2010年9月27日

我的 iPad

終於都買了 iPad 的了。

自己對 iPad 的用處一直都定位在 eBook 的應用上,縱然有肥貓 SKII 的引誘,iPad 其他的功能對我來說其實都不是主要的賣點;反之,這個機器對我來說,正好給我更有效地去翻閱本身一些已電子化了的工具書。

不知是否是最近又有現貨供應的關係,這兩天忽然又發現牧師及好些朋友,都在差不多的時間內也擁有了 iPad。



2010年9月22日

中秋速寫

窗外天色仍是一片灰濛,昏昏暗暗;雖已止住了漫天風雨,但依然死氣沉沉,鬱鬱悶悶。今夜,想必不見晈晈明月,中秋氣氛難免失色。

回想兒時過中秋的確跟現在大不相同:當年住的是政府屋邨,門口是一道窄窄長長的冷巷,廊子起碼有一百公尺過外。每逢中秋前後,在那奉旨玩火的節日裡,這窄長冷巷定必佈滿細路,在地上、在牆上隨處插滿紅色小蠟燭,密密麻麻,火光處處。在各住家門口、在樓梯、在電梯大堂,一堆堆孩童三五成群,各有各燒,各有各玩!有人會燒燈籠,有人燒連環火柴頭,而我,最愛活煲金魚,好不過癮!

另一個好玩的地方是在屋邨公園裡,那處搞的一定是煲蠟,戲肉是走個牛王頭出來,對之射一泡尿,然後讓一個火球升上半空,勁!另一邊廂,大人擺的賞月陣容亦一點不失色,各家顯示各式生果與賀節食品,種類繁多,彷彿要鬥個你死我活!

俱往矣,離開所住過的屋邨已多年,今天中秋的一切,已今非昔比!

現在,孩子不會玩火的了,煲蠟更不必說!今年中秋,父親去了上海世博玩耍,弟弟在韓國工作又趕不及回來,母親大人決定把做節的日期押到月尾,因此,今天中秋氣氛難免失色。




當年今日:

2010年9月18日

謦欬

今天閒來無事,陪伴晞晞看兒童台,見到天賜爺爺教小朋友中文字,說「傾計」應該寫作「傾偈」,皆因此語的來源與佛偈有關。

我忽然心想,若天賜爺爺這樣花心機去教小朋友正寫「傾偈」的話,是否意味著小朋友有機會被容許去寫「傾偈」這詞呢?學校是否會承認「傾偈」是書面語,會被老師所接納的呢?

我的中文只有中五程度,因此好多中文字詞都不懂,唯獨好記得以前中文科老師確也有說過「傾計」一詞好古雅,不過記憶中他所說的有關來源典故,卻跟今天兒童台裡天賜爺爺所說的大相逕庭。

一時好奇,上維基去查個究竟,怎知原來粵語中常言的「傾計」,其實是應該寫作「謦欬」!此語原出自《[莊子]徐無鬼》:「昆弟親戚之謦欬」。我再到別處去找找,發現原來唐宋以來的文人,在作品中使用「謦欬」兩字的頻率頗高。

所謂不認識會給它嚇死,我想,若小朋友在作文功課中寫「謦欬」,相信多數有機會可蒙混過老師之關,例如:「這機器會發出好像『謦欬』般的聲音,十分奇怪。」反之,若孩子改為寫上「傾偈」一詞,則相信定會被扣分的了!



當年今日:
新年好

2010年9月17日

假冒為善?

曾經聽過朋友這樣地安慰過:

「作為基督徒,要求自己要切切實實地實踐信仰的本質,對事認真、對人赤誠悲憫,這是理所當然的,也是天公地道。然而,若用相同標準、相同的眼光去看待另一個基督徒,那只會是一廂情願,不切實際!」

多年來,在不同的教會間結識過很多很多不同的朋友,好多都曾令我對之無盡感激;當然,亦有人教我無限感慨。可幸我的教會一直都貫徹恩深情重,無論是自已是別人,在風光、患難中,都常見真情。

然而在教會圈混的日子久了,總碰過些平常說話冠冕堂皇,做事卻口是心非、對人見死不救的信徒,甚至是牧者。有些人抵不了因而離開教會,甚至從此不信;若果非信徒遇見之,則可能就此對這個信仰更加反感!這等人我也遇過,也曾痛心。

說甚麼人皆罪人各自修行不用上心?說甚麼凡事包容凡事接納凡事忍耐?我知!我也懂說!但坦白說,我功力有限,還未練就得到這上乘功夫,未去到這出神入化的境界。

然而我忽然問自已,我又是否處處可以俯仰無愧?事事可坦然站於天地之間?一時間,我無言.....

2010年9月16日

秋意

得到幾位 Blogger 友好的提醒,告知小弟先前剛換了不久的網誌 template,似乎有些問題,使得大家在登入時不夠暢順。有見及此,加上自己也覺秋天已至,因此索性再改換上一個富點秋意的外觀,好應應景。

四季之中,我最愛秋天:我愛它秋風送來,隱隱剌骨卻未至於抖震的微涼感覺;我愛秋意的肅剎沉郁,我愛空氣中充滿乾涸的味道,還有我愛那漫天只有蔚藍,卻沒有其他摻雜的明淨!然而,只可惜秋意苦短,如過眼雲煙,稍縱即逝。

2010年9月15日

新女傭

新請的菲傭可能下星期會到,她是否會是一個好幫手?我們和她是否可以互相適應得好?她可否如我們上一位菲傭一樣,令我們百份百安心,百份百信任?一切一切,現在此刻還是未知之數!

上一位菲傭由晞晞從產房出來時的一刻開始,就照顧他直到幼稚園畢業,本來我們打算以後再不用傭人的了,但最近因我和太太在時間協調上太過緊張,不得不要再找個幫手,以至我和太太,甚至晞晞都不用太過操勞。

以前的菲傭,是一位非常虔誠的基督徒,她的工作不算太標青,但是人品性格以及行為表現,都令我們信心十足,可放心讓她成為孩子在成長初期,除我們以外最親密的生活榜樣。本來我們打算請回她,但我的朋友那肯放人?

現在將會來的新菲傭是以前那舊菲傭在香港同一間教會的教友,我們也親身上過她們的教會,向她們的牧者查問過推薦。我和太太都覺得,新的傭人已經有著健康的教會支持網,再有牧者在品格上的牧養,在情緒上又應該有好好的疏導,再加上每次她放假時,我們都不需太擔心她去了甚麼地方、和怎樣的人一起、搞過了甚麼的勾當,因此,我們應該是有點放心的了,希望新的傭人是一位好合適的幫手吧!

2010年9月14日

暫時情人

估唔到講靚女呢個話題真係咁好寫,先兩篇開咗個頭,越講就越多記憶走番出嚟,真係有啲欲罷不能添!

CCTVB 啲是但劇,周不時都會有啲咁嘅無聊劇情,講個女角要求個男角暫時扮做佢嘅男朋友,幫佢過橋頂住一陣。誰不知,呢啲白癡嘢,真係發生過在我身上。

在我入行後嘅第一年,在 Annual Dinner 裡面忽然撞番某某 Auditee 公司中嘅一位會計部女同事,我當時從嗰間公司收咗 job 冇耐,所以當晚仲同佢哋有啲計傾。嗰位女仔好單刀直入咁同我講,可唔可以走嘅時間扮住佢男朋友,送佢番屋企。原來,佢部門有個核突佬(好記得叫做 Andy Lau!)一直好瘋狂咁追緊佢,當晚收到風條友仔會當眾向佢送花示愛添!因為個核突佬同佢係同一部門,如果搵自己人扮好易會穿煲,搵我的話,Andy Lau 反而會信咁囉!我睇佢係靚女份上,就免為其難應承咗佢喇。

當晚走嘅時間靚女好大力咁捉實我隻手臂,經過 Andy Lau 前面時仲貼埋塊面落我手瓜度添,坦白講,我冧到想死!爽個陳X希!連阿媽都唔認得!!

你可能會問,之後我同靚女有冇下文?答案係冇乜囉。同事、Client、Auditee 呢啲高危同埋手尾長嘅嘢,咪搞我!仲有,我當年信耶穌冇耐,好聽教會教架,揀女友,要留番俾基督徒姊妹先得嘛!


當年今日:
睇科騷 II

2010年9月13日

校花

上一篇講開中學時期嘅回憶,勾起小小少年時代嘅懷念,一時間,好多中學生活嘅往事又忽然湧上心頭,令人回味。

唔知係好彩抑或係唔好彩,我當年讀書嗰間中學係盛產靚女嘅。中四中五兩年,兩個連在附近啲學校都出埋名嘅校花都係同我一班,其中一個,仲係同我一齊係泳隊嘅成員添。

靚女嘅嘢,間中望吓真係可以令人神魂癲倒嘅。之但係,如果要日對夜對,俾你睇晒佢冇經修葺冇經掩飾嘅一面,咁又可能唔同講法喇。

其中一個校花,上堂嘅時間好鍾意恰眼瞓,成日都叉開對腳一 pat 野咁坐,每次打喊露又唔掩住個口,有次佢瞓到吊住條口水,見到真係想死。另一個就可能成日游水成日曬但又唔搽 lotion,搞到我成鬼日都係見住佢個甩皮樣!

中學畢咗業後幾年,有次我同幾個麻甩仔去行山,咁啱喺梅窩巴士站又撞番嗰個泳隊校花同學,佢當時同條仔一齊,見到我,佢由頭望到我落腳,再對住條仔,又由腳望番佢上頭,之後唔出聲,走開咗。班死仔就喺度陰陰笑!


當年今日:
睇科騷

2010年9月11日

木修羅

中五那年,她在學校低我一年級。

她樣子像極馬榮成筆下的“木修羅”,尤其是那似泣非泣的眼神,淚光點點,嬌喘微微;她還有一頭烏黑濃密的長髮,聘聘袅袅,閒靜似嬌花照水,行動如弱柳扶風。

緣如霧散,會考過後我轉了校,孓然一身,孤獨再上路。



英雄路遠掌聲近
莫問蒼生問星辰
天地有涯風有信
大海無量不見人

2010年9月8日

iPhone4 狂熱

估唔到 iPhone4 只係上市咗個零月,佢已經好快好快咁,由一件新穎嘅電子產品,急速地發展成為現在普羅大眾間必賺嘅投資項目,呢個究竟係乜嘢嘅世界?

在討論區,有人話從有得賣 iPhone4 第一日開始,上台即賣即賺。再到網上 Apple Store 用六張信用咭用不同 account,前前後後邊訂邊賣,到今日埋數,凈賺咗 $45,000,連埋兩年電話費連無限上網,自己都嚇到呆左。

我有朋友在 MSN 同我講,話佢至今已經賣咗好幾十部,連埋未送到嘅貨大約用咗幾十萬銀本錢咁上下。我照每部嘅 Profit Margin 在七至八月有 40% 至 50% 計算,我呢位朋友大大話話可能已經有十幾皮落咗袋,仲未計返緊嘅貨將會折現嗰啲 Unrealized Profit 添!

坦白講,似乎現在炒 iPhone4 比起炒股要好玩得多,除咗 Systematic Risk 點都係估佢唔到之外,一般嘅風險似乎都比較容易管理得到,例如理論上即使落咗單都可以退訂、真係等到送貨時先需要過數等等,而利好消息包括大陸年底前都未會有 iPhone4 上市、跟住又十一黃金週嘅強勁 Demand、白機遲遲都未出.....唔怪得搞到咁鬼瘋狂啦。

先幾日去先達放機,個場真係好感受到買賣兩家都喜氣洋洋嘅氣氛。我放兩部咁大把,個收買佬唔多點睇,一手交貨,一手即科錢。佢喺個褲袋度即拿一疊好厚嘅仟元鈔票出嚟,即刻數出十幾張塞俾我,爽快!!呢啲江湖大佬嘅豪氣真係好令人佩服!反之,我拿住啲銀紙張張都要捽下捽下(驚死佢係假),個大佬見我咁,笑我:「哥哥仔,人放機你放機,駛唔駛咁驚青呀?!」我不禁汗顏。


註:投資帶有風險,請在投資前請教有關的專業人仕,咨詢相關的專業意見。

2010年9月2日

也談菲律賓

今日,Bittermelon在佢篇《菲律賓警察》度,分享咗佢以前去菲律賓公幹時嘅有趣見聞。我見師兄佢寫得咁鬼過癮,一於唔執輸,又學吓人哋講吓以前去菲律賓出差時啲搞笑嘢。

經過先前香港旅行團在菲律賓嘅慘劇,相信大家都會同意,呢個國家所會發生嘅嘢,絕對可以係估佢唔到嘅。

喺好多年前,有次要去菲律賓一間工廠度做審計,當抵步去到廠門口嘅時間,忽然見到佢哋門口嘅大閘度,佈滿晒子彈窿,我未入去都心知不妙。當去到辦公室嘅時間,有關負責人同我哋講,Payroll 暫時唔方便俾我哋睇住,事關個Payroll Manager 同埋 HR Manager,剛剛在幾日前因加薪問題傾唔掂數,雙雙俾人打瓜咗,所以一時間冇人招呼我哋住。

當地啲同事叫我哋入黑後唔好自己去行街,你估佢用啲咩理由勸我哋?治安唔好?唔係!原來,佢話當地好多冤魂,夜晚好易撞嘢,仲話冇幾耐之前,就識人入黑行行吓街,在路口轉角位一轉過彎,咁就俾嘢上咗喇!你話,聽佢咁講,係咪會俾佢吹漲?

菲律賓警察俾我嘅感覺係個樣個個都好友善嘅。聽人講,佢哋友善到只要你喜歡,支警槍都可以賣埋俾你做記念品添!你信唔信?

又講番嗰次出差,因為安排上嘅問題,我係要一個人到機場自己返香港。點知一去到,冇耐就有位中國阿婆,用廣東話同我講嘢,仲叫我幫吓佢拎吓嘢,等佢過關時唔駛咁辛苦喎。我心諗:「我個樣雖然老實,但係我唔係蘿拔!」我問阿婆想我拎嗰箱係乜嚟?阿婆居然話係菲律賓香蕉喎!唉,佢居然呃我拎蕉!我點會咁天真咁傻上佢當呢?!

2010年9月1日

又是開學天


今天,九月一日,又是開學天!
昨晚,特意囑咐晞晞好好再去檢查一下暑期作業是否做妥?書包有否執好?校服有否準備好?.....昨晚孩子好興奮,因他好期待今天可以重回校園,再上學去。
今天一早,我再一次親自帶兒子上學去。這個年紀的小孩子是特別多說話的,打從在床上眼睛打開的一刻開始,直至去到學校門口,他都在不停地要跟我說話,問問題。我心想,好好享受孩子的嘮叨吧,此情此境,肯定總會有日一去不復返的。
下了車,過了幾條馬路,一直走到離校門不遠處接近同學視線範圍之外,他才開始死命地要甩掉我拖著他的手,我想,孩子待我算是不錯的了。
今天,我的心情好矛盾,一方面好想兒子早點自立,好好自己照顧自己;但又同時好婘戀這份親自照顧他的感覺。


當年今日:
開學了