中秋節

從來，中秋節都係個重要節日！

細路仔時代，中秋節係個奉旨嘅玩火日。當時一班屋邨小朋友，食完做節晚飯之後，就會急不及待地要走出屋邨走廊「玩燈籠」。比較乖嘅女仔，或者只會三五成群咁，挽住點著明火嘅燈籠行嚟行去；而一班牛王仔，就一定係痞喺人家嘅鐵閘門口，玩「煲蠟」、「煲金魚」、同埋將好多好多點著晒嘅蠟燭仔，插到四圍都係！現在回想，點解啲大人唔怕我哋燒咗佢哋間屋嘅呢？

到少年時代，中秋節就例牌要跟班同學一齊，夜嘛嘛去效野公園，燒野食玩通頂喇。記得有一年，一班男同學齊齊痾尿灌滿咗個玻璃樽，然後將佢放去啲火度燒，個樽最後爆開，噴出漫天尿蒸氣，卒之搞到自作自受！

到情竇初開，中秋節就變成要去長洲行行海灘，唱唱月半灣.....

現在，我珍惜中秋節係一個一家人一起團聚嘅日子。從前覺得食月餅可有可無，但現在卻覺得，幾代人一齊分享嘅月餅，原來好有味道。