2010年3月5日

講故仔

有次跟Andy老師打邊爐,在大家飲多咗兩杯之後,作故仔吹水之餘又講起女人.....

話說有條友叫摩西,佢係埃及嘅王子嚟(查實佢暗瓦底係希伯來血統,唔係埃及人,至於點解咁無厘頭,講故請唔好駁故)。

有日摩西冇乜嘢搞,諗住出去浦吓,點知撞正兩條友打交,一個係埃及人,另一個係希伯來人。摩西一向都想當希伯來人係自己友,所以就幫拖打瓜咗個埃及仔喇。

第二日,啲希伯來人又開拖,不過今次係自己人打自己人。摩西好好心咁諗住去排解吓,點知俾希伯來人寸番轉頭不特止,仲話要爆佢大鑊添!

法老王好快就知道咗呢兩件事,發悔氣話要殺咗摩西。不過,話到底摩西都係王子嚟,佢殺幾多個二打六都根本唔算得係乜嘢大件事,no big deal!法老嬲,實際係嬲佢性格反叛唔生性,嬲佢做事手指拗出唔拗入啫。其實摩西只要去氹番吓法老,應該就冇咩事。

但摩西選擇離家出走,因為佢有個解唔開嘅心結.....

摩西離家出走去到一個外地嘅地方叫做米甸,又遇到米甸人俾人蝦,摩西今次又出手相助,點知,米甸人就感激到要將個女嫁俾佢。從此,摩西甘於安身自己喺外人嘅地方。

之後,上帝呼召摩西去帶領希伯來人出埃及,摩西隨即耍手兼擰頭,事關摩西有個解唔開嘅心結.....

*******************************
當男人在外面面對街外嘅女姓,好多時都可以做到長袖善舞,手到拿來。只因行走江湖一些時日,總能夠參透到啲待人處世嘅祕技。嗰啲唔會上心嘅外人,又總係好懂得對自己好。

但,偏偏面對自己視為最親密最自已人嘅女人,卻總覺摸不著頭腦,永遠估佢唔到。

因為,自己女人看自己這個男人,不在乎 "What you are doing",而卻在乎so call: "What you are being." 然而,呢點真係好攞命。

14 則留言:

  1. >> 偏偏面對自己視為最親密最自已人嘅女人,卻總覺摸不著頭腦,永遠估佢唔到

    你唔係講你自己呀ma?

    我諗起個廣告.... 個老婆係老公面前 "花枝招展", 老公說 "nice bag" , "nice belt" 等等, 但老婆面口越來越黑, 最後拂袖而去.

    係架! 有時女人都幾鍾意玩猜謎遊戲, 特別是對往老公或男友, "持熟買熟"; 但男人當對住老婆或女友通常就會智力大減 (其實是不上心), 咁點會明女人既謎語呀!

    回覆刪除
  2. 肥貓:

    講我自已?No lar!

    我哋只係講緊我哋嘅發現啫。

    回覆刪除
  3. Re "偏偏面對自己視為最親密最自已人嘅女人,卻總覺摸不著頭腦,永遠估佢唔到"

    Then, so what? 估到會發達??

    估到的話可能少點新意喎~~ XD

    回覆刪除
  4. DeepC:

    估到會發達?? 咁又係!

    回覆刪除
  5. "偏偏面對自己視為最親密最自已人嘅女人,卻總覺摸不著頭腦,永遠估佢唔到" 呢一點真係完死好多男人!

    其實還有,有時侯與自己的女人一起的時候,就連跟她講一句溫馨的話也講不出,這是否太近,反而太遠? 熟不區禮,對方會不會以爲您老馮,到了忍無可忍的時候就會反枱,搞到大家無引?結婚多年,我都不懂處理,哈哈!

    回覆刪除
  6. 會計史丹利:

    哈哈,「太近,反而太遠」,好精警!

    回覆刪除
  7. 我係遠視o架嘛,所以成日都比人話對人地好過對自己,死未!

    回覆刪除
  8. 因為,自己女人看自己這個男人,不在乎 "What you are doing",而卻在乎so call: "What you are being." 然而,呢點真係好攞命。

    嘩!講中哂我心早想講既嘢^^

    回覆刪除
  9. 「太近,反而太遠」,令我想起臺灣作家九把刀講過「慢慢來,比較快」

    回覆刪除
  10. 史丹利:

    時運高,財唔到? 哈哈!

    回覆刪除