2011年1月25日

轉貼:酒桌上的規矩

圖片來源:新華網
朋友知道我適逢在挨年近晚時份要跑上去大陸公幹,想必飲宴喝酒的機會大增,因此特意地給我抄來了一份如何在大陸喝酒之「祕笈」,好作傍身之用。朋友關愛之情,使我十分感動。

據說,這份「祕笈」是從網上找回來,然後再轉成 word 文件給我的,我嘗試再在網上搜尋它一遍,發現原來在不同的討論區/網誌上都曾經有轉載過,然而卻找不出原來的出處。

以下試試轉貼這「祕笈」中一些有趣的部份,相信對大家都可能有用:

關於敬酒
1、主人敬主賓;
2、陪客敬主賓;
3、主賓回敬;
4、陪客互敬。

記住:作客絕不能喧賓奪主亂敬酒,那樣是很不禮貌,也是很不尊重主人的。


如果你不能喝
1、不要主動出擊,實行以守為攻戰略;
2、桌前放兩個大杯,一杯放白酒,一杯放礦泉水,拿小酒盅乾杯,勤喝水,到酒桌上主客基本都喝八分醉時,可以以水代酒,主動出擊;
3、乾杯後,不要馬上嚥下去,找機會用餐巾抹嘴,把酒吐餐巾裡;
4、上座後先吃一些肥肉類、澱粉類食品墊底,喝酒不容易醉;
5、掌握節奏,不要一下子喝得太猛;
6、不要幾種酒混著喝,特別容易醉;
7、領導夾菜時,千萬不要轉酒桌中間的圓盤,領導夾菜你轉盤是酒桌上大忌;
8、喝到六分醉時,把你面前的醋碟中的醋喝下,再讓服務員添上;
9、每次乾杯時,倒滿,然後在喝前假裝沒有拿穩酒盅,盡量灑出去一些,這樣每次可以少喝進去不少;
10、喝酒前面前放好半杯茶,喝了酒不要咽,趕緊拿起茶杯,喝水的功夫把酒吐進酒杯裡,吐滿了換水就行了,管用的!


Source: 酒桌上的規矩……男人必學 女人必知

2011年1月23日

夜遊記

本文寫於一月二十日
每次出外去公幹,最期望可以有機會做到的,就是在工餘時間,能夠獨自地跑到附近的城鄉小鎮去蹓躂一番,隨意隨處四周去看看,並且嘗試領略感受一下當地的民生味道。
晚上亂闖亂撞地走進了一個當地人的生活小社區,感覺上那裡有點像香港的長洲,都是佈滿了窄窄的街巷,錯綜穿插在好多好多矮矮的民房之中。在夜晚淡黃的街燈下,街道兩傍不同形式的小舖子不覺得特別光鮮起眼,然而因光顧的人都多,還算熱鬧。
我買了幾個柑子,一包花生,順道跟老闆閒聊了幾句。之後又走入去一間糖水店叫了碗熱騰騰的湯圓,老實說,都好難吃!
行到街尾,發現有一片空地,是個祠堂公園之類的地方吧?門口坐了些老人家在抽煙,這忽然令我想起了榕樹頭。公園裡面又有一大班人正在寒風下耍太極,這裡豈不也似梁顯利嗎?!哈哈!
小酒館
燒餅店

2011年1月22日

啃唔落

本文寫於一月十八日,因在國內翻牆不成功,無法即時上載至Blogger,只好留待到今天才發表。
一向以為,自已在大陸都食過唔少古靈精怪嘅嘢架啦,出得嚟行,睇怕都唔會有啲乜嘢能夠嚇得到我,叫我唔敢食喇掛?!誰不知,今鋪先發覺原來小弟一向實在太睇高自己,太睇小大陸呢個地方,太睇低住喺呢度啲陀地,罪過!罪過!
昨晚,俾位在國內做駐場嘅「港人」請我去食「地道好嘢」。下班後,司機車我去酒店 check-in 然後再去食店同「港人」會合,不幸地,間食店實在太偏僻喇,連個司機都迷咗路,要逆線行車行咗成條街先到,最後,發現間食店原來坐落在一個黑鬼掹掹、污糟邋遢、塵土飛揚,四周都係汽修站嘅地方。
一坐低,個「港人」猛咁講嗰度啲雞正,一定要叫嚟試吓咁話。點知,啲雞嚟到放上枱,原來係又老又鞋,又有幾件仍係帶住血嘅。我問個「港人」隻雞點正法?佢話間店放晒啲雞出去走地,係真正嘅走地雞。我心諗:「妖!放啲雞出條街度,唔係叫走地,係叫做企街!仲有,班雞成日在汽修站附近四維浦,佢哋即係食汽油同埋食金屬大架啦,咁嘅雞,點啃呀?」
接住,又上多碟豬油浸菜心。肥騰騰嘅菜撈埋好多好多豬油渣,又肥又老又黃。我又諗:「你雖然見我咁精壯啫,都唔等於我一定頂得順架嘛?!哥哥仔,點解你偏係喜歡咁 heavy 嘅菜呢?你想死唔好叫我陪埋你好喎!!」
最最攞命,係臨尾上嗰碟生炒豬粉腸!一碌碌肥腸條條硬掘掘,漲卜卜,清清楚楚可以見到係有晒料到嘅,皆因件件腸頭都咇咗啲咖啡色嘅嘢出嚟,好變態,好反胃,真係睇見都想作嘔!!

「大佬,你因乜解救仲可以將條粉腸放得入口,吞得落肚架?」

2011年1月16日

唔憂嫁

海報連結
香港剩女多的是?!

自己的教會,不惜工本地拍了套大電影去碰以上的老問題,並且只作半公開式的上映, 都算好大膽!

這套電影我還未看過,也不知道是否又有一般福音電影的婆媽老套味。但是怎樣也好,既是自己友出品,多多少少地,都起碼要在精神上支持一下!

電影簡介:http://www.speed-link.net/hkstbcvat/un-available/index.html

2011年1月12日

Amina又甩難

前以為,Amina 最終被判入獄,令大家真的覺得公理終於得以申張,荒謬終究會撥亂反正的了。誰知,昨日上訴所出的判決,結果又再是令人嘩然!究竟,這單案子的結局,我們應該覺得是出人意表?還是乾脆接受是理所當然好呢?



【明報專訊】裁判法院輕判包致金侄女 Amina,輿論譁然,律政司要求上訴庭覆核量刑,公眾原以為會撥亂反正,確認襲警、醉駕加拒絕酒精呼氣測試應判即時監禁,為日後各級法院樹立正確量刑準則,誰知昨天檢控一方有意無意之間又再「鬆章」,非但放生了Amina,還變相確立了拒絕「吹波」也可以輕判的先例。

律政司本來就襲警和拒絕「吹波」兩條控罪的量刑提出覆核,但在 Amina 違反感化令被判入獄後,突然放棄就襲警這條性質較重的控罪提覆核,被告一方自然喜出望外。餘下的拒絕「吹波」控罪,副刑事檢控專員薛偉成在庭上雖力陳情節嚴重,應判即時監禁,但當上訴庭法官詢問拒絕「吹波」有何判監先例時,薛偉成卻沒有拿出任何案例,結果上訴庭維持罰款原判,只是將停牌時間由1年延長至3年。
其實,只要花15分鐘翻查量刑案例,馬上就能找到拒絕「吹波」曾有判監1個月的先例(HKSAR v Lam Hon Wing CACC253/2003)。薛偉成雖然解釋該案是區域法院案例,未必適用於 Amina 這類在裁判法院起訴的案子,但這說法相當牽強,是否適用、如何應用,其實應由上訴庭3名法官衡量,控方在戰場上主動棄甲曳兵,既不要求上訴庭設定具體量刑指引,又不出示判監先例,客觀效果與「邀請」上訴庭輕判無異。經此判決,許多律師會告訴客人,酒後駕駛給警察抓住,千萬不要「吹波」,「吹波」超標判監是有很多先例的,但拒絕「吹波」,上訴庭的案例卻是罰款而非監禁。連 Amina 這樣撞了車再逃跑還掌摑警員的拒絕吹波者也不用即時收監,這世界還有誰該坐牢?
(2011-1-12,明報)

2011年1月11日

終極禦寒保暖大法

網上圖片
呢排日日都天寒地凍,見到好多 Blog 友都已經介紹過林林總總嘅保暖方法。我今日都講埋一份啦!唔係話自己大口氣,我敢相信,我所介紹呢個禦寒保暖大法,絕對係最終極、最架勢、最冇得 fright 嘅版本。

呢個方法係我做0靚仔時,由導師所教嘅,聽講話仲好有理論基礎添。佢最適合在十鬆啲度嘅氣溫下做,再凍啲唔係唔做得,只要係啱 feel 都冇乜所謂嘅。

呢個終極保暖大法究竟係點樣搞法?依家慢慢講俾大家聽啦:

當覺得好凍好凍嘅時候,立即走入沖涼房,用最快嘅速度脫光晒身上嘅衣服。呢個時候,首先會見到在皮膚上面會起晒一粒一粒嘅雞皮,然後,身上各個部位嘅肌肉都會開始越嚟越硬,越嚟越彭漲顯現,越嚟越有立體感層次感(欣賞一陣好喇),之後,要即刻用個花灑頭,兜頭兜腦放水淋落去,要俾啲凍水由頭頂一直咁流落去,由肩胛肌流到背闊肌、由胸肌流到腹肌、由二頭肌流到三頭肌再流落去周頭肌.....

呢個時間,成個人可能首先會眼前一黑(放心,唔暈得嘅話兩三秒會冇事),然後全身會好似有千千萬萬支針拮落去咁,非常之過癮!跟住,週身會好冇節奏、好快速、好發狂咁震吓震吓、fing 吓 fing 吓,同時間,全身肌肉再變得更加結實,更加有勁。

如果挨得過以上各個步驟的話,就會開始感覺好似沖緊暖水涼咁,會感覺水溫越嚟越暖,因為身體入面嘅潛能,已經被完全發揮咗出嚟。

呢個時間,著番衫,全身會由內到外再到內,感覺得好溫暖好溫暖!行到出街,即使著上大褸,仍然會無法掩蓋得到全身堅挺嘅肌肉,仍然無法遮擋得到整個人優美嘅線條,因為,裡面仲係發發聲!

2011年1月10日

好環境?

網上圖片
我好想知,今時今日,香港嘅市道係唔係真係好好呢?

昨日星期日,返完教會,心血來潮諗住一家人 lunch time 去飲吓茶啦,點知個知客同我講:「呢度個個都係兩日前訂落位個播,full house 晒喇,唔接 walk-in 架喇!」

冇幾耐前,我諗住同朋友夜晚去間豆泥酒家打邊爐,我已經幾日前訂位啦,點知對方都係咁答:「七至九點冇可能有位架喇,係十點左右過嚟碰碰運氣啦!」

最近識得兩個妹妹仔,應承晒人哋上工,結果玩 no show 放飛機,因為仲喺度揀緊工。

今日,公司新請嘅 tea lady 番咗兩日工又玩劈炮,佢話公司太靜,唔夠開心喎!

2011年1月5日

喪食

先兩日,同埋老婆跟人上中山諗住行吓,順便乘機食食乳鴿啫,點知同行班友仔搞到變咗做喪食團,一日食足九餐,差不多餐餐都食到成枱都係,家陣我都仲有啲驚!

最攞膽係夜晚剛剛食完乳鴒打邊爐,失驚無神,之後仲整多一大鍋乳鴿飯,雖然真係好惹味,但真係頂到上心口,為咗俾俾面,之後都哽多兩大碗。

食完晚飯十點上下,有妹妹仔話要唱 K,又有姐姐仔想去足浴,我當然支持去足浴啦,去到唱 K 又再食過咪死?!好彩,大家真係決定去足浴,去到只係食吓果碟啫,總算可以回一回氣。

大家足浴完事之後都夜晚十二點幾,我真係諗住番酒店瞓覺架喇,點知,有個姐姐仔話叫大家去宵夜喎,佢話:「外面得五度,我都專登叫到個 friend 嚟車大家去,依家人同車都喺樓下,唔食係唔係唔俾面先?」

我以為宵夜係去食吓夜粥啫,點知,我哋俾人車咗去間屠房,原來嗰度有間餐館嘅,姐姐仔個 friend 話,屠房夜晚劏豬嗰更剛剛十二點開始,我地可以食到即刻劏起嘅豬肉,時間啱啱好,極之新鮮!

結果,在震耳欲聾嘅豬被劏慘叫聲下,對住成枱唔同部位嘅豬肉同埋豬內臟,又再打多一次邊爐,真係好折墜!好核突!!

由於篇幅所限,以下只係第一日嘅喪食行程:

8:00am 在香港食早餐
12:00pm – 2:00pm 在中山飲茶(第一餐成枱都係)
2:00pm – 3:00pm 珍珠奶茶
3:00pm – 4:00pm High Tea:芝士蛋糕、雞翼薯條、蝦餅、鳳尾蝦、蘇皮龍蝦湯、咖啡...(成枱都係)
4:00pm – 5:00pm 雙皮奶、芝麻糊、燉蛋、蘿蔔糕、魚蛋... (成枱都係)
5:00pm – 6:00pm 麥當奴食雪糕、甜品
7:30pm – 9:30pm 晚飯:乳鴒火鍋宴 (成枱都係)
9:30pm – 12:00pm 足浴場食果碟
12:00am - 1:30am 屠場餐館食全豬宴火鍋宵夜(又成枱都係)


後記:今日返到香港,一打開 e-mail,全部係一個個 openrice 嘅 link ,原來另一班 friend 約今晚食和牛!阿媽,救命!!!

2011年1月2日

悼念司徒華


剛剛祟拜完了回到家中,一打開電視便看到司徒華逝世的消息,不禁噩然。

深切悼念這位值得受尊敬的老人家;特別在六四、在香港民主發展的打拚路上,景仰他的清高氣節。

願他安懷主內,永享安息!

2011年1月1日

Happy New Year 2011

網上圖片
願以祝福開展 2011 這新的一年!

禱願國泰民安,永享太平;人人安居樂業,四境昇平;
祝戶戶家宅平安,夫妻和順,老少健康;
祝願天恩永享,福杯滿溢!

主佑:Shalom!



當年今日:願以祝福作始