,現卻將責任推卸予居民。李少光昨稱,正生書院過往一直協助青年人重新上路,呼籲梅窩居民以平常心看待,支持書院遷進區內,又稱居民難保自己子女日後也會誤墜毒海。(200969日蘋果日報)

記得好多年前,政府打算在九龍灣麗晶花園興建社康綜合大樓,附近居民知道大樓會收容愛滋病人後大為不滿,因此作出了非常強烈的反對,事件擾攘了好一陣子;卒之鄭大班怒斥那些居民為刁民;到最後,大樓終於成功落成,至今,仍未見到大樓對居民有甚麼實際的影響。

以上兩件事件,若讚成正生的遷入或綜合大樓興建的話,大抵是以社會整體最大利益為依歸作考量。但個人認為,一個政府若只憑整體最大利益而作決定的話,是相當危險的,因為這個決定,未必公義。我自己比較接受的公義原則,是要看看那些因這決定而最受影響的一群,是否都有受到最大的照顧。

看看正生遷校,若從社會整體利益為出發點,那麼事件中最被影響到,而又最需要我們去維護的是那一群?是梅窩居民?抑或是戒毒後學習重新做人的學生?

2009年6月5日

我的教會很富有

公元二五八年的教會受到皇帝的迫害。羅馬總督以為教會儲存大量財富,便要求初期教會的會計老楞佐(St. Lawrence)交出教會的財產。

老楞佐在三天內召集由教會照顧的窮人,帶他們到總督面前說:「這就是教會的真正財產了。」老楞佐因此就被總督判處烙刑而死。


金融海嘯發生後不久的某一天,忽然收到了牧師的一封電郵,說他準備了一次聚會,要求我們怎樣也要回教會一倘。那天,牧師準備了一間大房,坐滿了很多人,有我認識的,有不認識的,有中產,也有草根。當中,好些人原來正失去了工作,好多平淡道來的故事,聽來卻教我好扎心。

謝謝牧師關注過每一個故事;他使我看見,原來即使未有能力去對別人作實際的幫助,單是一份關注已經是好可貴。

在現在的市況中,我為到我仍有一份頗安穩的工作而感恩。同時,我也為到我們有這樣一個牧師而感恩。

聚會後牧師向每人派了一份小禮物。哈哈,我的教會原來好富有!

2009年6月2日

8964

今年,六月四日,似乎有點不一樣;畢竟,二十年確是一個值得記念的日子。

如往年一樣,六月四日,心情仍如往常般悲痛。


記得二十年前,班中有同學振臂一呼:「我們要去!」一眾伙子,包抱我,就在一個五月天的颱風夜晚上,冒著漫天風雨,第一次上街去了。由來只覺得自己是香港人的我們,第一次彼此醒悟承認,我們生來便是中國人。

六月四日,我哭了,身邊所有人都哭了;第一次感受到如喪親之痛,也是第一次知道甚麼叫做血脈相連;我們一班黃毛小子,開始尋根,從始學習關心家國...

六月四日,再次上街;其實,當天走得起的人都有上街,大概有一二百萬吧。上街,在宣示血性;從來,尊嚴、信念與盼望,不容打壓!

二十年來風雲銳變,很多很多的事、物、人都已經時移世易;然而當年學生的丹心與氣節,只會傳承不息,永不改變。


只因是其是,非其非,所以有六四。亦因六四,我們學懂了是其是, 非其非!