2010年7月25日

福音電影介紹:FIREPROOF

最近,在教會界有套福音西片正在推廣中,片名叫做 Fireproof。

以下是有關此片的介紹,相當抵死好笑。

教會電影?

上一篇網誌談起了在教會內曾經見過的一些鬼怪事,想不到,卻頓然勾起了心裡好些感觸。自已返了教會好些年日,確實地,好體會到不少打正基督教旗號的人或者事物,其實與那些鬼怪一樣難頂。

其中一樣至怕的東西,就是那些所謂「福音電影」,坦白說,還未有一套使我沒有「骨痺」的感覺!

最近在 Youtube 尋找到一條短片所介紹的一部普通電影,原來都能真真實實地點出了基督教價值,甚至更感人。

以下且轉貼貼片者 howtindog 的分享,相當到肉:

『繼影音使團世紀鉅作"驚世啓示"之後最近返團契又睇到另一齣非常嚇人o既教會電影, "Fireproof", 竟然係一齣宣揚港女價值, 金錢至上, 物質主義o既教會福音電影, 可謂奇片, 日後會講下. 



回想, 其實我好少會鍾意睇教會電影, 因為通常都拍得太露骨, 反而有時睇普通電影, 我覺得當中講/宣傳基督教價值仲來得有效. 例如呢齣"聽說" (唔係教會電影), 講基督教家庭o既兩姊妹o既生活, 我就覺得好好睇, 自然得來又感人, 拍出兩姊妹否定自我, 爭先為對方犠牲o既精神. 一般咁o既角色, 都會令人覺得好假, 不過就正是佢地o既基督教背景, 令成件事變得合理. 



有時唔係要 hard-sell 先至入腦的; 不停夾硬來的, "催眠".』


2010年7月24日

夏令會

上一篇講開啲疑似鬼靈精怪嘢,唔講由是可,一講開就好似覺得有啲意猶未盡咁,諗吓諗吓又想整多篇,希望唔好悶親大家喇。

話說小弟初初第一次俾人呃咗返去嘅教會,係一間位於深水埗嘅二樓教會嚟,我當時好單純無知,唔知道嗰間嘢原來係三山五嶽乜鬼嘢人都有。

有次間教會搞咗個夏令會,我諗住只係一班少男少女維威喂嘅活動,冇諗過就應承咗去,點知,晚晚啲人都唔知去咗邊,惟有自己一個人一就早上床瞓覺,十分冇癮。後尾好耐再提番呢單嘢,先知道原來當其時有位姊妹,因為揩咗污糟嘢先番教會嘅,佢一到夜晚就上身,當時由於我係新仔,唔駛去幫拖做嘢,好彩、好彩!!

過咗好耐,我輾轉去到我現在呢間教會,喺幾年前,又有機會去夏令會喇。

夏令會通常有一個大家都好鍾意嘅環節,就係一班少男少女唔願瞓,大家夜嘛嘛圍埋喺間房度一起傾心事。當晚,有一位剛剛返教會嘅女仔,佢係新人,大家當然好會關心佢,問佢點解咁有心返嚟教會聽耶穌呢?

個女仔嗰晚,第一次將佢嘅心事袐密講晒出嚟,佢話:「我一直都有隻男鬼跟住我,佢點點點架,我返教會,係想揾你哋睇吓幫唔幫到佢。」我聽完之後,個心離咗一離,跟住我望吓窗門對正我地嘅反影,發現,點解我地當中,有條友仔咁生面口嘅?會唔會我只係俾條女嚇到眼花呢?

其實,如果早知個女仔需要咁特別嘅幫助,就一早叫佢直接搵牧師喇,仲點會叫佢去夏令會咁阻礙佢呢?!

2010年7月23日

酒店旅館「唔乾淨」(下)

上回分享過一啲以前公幹時所住過嘅「唔乾淨」旅店,今回再講吓另外一個從前經歷過嘅故事啦。

話說好幾年前,有次我要去到大陸某處比較偏遠嘅地方出Job,同行嘅係一位香港靚女client。大陸果度,係靚女嘅公司喺大陸開設嘅廠房。靚女嘅公司都幾大,佢哋廠房有埋自設嘅招待所,我同靚女於是好自然地,被安排齊齊住喺嗰度喇。

嗰晚,我做嘢做到好夜,一個人返到房間,已經係非常之攰喇,入到房,卻發覺原來已經著咗燈,仲開埋電視添。之不過,間房好暗,就算開咗燈,都只係俾點洋燭光少少啫,個電視雖然係著咗,亦只得雪花,冇乜聲,冇嘢睇。

我於是走去沖涼房諗住沖涼喇,誰不知,開門入去一睇,原來又係有燈好似冇燈咁!

我沖緊涼嘅時間心諗,會唔會有人入過我間房呢?點知,出面真係好似有人正在我沖涼嘅時間,靜靜雞入咗嚟咁,我同自已講:「唔好心多,唔好胡思亂想!」

我從沖涼房出嚟,發覺一個人都冇,莫非有人剛剛入過嚟,之後又出番去?

我唔理咁多,熄燈熄電視然後瞓覺,點知,過咗冇耐,燈同電視又自己著番,我諗,梗係電制壞咗,我嬲起上嚟,抽起門口條 Key(即係拔走總制),打開窗算數,點知,一樣係燈同電視時著時熄!我唔理(因為太攰),過咗冇耐,一切又正常番喇。

第二日,我將晚上嘅經歷話番俾靚女 client 聽,佢花容失色咁同我講:「你昨晚咁大件事,做乜唔即刻搵我,等我同你轉去另一間房呀?」

事實上,當一個人做到超攰嘅時間,係好多嘢都唔識驚,好多嘢都唔識想架喇!

2010年7月22日

黑雨下回家

今晚放工嘅時間先至嚟黑雨,結果要轉咗 N 咁多次車先去到番屋企嘅必經之路,點知,都係塞死晒!終於,都係要馬死落地行!冒雨行路先番到屋企。

唔好怪附圖兩張相鬆郁濛,我在大雨下一手揸遮同公事包,一手揸 iPhone 先影到,係咁架喇!

前面條路爛晒,呢架小巴揩晒嘢

行過啲,仲係水浸緊

酒店旅館「唔乾淨」(上)

做審計呢行,要出門公幹係好平常嘅事,因此,所住過嘅酒店旅館,亦算不計其數;至於講到曾經住過嘅酒店旅館係點嘅呢?當然,乜嘢林林種種嘅住宿都有見過啦,當中實係有啲係美輪美奐超正嘅,亦有啲係好難頂架喇。

講到難頂嘅住宿,首推係間嘢「唔乾淨」!以下,且分享吓我曾經遇過嘅「唔乾淨」酒店旅館:

冷氣少少漏水
(呢間係我同事房,好彩!)      勁多蚊(但蚊帳穿晒窿)
有老鼠屎             有蟲
傢俱被動物破壞過          對正公路(勁嘈)及垃圾站(勁臭)
   厠所有古蹟


我仲有住過另一類「唔乾淨」嘅旅館添....係喇,就係嗰啲嘢喇。

請待下回分解。

2010年7月21日

問你點頂?!

原來完全係香港人唔啱!!!

(RTHK 2010-7-21 HKT20:50即時新聞)
西 貢 大 浪 西 灣 一 幅 臨 海 土 地 被 剷 平 , 引 起 社 會 關 注 , 擁 有 該 地 的 蒙 古 能 源 主 席 魯 連 城 發 表 聲 明 說 , 工 程 明 天 起 暫 停 , 公 司 會 與 不 同 部 門 和 團 體 溝 通 , 希 望 達 致 共 同 可 接 受 的 解 決 方 案 。

魯 連 城 的 發 言 人 說 , 今 次 決 定 , 是 因 為 事 件 引 起 各 方 揣 測 , 製 造 不 必 要 的 磨 擦 , 破 壞 社 會 和 諧




當年今日:25.5度

2010年7月15日

Retreat: Day 4

15 July 2010
星期四  
早上,空氣格外清新,陽光灑滿一地。
在濃密樹蔭及涼涼海風的包圍中,不經意地走到去大十字架之下。這裡除了晨早的鳥聲及從遠遠傳來的浪濤聲外,就只有一片莊嚴與寧靜。
蹲在小跪凳上,腦海漸浮現起好多 “Passion of the Christ” 的晝面,特別是基督在客西瑪利園對苦杯的掙扎。
不久,在彌撒中又見神父擧起那杯,心中不期然浮起臨光仙的兩節詞句:
「一壺濁酒喜相逢,都付笑談中。」

Retreat: Day 3

14 July 2010
星期三  
早上吃過早餐後,立即便再與神師面談,今天談得頗為深入,好多層面都能見血見肉,好磨心,但又知道好難得!之後,接著便是彌撒,彌撤完了,已到午飯的時間了。
下午獨自花了好長好長的時間去品味由神師指導著的聖經經文,中間夾雜了好多好多的默想與對禱;能享受與上帝對談的親密,使得快樂不知時日過,好快,又是黃昏日落,到晚飯的時間了。
晚餐過後,稍稍休息,然後便到那小小的教堂,安安靜靜地再享受那一小時純然的靜默。
今天好充實!

Retreat: Day 2

13 July 2010
星期二  
這裡的規矩是要儘量安靜,因此,除了每天定時跟神師面談外,其餘的時間都沒有甚麼說話的機會,況且這裡也甚少會遇到人,就算在用餐的時間,也沒有人會發出一點點聲音。
這裡的早餐是歐陸式的,即是說,只有麥皮、多士果槳、茶包或咖啡。午餐晚餐也是切切實實的粗茶淡飯,飯後且要一起安安靜靜地洗碗碟。然而,每頓飯我都好享受,我享受那安靜、謙卑、恭敬的氛圍,欣賞大家都對飯菜存感恩之心用膳的態度。
這裡沒有娛樂雜誌、沒有上網、沒有電話電視電腦、沒有音樂、沒有歌唱、沒有甚麼奮興呼召講道、沒有任何有趣的程序節目、沒有人會跟你分享甚麼、甚至沒有人會理會你。這裡有的只是無盡的自由與安靜時間,伴隨著到處風光如晝的美景。
這裡除了日間的彌撒外,每晚都會有一小時的時間,讓大家一起完全靜默地默觀默想,因此,也不可以說完全沒有甚麼可供參與的。

這裡,又有多少人會頂得順呢?



Retreat: Day 1

12 July 2010 
星期一  晴

黃昏,涼風飁飁,四野無人,花香幽幽飄送。


獨個兒躺在向海的長椅上,腦筋只有一片空白,身心皆鬆弛,任讓時間流逝!

頭頂的天幕徐徐由藯藍轉至深紫,晚星隱隱舞動,夜越近,越鋪滿越閃亮。站於漫天星海之下,不禁讚嘆穹蒼極美 !


2010年7月12日

先知保羅


先知保羅又貼中世界杯賽果,昨晚決賽荷蘭對西班牙,又一如佢所料,真係西班牙勝出,問你服佢唔服?吹漲唔吹漲?

聖經裡面都好多「先知」,但相信好多人都俾呢個亂咁譯嘅名字所誤,以為「先知」就係未卜先知,因而造就咗好多人在教會招搖撞騸嘅機會。其實,聖經所指嘅「先知」,係神嘅「代言人」,雖然好多時佢地都可以預測未來。

可以準確測到未來又如何?連條八爪魚都得,就知呢樣嘢奇實唔一定係好神聖。事實証明,信佢都可以賭輸波(因法定90分鐘內係和波)

究竟信神嘅說話好啲?抑或信「未卜先知」好啲?在教會裡面,好多好多所謂信徒,都係選擇後者!

2010年7月11日

看世界杯決戰的期待


今年的世界盃,相信是晞晞這個小二生,自懂得跟一班小朋友一起追著皮球胡亂來踢之後, 人生經歷的第一次足球盛事!

不知何解,這個根本不知德國和阿根廷是甚麼國家的小孩,在上次兩隊比賽時,竟會懂得捧阿根廷,並會為阿根廷的戰敗而落淚。

今天晚飯後,他即興高采烈地拖蓍我要去超級市場入貨,我見他去抓薯片和蝦條的興奮樣子,不禁覺得好笑。我打趣地跟他說:「今晚睇波同你飲 Hoegaarden,好唔好?」「我飲水得喇!」哈,他看得出我在試他!

這個小子對今晚荷蘭與西班牙的終極決戰異常緊張,八時正已經上床睡覺了。其實,我能夠第一次跟兒子看世界杯決賽,也一樣有點既興奮,又甜絲絲的感覺。

2010年7月10日

港童?


先排要上大陸去某國內單位度做嘢,碰啱某 Big-4 亦同一時間派員去同一地方做年審,因利乘便,國內單位安排咗佢哋個 term 同我哋同車前往。

起程當日,約好咗大家在皇崗去坐單位準備好接載我哋嘅專車。我同我同事準時到達,而兩位 Big-4 嘅朋友就遲到。個司機大佬好有責任感咁在大熱天時下四出走去搵人,終於在十五分鐘後搵到位小姐,佢話因為係第一次過皇崗,唔識路所以遲咗喎。我用眼神同我同事講:「吓!皇崗都唔識路?佢唔係未跑過大陸呀嘛?」之後我知原來呢位小姐係 FIC (即係 Field in charge)

大家都問另一位同事點呢?終於再三十分鍾後,見有條友著住條超低腰超低褲浪嘅賴屎褲,施施然咁行過嚟,佢眼神好似周杰倫,一上車,就一 pat 咁癱咗係個位度,粒聲唔出,十足周杰倫咁cool,而兩位仁兄仁姐全程都冇同同車嘅人打過招呼。

上到大陸,我收到風佢哋要在某日再去某地做 observation test,我好心問吓安排成點?佢哋好大安旨意咁話得架喇,我再問有冇搵有關啲單位領導打聲招呼,double confirm 呢?點知佢地好似嫌我煩咁。我心諗:「好!唔鬼理你!」我基於好奇,走去搵有關大陸佬吹吓水,點知佢話:「哈哈,係咩?!」終於,兩位仁兄仁姐“咁啱”遇到塞車,“咁啱”時間趕唔上,去到目的地“咁啱”冇法趕到 observation time

又聽講佢地離開回港嘅時間都俾人寸。原來有關單位只能夠接載佢地去到最近嘅火車站,好等佢地自己搭火車番香港。點知佢地話:「吓,我哋唔識搭大陸火車個播!!」安排嘅人隨即講:「唔識咪學吓囉!」呢單笑料,好快就傳開晒喇。

好坦白講,我從來所遇過嘅 Auditor 都係醒醒目目,話頭醒尾嘅,以上所見嘅兩位八十後,相信只係極少數極少數嘅特別例子嚟嘅啫。

2010年7月3日

巴西出局

喺大陸公幹咗兩個星期,過住啲冇 Blogger、冇 Facebook、冇電視嘅日子,悶死!昨晚番到嚟香港第一件要做嘅事,當然係即刻坐定定,睇荷蘭對巴西啦!

開賽不久,就發覺巴西呢隊波好似有啲唔妥,好躁!荷蘭亦不甘示弱,即刻還拖。成場啲球員除咗踢波之外,就係踢人。本來球員偷雞出吓術係好常見,但條日本仔球証只係眼望望,吓吓都唔吹就真係有啲出奇!!睇條架仔個樣十吓十吓咁,佢一定係好怯場,一定係未見過咁多球星、未見過咁出名嘅球隊,一時間唔知點算啦!兩隊超級球隊見打爛仔波都過得骨,仲唔當少林足球咁踢?唉!呢場波認真兒童不宜!

下半場巴西已經情緒失控,除咗佢地原本已經係心理質素不佳之外,加埋之前無啦啦蝦碌失波,再有條架仔上半場搞亂晒成場嘅秩序,下半場就時罸時唔罸,巴西仲唔更加心煩氣躁,亂上加亂?

坦白講,昨晚場波真係好睇,原因唔單只係兩隊波嘅球技真係咵啦啦之外,係見到成敗如何決勝於“一念之間。

場波令我忽然想起以前考 ACCA 嘅日子,記得老師曾提點過:「去得考呢場試嘅人,大部份其實已經有番咁上下實力架喇,至於最後能過關嘅,就只有係嗰啲唔俾份卷嚇親嘅人。」

Expect for unexpected,往往係決勝之道!