 |
| 圖中司機正在高速公路邊午睡 |
神洲祖國，係一處即使無論去過幾多次，都唔可以經歷得晒佢可愛嘅地方！果種剌激好玩法，鑊鑊新奇，點都估佢唔到！！
四月某某天第一日：
剛剛抵埗，已經係中午十二點過咗少少喇，心知不妙，因為呢個係佢哋要午睡咁上下嘅時間，見到公路上啲司機都開始將車泊埋路邊搵地方瞓喇，入到去做嘢嘅地方，真係所有人都閃晒。
四月某某天第一晚：
其實我在番大陸之前已經病咗，所以我帶埋包藥上大陸食。我買咗個杯麵，諗住臨瞓前食完麵再食藥。我將啲熱水沖落個杯麵度之後，濃濃麵香伴隨一陣水蒸氣，隨即升到上天花板咁高，點知啲曱甴就咁樣從啲傢私背後處被引晒出嚟，我當時即刻想起電影長江七號中嘅某一幕.....四月某某天第二日半夜：
間睡房好多蚊，雖然我已被藥物影響至眼瞓到有鬼都唔理，奈何啲蚊在耳邊飛過嘅聲浪，真係同轟炸機差唔多，我係咁夷在自己身上拍死幾隻，再著燈睇睇，原來已經成手血，當然隨即想要走去厠所洗手喇，點知，有隻小強原來已經企咗喺個水龍頭把手度等緊我，心想：好彩記得著燈啫，否則又成手漿啦！
四月某某天第三日夜晚：
膽粗粗同個同事兩個叫咗架白牌車出去搵地方食晚飯，食完飯，在街邊見到有的士，諗住搭番做野嗰度，實無死啦，點知行下行下，個天都黑晒，車到去一個伸手不見五指嘅地方，個司機先話唔識路，佢老人家仲發老脾，話唔收錢費鬼事搵路，叫我地在公路邊落車喎，我隨即係咁猛呵佢，好彩最後都冇事。
