2009年3月31日

從蘇屋邨憶起

聽說蘇屋邨快要清拆了,一時間,覺得香港好像又少了一件古董。

兒時在長沙灣長大,不過自己並不是住在蘇屋邨的,因此,拆卸蘇屋邨,相信應該不會清拆到多少自已對這個屋邨的童年回憶。然而想深一層,從另一個角度來看,整個深水埗東至九龍仔西至美孚,每一處地方其實都留有自已的腳毛,都可以在記憶中找到一些前塵往事,少了蘇屋邨,似乎在兒時的記憶板圖上又崩了一個角。

記得讀初中時,一些同學住在蘇屋邨,因此自己偶爾也會去那裡混混,好多時從蘇屋跑到去李鄭屋泳池游水,之後沿著大水渠走,再轉入青山道,然後直踩落黃金掃街(黃金商場附近有好多好正的熟食小販,感覺就好似食自助餐一般開心)。

提起黃金,自然又會想起附近出沒的企街,見過有些真的又老又醜,既覺可怖又覺得她們可憐!在她們一街之隔的對面,是德貞女修院。每當經過那處,總不禁會問:「為何只是一條欽洲街,竟可以分開莊嚴純潔的天堂,和淫穢卑污的練獄?為何它們可以各自毗鄰,但又可以各不相干?」

從前我差不多每天都會穿過深水埗去到大坑東的社區中心溫書,有一晚在對面球場休息的時候,一位跟我年紀差不多的哥哥走來對我說:「今晚呢度危險,番上樓啦!」我於是走回中心去溫書,沒多久忽然聽見很多的警車聲,心想:「發生咗咩事呢?」

2009年3月27日

我們需要 laughing 哥

再一次証明,只要香港人上下一心,那怕有幾咁冇可能嘅事,我地都可以化腐朽為神奇!只短短數天,香港人竟然可以齊齊站起嚟,一起去改寫一套電視劇嘅結局!

因為一個 laughing 哥嘅出現,喚起咗每個香港人已經冇攞出嚟好耐嘅果份熱血;其實,大家何嘗唔係心中都仲有團火?咪以為大家都已經俾不景氣嘅現實磨練到麻木晒,已經變到事事冷漠、只求自保,可以冇底線;反之,原來人人敬重 laughing 哥嘅,係佢唔會有幼稚嘅行徑,在突發且惡劣既處境下,事事懂得執生、懂得分輕重,並且絕唔會對身邊有需要嘅人和事視而不見;而最重要嘅係,laughing 哥由始至終都知到自已做緊乜,對理想執著嘅熱情,甚至可以感化身邊嘅人。

當香港人開始集體悼念 laughing 哥既時間,香港同時又出現咗一班年青人,可以話係 laughing 哥嘅完全相反。佢地喺網上俾人鬧到嘔,原因除咗係俾人發現佢地嘅幼稚、唔識處理突發場面、同埋冇人知佢地做野為乜之外,最要命同最令人傷感嘅,係佢地好似話緊俾香港人知,未來香港係唔會再有 laughing 哥出現架喇!



後記: 昨晚(3月27日)看罷大結局,原來laughing哥只出現約5秒鐘,搵笨!

2009年3月25日

聞醫色變


打開報紙、電視看新聞,隨了是有關金融海嘯的報導之外,不難發現最常出現的新聞題目,總是那些層出不窮的香港醫療事故。

坦白講,我沒有理由要對香港的醫護人員存有偏見,不過,一些過往經歷過的負面經驗,的的確確留給了我頗深刻的陰影。

記得好久以前有一天半夜,君忽然感到很不舒服,於是我連忙帶她到急症室去求醫,等了好一陣子,終於見醫生了,可是,那位“醫生”總是手忙腳亂,慌慌張張,不時重複一些拉抽屜啊、找東找西啊、塗鴉啊等等無聊動作,很沒有信心似的。我心想:「死喇今舖,呢個新仔黎架!」我們還未來得及開口說病情,就見護仕拿著上一個病人的針藥卡跑來,很不屑地問那個“醫生”,說:「醫生,支針係唔係真係要打呢個份量先?會死人個播!」那個“醫生”再看一看針藥卡,說:「哦!咁牙,就將份量嘅小數點改前一格啦。」當晚,我和君當然走為上著啦!

又有一次,我在酒樓吃晚飯,不小心在洗手間滑倒,碰穿了頭,酒樓於是叫了白車,將我送去醫院。急症室給我照了X光片,再給“醫生”看過,“醫生”說我沒有大礙,但為安全計,最好留院觀察。我對“醫生”說:「Thank you 喇,我反正有醫療保險,要留院的話我當然會轉去私家醫院喇。」於是我連忙拿著剛剛照過的X光片,走去私家醫院去了。

私家醫生看一看我的X光片,再看一看我的傷口,便說:「你去照一照X光再講喇。」我滿是疑惑地問私家醫生:「政府醫院果張X光片係兩小時前拍既,何解現在又要照呢?會唔會好晒錢咁呢?」私家醫生對我說:「盲既都睇到你係跌傷個後尾枕啦,但係政府醫院果張X光片,係照你個額頭喎!明冇!?」

在私家醫院照過X光片後,發現頭骨有輕微裂痕,結果我要留醫四日!

2009年3月21日

也談內審


如果在十年八載之前問人甚麼是內審(Internal Audit),相信十居其九所得到的答案都是九唔搭八,不知所謂。近年隨著企業管治越來越受重視,內審好像忽然變得吃香起來似的,令到本來已經是很神秘的 Internal Auditor,越發加深更多的人對它產生好奇及興趣。

內審是甚麼?是企業管治的重要元素?抑或只是花瓶一個?是欽差大臣?還是狐假虎威?是在幫助企業運籌帷幄?或是專打小報告,損人而不利己?

儘管 Institute of Internal Auditors (IIA) 對內審已經有一個比較新的定義(註),我還是比較喜歡從前 Lawrence Sawyer 的說法,大意是內審所查所做的,本應是管理者的本份,只是他們沒有足夠的時間與技能去應付而矣。從前曾經聽過一位前輩對內審的解釋,當時以為他在耍我,現在越覺嗒落有味。他這樣說:「內審係要去睇d要去睇既野…」

內審跟一般會計師樓的年審不同,後者是財務審計,絕對是有版有眼,有紋有路的工作;而前者可以隨時千變萬化,無奇不有,並且往往更著重 business sense。

好些大會計師行都有專幫客戶做內審的部門,我也曾在那裡學過師,主觀地覺得它跟企業內部自家的內審,雖然性質相近,但骨子裡可以是兩碼子的事!

雖然現在越來越多公司有內審,但真不敢說每間公司都重視內審的功能。夠膽說,以前好些公司明言只當內審是花瓶,在會計師樓找位只懂財務審計的人胡渾充充,總之人有我有便算;不過聽說現在這現象已經漸漸在改善了。


(詮): http://www.theiia.org/guidance/standards-and-guidance/ippf/definition-of-internal-auditing/

2009年3月14日

童言無忌

不經意地翻看了晞晞的作文功課簿,竟然給我發現這個一年級的小朋友,原來有過一次好無奈的經歴!


日期:三月七日

題目:無論

作文內容:

今天,媽媽說:「你要到公園玩嗎?」

我說:「我要到公園玩。」

媽媽說:「你無論如何都要做完功課啊!」

2009年3月11日

呢個究竟係乜野嘅時代?

…人人見滙控跌得咁慘,自己都忍唔住激動起嚟。 真係估唔到滙控個價可以質到咁低,競價時段嘅亂局真係好離譜!
(09年3月11日,蘋果日報)

呢個究竟係乜野嘅時代?

原來係...大時代!!




PS: 各位秋官嘅 fans, 好快大家又會見番佢喇!!!
http://www.hkheadline.com/ent/ent_content.asp?track=news&contid=73651&srctype=n

後記: 事有湊巧,秋官新劇推出當日(3月30日),恒指暴跌336點。

2009年3月10日

匯控狂想曲

昨日四時十幾分係公司做做下野,朋友忽然係MSN 突發直擊報導話5號仔已經 $33喇,一睇,真係!我係一個滿有憐憫之心既人,當然第一時間即刻問佢有冇貨係手喇,佢話佢一早就 $150 放晒,條友仔原來四維搵人晒命。

今時今日,冇野係手既個個變晒股神,留低d仲有揸貨既俾人笑佢頭痕。

不久,另外又收到風話阿青姐俾匯控整喊咗,唔通真係應咗佢講果句,佢玩股,股玩佢?好辛苦先 search 到條 link 想第一時間睇下究竟發生咩事,點知上極都上唔到,勁塞車。

今早,Tony 居然因為自已曾經愛過匯控而自我剖白,認罪悔改。我諗,好似佢咁被情所傷既又豈只佢一人呢?

越來越覺得,呢個世界己經變到冇乜野話係唔可能發生架喇。

會唔會聽日忽然又有人話我知,匯豐已經被國有化呢?(我係指中國!)

會唔會匯豐印既港幣紅底,而家只值 $33呢?

又會唔會匯豐又好似今日咁忽然開記者會,話已經成功將股價變番 $150喇。(不過係5合1)

2009年3月5日

世情薄,人情惡...

今天的心情頗沉重,只因下午又收到有朋友忽然被裁的消息。曾幾何時,是令人羨慕的天之驕子,奈何世界逆轉,忽然英雄落難。

今天的心情很沉重,因曾有些所謂信耶穌的人這樣回應:「失業慘?老闆冇生意咪重慘!」今晚另有一個所謂基督徒又這樣說:「我不敢說 layoff 是好的決定,但看來企業似乎真的有需要…」

心中油然浮起唐琬的兩句詞句:「世情薄,人情惡,雨送黃昏花易落。」

2009年3月3日

山頂嘅朋友


昨晚放工準備步出公司前,跟同事搭訕:

我說:「5號仔今日叫人供股播,你話供唔供得過呢?」
同事即答:「供,我一於照供!」
我隨即問:「每手要嘔多成4千幾銀出黎播,by the way, 乜你手頭仲有貨咩?」
「係呀!」同事回答。
我好關心地再問多佢一句:「咁你幾錢入架?」
同事答:「百幾啦...」
我一時間唔知點回應,隨口衝出句:「哦,呢個價都唔係好耐之前啫。」
同事答:「係呀,Hold左佢冇耐啫。」
我說:「係牙。好喇,我放工先喇,拜拜!」

我心裡暗說:「山頂嘅朋友,再見喇!」