酒店旅館「唔乾淨」(下)

上回分享過一啲以前公幹時所住過嘅「唔乾淨」旅店，今回再講吓另外一個從前經歷過嘅故事啦。

話說好幾年前，有次我要去到大陸某處比較偏遠嘅地方出Job，同行嘅係一位香港靚女client。大陸果度，係靚女嘅公司喺大陸開設嘅廠房。靚女嘅公司都幾大，佢哋廠房有埋自設嘅招待所，我同靚女於是好自然地，被安排齊齊住喺嗰度喇。

嗰晚，我做嘢做到好夜，一個人返到房間，已經係非常之攰喇，入到房，卻發覺原來已經著咗燈，仲開埋電視添。之不過，間房好暗，就算開咗燈，都只係俾點洋燭光少少啫，個電視雖然係著咗，亦只得雪花，冇乜聲，冇嘢睇。

我於是走去沖涼房諗住沖涼喇，誰不知，開門入去一睇，原來又係有燈好似冇燈咁！

我沖緊涼嘅時間心諗，會唔會有人入過我間房呢？點知，出面真係好似有人正在我沖涼嘅時間，靜靜雞入咗嚟咁，我同自已講：「唔好心多，唔好胡思亂想！」

我從沖涼房出嚟，發覺一個人都冇，莫非有人剛剛入過嚟，之後又出番去？

我唔理咁多，熄燈熄電視然後瞓覺，點知，過咗冇耐，燈同電視又自己著番，我諗，梗係電制壞咗，我嬲起上嚟，抽起門口條 Key（即係拔走總制），打開窗算數，點知，一樣係燈同電視時著時熄！我唔理（因為太攰），過咗冇耐，一切又正常番喇。

第二日，我將晚上嘅經歷話番俾靚女 client 聽，佢花容失色咁同我講：「你昨晚咁大件事，做乜唔即刻搵我，等我同你轉去另一間房呀？」

事實上，當一個人做到超攰嘅時間，係好多嘢都唔識驚，好多嘢都唔識想架喇！