喪食

先兩日，同埋老婆跟人上中山諗住行吓，順便乘機食食乳鴿啫，點知同行班友仔搞到變咗做喪食團，一日食足九餐，差不多餐餐都食到成枱都係，家陣我都仲有啲驚！

最攞膽係夜晚剛剛食完乳鴒打邊爐，失驚無神，之後仲整多一大鍋乳鴿飯，雖然真係好惹味，但真係頂到上心口，為咗俾俾面，之後都哽多兩大碗。

食完晚飯十點上下，有妹妹仔話要唱 K，又有姐姐仔想去足浴，我當然支持去足浴啦，去到唱 K 又再食過咪死？！好彩，大家真係決定去足浴，去到只係食吓果碟啫，總算可以回一回氣。

大家足浴完事之後都夜晚十二點幾，我真係諗住番酒店瞓覺架喇，點知，有個姐姐仔話叫大家去宵夜喎，佢話：「外面得五度，我都專登叫到個 friend 嚟車大家去，依家人同車都喺樓下，唔食係唔係唔俾面先？」

我以為宵夜係去食吓夜粥啫，點知，我哋俾人車咗去間屠房，原來嗰度有間餐館嘅，姐姐仔個 friend 話，屠房夜晚劏豬嗰更剛剛十二點開始，我地可以食到即刻劏起嘅豬肉，時間啱啱好，極之新鮮！

結果，在震耳欲聾嘅豬被劏慘叫聲下，對住成枱唔同部位嘅豬肉同埋豬內臟，又再打多一次邊爐，真係好折墜！好核突！！

由於篇幅所限，以下只係第一日嘅喪食行程：

8:00am 在香港食早餐
12:00pm – 2:00pm 在中山飲茶（第一餐成枱都係）
2:00pm – 3:00pm 珍珠奶茶
3:00pm – 4:00pm High Tea：芝士蛋糕、雞翼薯條、蝦餅、鳳尾蝦、蘇皮龍蝦湯、咖啡...(成枱都係)
4:00pm – 5:00pm 雙皮奶、芝麻糊、燉蛋、蘿蔔糕、魚蛋... (成枱都係)
5:00pm – 6:00pm 麥當奴食雪糕、甜品
7:30pm – 9:30pm 晚飯：乳鴒火鍋宴 (成枱都係）
9:30pm – 12:00pm 足浴場食果碟

12:00am - 1:30am 屠場餐館食全豬宴火鍋宵夜(又成枱都係）

後記：今日返到香港，一打開 e-mail，全部係一個個 openrice 嘅 link ，原來另一班 friend 約今晚食和牛！阿媽，救命！！！