元宵有感

君今天晚上要加班，我一個人，去了教會的元宵晚會，幫手擔擔抬抬。

晚會在教會的天台舉行，在節目開始後我就沒甚麼好做的了，我獨自躺在一角，欣賞天上一輪晈潔明月。

偶然，傳來了一闕歌聲，令我忽然好想念今天晚上不在身邊的她，好多以前經過了的回片段回憶，一下子都湧上了心頭。

曾經踏遍路途千萬里，途中跌倒過攀不起； 
無望的心感困累，全然交瘁，無助身軀早已沒有力氣。

徬徨中遇見熱誠的膀臂，人潮中碰倒你多驚喜， 

前路即使千尺浪，得你在身旁，縱使呼呼風雨仍覺甚美！ 

能在絕望孤單中偶然遇到你，是我根本不配受的福氣。 

來日禍困迎面，滿途挑戰，能贈我勇氣，完全是你。

（年月縱過去，未忘掉你）

Don't ask stupid question

有位小妹妹同事打咗個 MSN 俾我：

同事：我朋友(註：?)想考 CIA（註：即係Certified Internal Auditor）。
我：好事呀！
同事：係唔係要考 4 張 paper 架？去邊度買書同 past paper 呀？商務有冇？
我：商務？妳估妳仲係考緊會考咩？
同事：咁邊度呀？個試係點架？

我心諗，個試我九世前考個播，家陣變成點我都想知！

我：妳不如上網 search 吓啦。
同事：咁去邊先有資料呀？

其實我好有衝動想打：Google
但後尾我都係打咗：http://www.theiia.org/

財爺派 floppy

【明報專訊】每年財爺公布預算案時，都會就議員早前交嘅提問作出書面回應，聽落好似好貼心，但衰在今年嘅回應就儲存喺隻磁碟（floppy）度，喺而家呢個數碼年代，要搵部電腦可以讀到磁碟，真係唔容易，結果就玩死唔少議員！

＊＊＊＊＊＊＊＊＊＊＊＊＊＊＊＊

一隻 floppy 嘅像徵意義遠勝千言萬語！！

呢隻 floppy～～

代表好明白到學生喺電腦學習上嘅需要（例如 floppy）；

代表好明白香港市民，特別係年輕人嘅所想所求（例如 floppy）；

代表香港好需要高科技（例如 floppy）；

代表財爺好明白經濟（例如 Demand & Supply)；

代表財爺已經好清楚香港、以致世界嘅發展方向（例如用 floppy）；

代表財爺好懂得應付日新月異嘅經濟危機（派 floppy & 派糖)；

代表已經積極回應各階層嘅訴求（喺晒隻 floppy 度，咪話睇唔到喎）。

有情飲水飽？

早前鹿米館介紹咗以上嘅廣告俾我睇，之後，我同一班麻甩佬打邊爐，講開女人時又講開呢個廣告。

唔好理個廣告點解咁鬼死長同埋點樣無厘頭，從內容嚟睇佢的確有幾分討論價值，尤其當一班佬大家飲多咗兩杯之後，就更加多嘢講喇！

忽然有啲好奇，唔知啲妹妹仔睇完呢個廣告會覺得點呢？


當年今日：
四旬期

及弟粥

先幾日係正月初七「人日」，本來想去食番碗「及弟粥」應下節，點知當日走到入海皇，先發覺呢間嘢原來係冇「及弟粥」賣嘅，搞到我好鬼失望。之後，我一路都仲係心思思，總想完成我呢個心願。

今日，決定下大決心、排除萬難、不怕艱苦，點都要去食「及弟粥」架喇！終於，俾我搵到間兜兜踎踎，唔多起眼嘅粥舖，真係有「及弟粥」賣喎。於是乎我即刻走入去，揾到個喺厠所前面嘅位，立時 order 咗碗「及弟粥」。

等咗好耐碗粥先到，我見碗嘢熱辣辣，心諗：「有得食，等吓冇相干啦。」我搞吓搞吓碗粥，嘩！真係好多料，正！

食到一半，我咬住舊豬腸，個匙羹又撥住另一條豬腸，點知，條腸喺我嘅撫弄下，慢慢浮出一 pat 咖啡色嘅嘢出嚟，我愕咗一愕，點知舊去到我喉嚨椗嘅豬腸，立時跌咗落個胃度。

可能由於煲得太透，嗰 pat 咖啡色嘢喺啲粥水度浮咗一陣，即刻自動溶化。鳴鳴，我連要發爛渣都冇証據呀～～鳴鳴！！

也談 Flow-chart

今天讀到 Bittermelon 兄介紹畫 Flow-chart 的文章，一時間，忽然對 Flow-chart 這東西頗為感觸良多。

記得自己初入行的時候，公司的前輩們都是很著重做 Flow-chart的，而碰巧幾位以前分別來自不同大企業的前輩同事，都是習慣用附圖的那種 “Documentation Flow Diagram”，故此順理成章地，我對這種 Flow-chart 的接觸也較多。

自己覺得，Flow-chart 這東西真是各家各派，雖然有些人或會認為畫 Flow-chart 應該分為三大類：Documentation Flow；Data Flow 和 Process Flow。然而實戰上，我覺得並不是有好多人會分得這麼清楚。

老實說，我從來不覺得 Flow-chart 易畫！自問學了好些時日，問心也不覺自己畫得好。「求求其其」畫幾個 symbol 然後用些線連起來蒙混過關容易；能精密準確、陳陳相因、緊緊相連，如 tight 數般 tight 得準，level of detail 做到恰到好處，其實是相當考功夫的。記得自己以前曾在某 client 處見過他們的前 Auditor（德勤）給那 client 的一份 Flow-chart 真的有這般質數，自己對之讚嘆不已！

從前做審計，曾經很流行所謂 System Base Approach，而 Flow-chart 正正是用來勾畫一個 System 全貌的好工具，因此，畫 Flow-chart 曾經在審計工作上廣泛地被應用。然而，Flow-chart 有一個致命的弱點，就是要畫起來是頗費時間的，並且，有沒有 risk 的地方也要記錄下來，以使流程得以完整。隨著近年 Risk Base Approach 的流行，如果再去勾畫整個 System 的全貌，可以說是 over-audit，因此，近年 Flow-chart 開始不大流行了。

我覺得，Flow-chart 另一個致命的弱點，是除畫的那個人外，大部份人(特別是 Auditee)都不會認真看得明。亦因 Flow-chart 本來就是難畫，做的那個辛苦，Review 的那個眼花！

自己覺得，懂得畫 Flow-chart 總比不懂好，雖然這東西己慢慢不流行了。

人日

今天是農曆正月初七人日，根據中國傳統習俗，今日為眾人的生日。

在維基百科稍稍看看了這個傳統習俗的由來，發覺原來自己所知的不多！現轉錄如下好作分享（順便出多編偷懶的帖）：

人日亦稱為「人勝節」、「人慶節」、「七元節」、「人口日」及「人七日」。此節是中國古代比較重大的節日，但是今天在中國已經消亡，在日本還在流行。

根據漢代東方朔《占書》記載，農曆新年的首八天為人和不同畜牧作物的生日，依次序為「一雞，二狗，三豬，四羊，五牛，六馬，七人，八穀。」晉朝董勛《答問禮俗說》記載：「正月一日為雞，二日為狗，三日為豬，四日為羊，五日為牛，六日為馬，七日為人。」 故此，每年正月初一為雞的生日，初二為狗的生日，初三為豬的生日，初四為羊的生日，初五為牛的生日，初六為馬的生日，初七為人的生日，初八為穀的生日，接着，初九為天的生日，初十為地的生日。

傳說女媧創造蒼生，順序造出了雞狗豬羊牛馬等動物，並於第七天造出人來，故此初七為人的生日。

中國人通常會於農曆新年享用象微吉祥的食物，而人日當天會吃的有七菜羹或七菜粥、及第粥、麵線、盒子菜等。並會於庭院攤煎餅「熏天」。馬來西亞和新加坡華人則會以「七彩魚生」代替七菜羹。香港人喜愛吃及第粥。

目前，這項華人節日只有馬來西亞、新加坡之華裔同胞較為重視，每年農曆新年正月初七時，新馬華人都會大肆慶祝，在這天家家戶戶都會以「撈魚生」為主要當天的活動，一群人圍在一起鬨襄盛舉，討個好彩頭。至於中國大陸已經很少華人慶祝這樣的節日活動。但在廣東民眾仍普遍會記念正月初七為「人日」，春節假期也因此延續到年初七，初八才復工，有異於北方地區普遍初六復工。在大陸此節日雖無專門的慶祝活動，但此日作為一系列農歷「過年」（正月初一至正月十五）慶祝活動的一部分仍然以深刻的烙印與頑強的文化傳承存在於民間。比如在「人日子」洗頭，可以做針線活（其他日子則不允許）等，然而年年過年輩輩如此，如今國人卻已漸忘此日的意義與淵源。 台灣的華人從來都沒有慶祝這樣的華人節日。

據說漢代已有人日習俗，至魏晉後更開始被重視。古人會於人日當天戴上「人勝」(一種頭飾)，從晉朝開始有剪綵為花、剪綵為人，或鏤金箔為人來貼屏風，也戴在頭髮上。此外還有登高賦詩的習俗。唐代後，皇帝會賜彩縷、人勝及登高大宴群臣。若人日天氣晴朗，則主當年人口平安、出入順利。

人日當天亦有放花炮、煙花等習俗，故人日亦是火的生日。

由於新春不同的日子為不同動物的生日，故亦有習俗，禁止宰殺當天生日的動物；人日當天亦不會對囚犯用刑。

Source: 維基百科
(Icon source:http://news.xinhuanet.com/edu/2008-02/13/xinsrc_3120205130947157171609.jpg)

好凍

呢個星期都好凍，今早起身時得7-8度，聽講住荃灣嘅朋友仲慘，得5-6度添。天寒地凍最磨鍊人嘅事情，相信好多人都會同意，就係莫過於喺朝頭早張開眼嗰陣，意識剛剛番嚟嗰時，知道自己今日仲要番工嘅嗰一刻！如果身邊有重未放完年假嘅人喺度就仲慘！！嗰一刻，只係電光火石間嘅幾秒，已經可以測試到一個人嘅耐力、品格同堅忍度，平時點樣巴閉都係假，點樣面對苦難來臨，先至見到真章。

喺凍冰冰嘅日子，人係會我別容易肚餓嘅，加上過年嗰幾日食大咗個胃，我昨晚半夜卒之都忍唔住，要起身去摷野食；點知，今早過到起身嘅一關之後，即刻又嚟想勁食嘅誘惑，終於，忍到番公司樓下，都係要走去大快活食一份早餐之外，仲要另加多一客通粉。

番到公司，又有兩條友話番唔到嚟，我心諗，佢地真係有病！

我寂寞地上天文台網頁睇下，唔知點樣去咗前台長林超英個網誌度，嗰處大致係想話香港會冇冬天喎，我一時間覺得，今日有緣睇到呢篇野都算係個諷刺。

家陣仲係新正頭，雖然寒流好易令人懶洋洋，喺度都要講番兩句吉利嘅說話：

恭祝大家每日起身都朝氣勃勃，熱情如火！

神蹟

自己是浸信會會友，一向以來，教會的宗派傳統對好些神蹟奇事都不甚了了，而且，好多宣稱是神蹟醫治的例子，背後其實只是些騙人的千局。因此，據我所知，自己教會一般來說對一些所謂「神蹟」的發生，都會持相當嚴肅與保守的態度應對，這點我十分欣賞與認同，因為一不小心，便會無無謂謂地給一些另有用心者借機抽水。

以下所發生的事是真是假，是否「神蹟」，我想最好由讀者自行定奪，我也不敢說。

坐輪椅六年的邱慧詩姊妹經祈禱得醫治！

故事中的女主角我不認識，但多年來，眼見她坐著電動輪椅回教會參加祟拜，卻是千真萬確的事實。

過年時我回老家拜年飯聚，席間和叔父、妹妹、妹夫、父母等等一大班親人閒談間也說起以上的故事，我打趣的問老媽信不信有神蹟，她說信。我好奇地再問她有否真的見過所謂神蹟？她卻用好堅定的語氣對我說：「有！！」

我當時呆了一呆，老媽再說：「好多年前我曾經嘗試向上帝祈禱，求佢.....」

我問：「妳當年係唔係有個好唔生性嘅仔？」

老媽點頭不語.....

初四說道別

當大家見到我出呢個帖嘅時間，相信你哋都再見唔到我喇，請唔好驚訝，亦唔駛覺得突然。

我老婆大可以從此儘情在天寒地凍嘅日子，佔據整個暖笠笠嘅被窩，因為再唔會有人阻著佢瞓覺。

我個仔又可以不停咁撈電視汁，因為再冇人去阻止佢喇。

我嗰啲據稱食滯咗、凍親、心情唔靚、月經失調等等各種各種理由而唔能夠返工嘅好同事，佢地都唔會再有人煩著喇。

因為我已經離佢地而去，去咗一個好遠好遠嘅地方.....

去咗開工。

恭賀新禧

(source:http://www.rocsportslottery.com.tw/?p=13494)

天長地久

天長地久有時盡 寵幸綿綿無絕期

To my beloved wife...

墨寶

無可否認，對於藝術品嘅品評與鑑賞，絕對係一件好主觀、好憑個人感覺嘅事。就好似上圖呢幾件墨寶咁講，對於好多人嚟睇，佢地簡直係鬼五馬六、馬騮畫符兼且不知所謂！但對於極少數、極少數獨具眼光嘅人所見，呢幾幅墨寶查實係狂野中帶純真，柔弱中有粗獷，能夠喚起極少數、極少數人由心靈深處發出嘅嗰份驚喜，甚至可以觸動到凡夫俗子覺醒造物主造化奇妙偉大嗰種嘅驚訝.....

溫馨提示：

閱讀以上文字前，請自備嘔吐袋，多謝支持環保。

歲末有感

憶念今年歲首之初，見一眾兄弟患難同舟，彼此相扶猶似兩脇插刀，忠肝義膽顯正氣，浩然貫千秋！

原來當日之所以苦心志，勞筋骨，乃天降大任於斯人，以動心性，增益其所不能也。龍盤虎伏然後休養生息，今夕英雄並肩且再打拼，笑戰江湖中！

光陰荏苒，時日倥傯，年月一晃如彈指一揮間；轉瞬歲末，兄弟喜再相逢，願借一壺濁酒，醉看幾許秋月春風。

邊度都有陽光

最近，看過了陽光所重拍的經典廣告；一下子，好多少年時代的張狂回憶，忽然又再浮現...

這個廣告起碼有三代，而我最愛的，是93年那一個，那女孩子好天真好傻，好瘀但又好可愛。

當初相遇時回頭在笑

望著笑臉感覺像似首詩

每次見他將心意合成字句

偷偷的say"Hello"

如陽光 伴我 清新笑迎面

願照遍我心 自是每天快樂過

如陽光 伴我 心中更明亮

在細細說聲: "但願每天也望見"

陽光檸檬茶2010廣告 主唱: 馮曦妤


陽光檸檬茶廣告 (1993年) 女主角: 賴沅貞


陽光檸檬茶 - 鄭伊健 (87年).