露營記

上星期，跟一大班麻甩佬去咗西貢露營；照記憶所及，露營係小弟仲係未成年嗰陣經常攪嘅玩意，不過，當年去camp仲冇今鋪咁單純，因為小弟細細個就唔再拒絕d女仔去一齊玩。照記憶所及，自小弟成年以後就再冇去過露營喇，仲好似從此以後，就已經靜靜地告別咗全佬期添！

今次同班佬玩露營，冇煙冇酒冇粗口，好清純好清純！一下子，嗰d已經埋藏係好深好深處，嗰d少年夢一般嘅清純感覺，浮下浮下咁浮咗出黎；突然間，我記起我嘅初戀，望住呢班佬，忽然間感覺軟、嫩、滑…..

太陽好快落山，四周隨即漆黑一片，又係玩營火會傾心事嘅時間。雖然有營火，但係d火時大時細，都仲係要靠支電筒照住個樣先見到對方，感覺就好似係卡拉OK嗰d娛樂場所度咁，有d唔慣！

縱然冇飲多兩杯，成班男人都好多嘢講，好多嘅故仔，好多教訓。不過唔知點解，係電光火石間，腦際時不時閃出一個好傳統嘅忠告：男人講嘅嘢千祈唔好信咁多，特別係d吹水場合….不過好快，我嘅理智即刻咁去糾正我自己千祈唔好咁諗，因為係我面前嘅呢班男人，確確實實係一班好好嘅佬！

好快又天光喇。照例，我一覺醒來，好快就唔記得自己做過同講過d嘢。但係，我就好懷念嗰晚，懷念嗰份坦然共對嘅經歷…..