驅魔十架

喺好耐以前，公司有班大隻講，一到lunch就喺度亂咁吹水，老作咸故，仲成日晒啲豔遇（查實係要俾錢先有果種），我當然話之你當佢冇到，一於唔搭咀罷就，之不過我又唔做得isolate佢地，因為咁樣只會俾人覺得冇品嗰個係我。但係喺班正淫君子面前做正人君子，若果冇啲智慧，一定會冇乜好結果。終於，班友仔一致地唔相信，點解我靚仔過佢地咁多，居然都會冇嘢分享？結果，佢地計劃要搵埋我去深圳做雀仔按摩。直覺話俾我知，佢地其實係冇乜點跑過大陸，係流嘅居多，九成只係想睇下我好驚個樣，然後笑吓我。

第二日，我頸度掛咗個十字架，係有耶穌個隻，佢地望住個十字架閃吓閃吓咁，個耶穌又好憂鬱咁望番佢地，佢地忽然察覺到少少，係度吹咸水好似係有啲好冇癮咁；之後，佢地即使話要搞乜攪搞物，都冇話要搵埋我喇。

我載嗰個十字架其實係叫做驅魔十架（The Crucifix Medal of St. Benedict)，聽講如果有人心術不正，或者根本就係牛鬼蛇神，望到佢應該會覺得好唔自在咁話喎。講真我係唔信呢味嘢嘅，不過，見親我嗰啲擺明係粉腸、扒街、敗類、人渣、賤精、壞蛋嘅朋友，唔知點解，佢地都會話我載個有耶穌嘅十字架係好唔啱嘅；相反，嗰啲我好尊敬嘅好人，又好出奇咁，冇一個話過唔順超我嗰個十字架播。

我從來都唔覺得十字架有耶穌冇耶穌有啲咩咁大不了，更加唔覺得我個十字架會有啲咩法力。是正是邪，存附於心！