港童？

先排要上大陸去某國內單位度做嘢，碰啱某 Big-4 亦同一時間派員去同一地方做年審，因利乘便，國內單位安排咗佢哋個 term 同我哋同車前往。

起程當日，約好咗大家在皇崗去坐單位準備好接載我哋嘅專車。我同我同事準時到達，而兩位 Big-4 嘅朋友就遲到。個司機大佬好有責任感咁在大熱天時下四出走去搵人，終於在十五分鐘後搵到位小姐，佢話因為係第一次過皇崗，唔識路所以遲咗喎。我用眼神同我同事講：「吓！皇崗都唔識路？佢唔係未跑過大陸呀嘛？」之後我知原來呢位小姐係 FIC 嚟 (即係 Field in charge)。

大家都問另一位同事點呢？終於再三十分鍾後，見有條友著住條超低腰超低褲浪嘅賴屎褲，施施然咁行過嚟，佢眼神好似周杰倫，一上車，就一 pat 咁癱咗係個位度，粒聲唔出，十足周杰倫咁cool，而兩位仁兄仁姐全程都冇同同車嘅人打過招呼。

上到大陸，我收到風佢哋要在某日再去某地做 observation test，我好心問吓安排成點？佢哋好大安旨意咁話得架喇，我再問有冇搵有關啲單位領導打聲招呼，double confirm 呢？點知佢地好似嫌我煩咁。我心諗：「好！唔鬼理你！」我基於好奇，走去搵有關大陸佬吹吓水，點知佢話：「哈哈，係咩？！」終於，兩位仁兄仁姐“咁啱”遇到塞車，“咁啱”時間趕唔上，去到目的地“咁啱”冇法趕到 observation time。

又聽講佢地離開回港嘅時間都俾人寸。原來有關單位只能夠接載佢地去到最近嘅火車站，好等佢地自己搭火車番香港。點知佢地話：「吓，我哋唔識搭大陸火車個播！！」安排嘅人隨即講：「唔識咪學吓囉！」呢單笑料，好快就傳開晒喇。

好坦白講，我從來所遇過嘅 Auditor 都係醒醒目目，話頭醒尾嘅，以上所見嘅兩位八十後，相信只係極少數極少數嘅特別例子嚟嘅啫。