淺談審計報告

假如有日去睇醫生，個醫生檢查呢樣檢查嗰樣，搞咗一大餐之後，最後只係同你講發現你發燒同埋流鼻水，仲有聽你講你好頭痛潻。結果開幾粒Panadol了事，你會有乜感覺？

你會唔會仍然好迷茫？究竟係中咗H1N1抑或只係好小事嘅傷風感冒？發燒同埋流鼻水唔駛佢講，你一早自己都知啦！無啦啦個頭勁痛究竟係咩原因？有冇隠疾？個醫生究竟有冇料到？

其實，好似以上差唔多樣嘅喺審計報告或者Management Letter，都唔係未見過！

理論上，審計報告中嘅內容應包含五個方面：

1) Nature of Observation:
在以上睇醫生嘅例子，作為Auditor，應該首先好清晰咁解釋究竟發生咗咩事，好似個醫生應直接話俾人知道，現在患嘅係乜嘢病。

2) Cause/Reason:
凡事總有前因後果。以上例子，發現發燒同埋流鼻水只係發現咗一啲好表面嘅「現象」，因乜事引致發燒流鼻水？頭痛係因為同發燒流鼻水有關？抑或係早前撞親個頭引致？

3) Effect/Impact:
又用番上面例子，正常人都會問：「咁我家吓係唔係大件事先？嚴唔嚴重？會唔會有其他乜嘢風險呀、危機呀等等？唔理佢會點？會唔會累街坊？出事機會大唔大？出事的話，可以有乜後果？.....」

4) Recommendation:
正常人又都會咁問：「咁我家吓點算好？」呢方面，不外乎係有關點樣善後同預防。但跟以上睇醫生例子有啲唔同，Auditor嘅初步建議未必一定係靈丹妙藥，因此，結合埋Auditee嘅實戰經驗，然後歸納出嚟嘅建議，往往更加具參考價值。

5) Auditee Comment:
Auditee要有say，呢點係最基本嘅尊重。Auditor講嘅發現究竟同意唔同意？總得要有所表示。仲有，將會點樣落實善後同預防呢？幾時搞呢？都要交待吓嘅。

以上形式嘅審計報告，多出現喺內審報告或者外審嘅Management Letter上。小弟自知能力有限，因此以上有關審計報告內容嘅介紹只係好粗淺嘅描述，目的只係想藉此介紹吓審計嘅產物而己。