及弟粥

先幾日係正月初七「人日」，本來想去食番碗「及弟粥」應下節，點知當日走到入海皇，先發覺呢間嘢原來係冇「及弟粥」賣嘅，搞到我好鬼失望。之後，我一路都仲係心思思，總想完成我呢個心願。

今日，決定下大決心、排除萬難、不怕艱苦，點都要去食「及弟粥」架喇！終於，俾我搵到間兜兜踎踎，唔多起眼嘅粥舖，真係有「及弟粥」賣喎。於是乎我即刻走入去，揾到個喺厠所前面嘅位，立時 order 咗碗「及弟粥」。

等咗好耐碗粥先到，我見碗嘢熱辣辣，心諗：「有得食，等吓冇相干啦。」我搞吓搞吓碗粥，嘩！真係好多料，正！

食到一半，我咬住舊豬腸，個匙羹又撥住另一條豬腸，點知，條腸喺我嘅撫弄下，慢慢浮出一 pat 咖啡色嘅嘢出嚟，我愕咗一愕，點知舊去到我喉嚨椗嘅豬腸，立時跌咗落個胃度。

可能由於煲得太透，嗰 pat 咖啡色嘢喺啲粥水度浮咗一陣，即刻自動溶化。鳴鳴，我連要發爛渣都冇証據呀～～鳴鳴！！