刮骨療毒

先排親子時間，我陪晞晞一齊睇故事書。本書係講神醫華陀嘅生平，書中當然有提到華陀替關公「刮骨療毒」呢一幕喇，故事自然發展就話關公點唔怕痛，佢老兄有幾咁英勇等等。

睇到呢度，我停低同晞晞講，我早前去針灸，醫師話佢嗰種醫術叫做針刀，似乎同華陀替關公「刮骨療毒」情景好相似播！

我形容俾晞晞知，個醫師當時首先用支好粗嘅針拮我個膊頭，拮咗好多嘢，之後就駁上電，電到我彈下彈下，攪到又麻又痺，十足好多好多昆蟲一齊爬嚟咬我隻手咁，然後，再用把針刀係咁插我個膊頭，拮咗入去不特止，仲要猛轉幾個圈都唔罷手，痛到我連啲血咇哂出嚟，唧到四維都係自己都唔知。個醫師跟住又用把針刀出力係咁刮我膊頭啲骨，我形住隱約好似聽到用指甲刮花玻璃咁嘅刺耳聲添。我當然痛到叫佢阿媽救命啦，但我始終都頂得住喎！

聽講針灸術都係由華陀發明過播，會唔會當年關公只係同我一樣，俾華陀用針刀術醫佢咋掛？會唔會係啲後人為咗奉承關公，將「刮骨療毒」呢件事作到大一大咁呢？