驚蟄之後

三月六日嗰日係驚蟄，按節氣，一班仲係喺冬眠狀態嘅牛鬼蛇神理應醒吓喇，係時候出返嚟走動吓喇。點知，說時遲，那時快，驚蟄嘅第二日又即刻凍番，今日仲係好鬼死凍嗰隻添。咁樣，按規矩要振作番吓嘅街坊朋友，又有大條道理龜縮番，set 番自己去 sleeping mode 喇！

今早，天寒地凍，我決定搭巴士返工，因為暖笠笠，搖吓搖吓，確係會好瞓一啲。

我明白，好多人都同我一樣，其實一直仲係冬眠緊。大家身體嘅機能係會差啲架喇，但係，就算點差都好，點都唔做得喺一部全密封嘅空調巴士入面放臭屁嘅！今早無聲無色地遇到呢啲突襲，又唔知係邊個做，架車又開唔到窗，毒氣又唔散，好想死！

好辛苦先捱到落車，隨即呼吸番幾口清新啲啲咁多嘅空氣。去到公司樓下，誰不知入咗部lift之後，門一關上，又再嚟過不明氣體恐怖襲擊，阿媽救命！