2011年2月24日

曾俊華好嘢!!

周星馳嘅電影之所以能成為經典,在於常常都能叫人估佢唔到,佢每每都係好意外地、在大家毫無心理準備下,令人產生出好震撼好入心入肺嘅效果。星爺係個天才,從前以為一定後無來者,點知,昨日終於俾我搵到個比星爺更叻嘅人,原來就係財爺!

去年,財爺曾俊華無啦啦派 foppy,已經開始令人刮目相看喇。昨日,佢整咗份財政預算案出嚟,呢位天才嘅功力,終於鋒芒畢露!

曾財爺今年發明咗招紓解民困嘅措施,大家真係估佢唔到。原來佢好大方咁大拿拿用咗二百四十億派錢俾香港市民江湖救急,大大話話每人有成六仟銀咁多添。之不過大家只可以等到幾十年退休之後,又或者在完全失去咗工作能力之時,先至准攞嚟駛。

當今差不多陷世界都活在通脹嘅水深火熱之中,特別係啲窮人就更加慘喇。財爺又諗咗一招估佢唔到嘅辦法,去幫助啲貧苦大眾對抗通脹,就係發明「通脹掛鈎債券」,俾啲窮人可以攞佢哋啲資本出嚟投資保值,對抗通脹之苦。但投資帶有風險,若果財爺因放債,結果蝕到阿媽都唔認得咁點算?唔怕,因為呢隻債券係保證讓窮人免去通脹之苦嘛,財爺蝕咗嗰啲,咪由有錢納稅嘅有錢人補貼番就得囉!財爺呢招刧「富」濟「貧」,認真高明。

財爺又對「低收入」人仕廣施恩惠,例如公屋免租兩個月、額外發放多一個月綜援等等。住緊公屋嘅先至算係「低收入」人仕,在財爺眼中,呢個硬道理,唔駛審都一定係啱架啦!至於嗰啲住板間房呀、執紙皮都死唔肯去攞綜援呀、搵朝唔得晚班友仔,曾司長覺得,佢哋有公屋唔鬼去住、有綜援唔去攞,有稅又唔駛佢地交,仲駛鬼理咩,抵佢哋死啦!

班八十後成日都話啲樓貴,其實曾財爺佢有做嘢架!佢在舊年都有出招為樓市降溫架,只不過係啲業主、發展商夾埋晒當佢冇到,個個企到個價硬一硬之嘛。嗱,曾司長今年咪俾到有成三千個中小型單位供應量咁大把囉,曾財爺實係諗,今次啲業主、發展商一定好驚好驚架喇!


當年今日:
有情飲水飽
四旬期

26 則留言:

  1. 若缺齋老人:

    政府入面人才濟濟,實在係市民嘅福氣!

    回覆刪除
  2. 像我們有反智的社會就會有如此這般的官員!

    回覆刪除
  3. the inner space:

    哈哈,好笑過星爺D戲^^

    回覆刪除
  4. 呵呵,講到應晒!

    咁嘅財爺,真係社會之仆!

    回覆刪除
  5. laulong:

    哈哈,你估班政客,知道份預算案咁同人民為敵,夠唔夠膽整番個苿梨花革命呢?^^

    回覆刪除
  6. 我對那個債卷很疑惑。窮人何來$去買?富人會否兼回報率低?不過最搞笑在昨夜論壇中有記者問財爺會否買一份,他回答說:要考慮一下先!

    回覆刪除
  7. Uncle Ray:
    窮人何來$去買? MPF囉!

    如果唔係點解釋到「政府有錢即係市民有錢」呢個超越邏輯o既理論。

    回覆刪除
  8. 前幾年政府都有退稅, 即係有份製造通漲喇!

    回覆刪除
  9. 我真係好想逐條逐條摵哂佢D鬚呀

    佢成日自己拍埋廣告,當自己明星,結果整D垃圾出嚟

    回覆刪除
  10. 卡臣:

    不如叫任總做財爺啦!

    回覆刪除
  11. 詩白爾:

    我地只係等閒之輩,係永遠冇曾財爺咁高智慧架喇:(

    回覆刪除
  12. 魔術師:

    由於可以睇到,曾財爺永遠忘記背後,努力面前囉:)

    回覆刪除
  13. naruto:

    查實,佢現在都燒晒鬚啦!

    回覆刪除
  14. Uncle Ray:

    曾財爺其實係一個老實人^^

    回覆刪除
  15. 由佢上任我就睇到佢幾"有料"到,
    所謂無期望就無失望,
    不過見到佢哩份所謂嘅"財政預算",
    我都係忍唔住要爆佢一句爛口:
    「廢柴,無料到就唔該彈開,你同你老細一樣咁x廢呀!」
    仲要攞幾十萬一個月人工,
    哩班人浪費哂我哋啲錢養到佢哋肚滿腸肥、腦生草呀,
    垃圾中嘅垃圾!

    回覆刪除
  16. 新鮮人:

    現在香港,真係百癈待興:(

    回覆刪除
  17. 百癈待興,好詞。
    食神妙語,真係估你唔到架。

    回覆刪除
  18. 鹿米館:

    估佢唔到先係高手呀!

    回覆刪除
  19. 本來對預算案無咩expectation, 不過一諗到佢咁益d fund 佬, 真係火都黎埋, 睇下班尊貴議員有咩攪作, 唔知可唔可以好似"交津"咁, 迫到佢要改.

    回覆刪除
  20. 肥貓:

    呢單嘢,有幾多議員係跟住真心走出嚟為民請命?有幾多係會借機騎劫個勢出位揾著數?我都好想乘機睇真D。

    回覆刪除
  21. 可能佢想一百萬人上街支持佢

    回覆刪除
  22. hkeric:

    呢隻鑊?我睇曾俊華佢唔好話點去補,大概點去背佢都未諗過?

    回覆刪除
  23. 佢可能(可能咋!)唔係壞人,但似乎係病人:見到咁形勢都咁堅持害人害物真係有病!

    回覆刪除
  24. 若缺齋老人:

    冇錯,曾財爺唔係壞人,佢只係有病,若判處佢監禁只會妨礙佢嘅治療進程,並且傷害其自尊!

    回覆刪除