原創故事：蘋果的玄機

警告：以下故事，全屬虛構杜撰，懇請各位看官切勿信以為真！



維基百科圖片

話說有位仁兄名叫阿 Jobs，佢開咗間公司做生意，仲設計咗附圖嘅公司 logo。

睇阿 Jobs 個名，心水清嘅就知佢係猶太人。冇錯，阿 Jobs 係想運用佢哋祖先遺留落嚟嗰部“妥拉”（即係“摩西五經”）當中嘅賺錢祕技去運作佢間公司。但礙於阿 Jobs 天資有限，加上佢份人又懶，所以咁大本祕技，佢只係睇過第一卷書最前嗰兩三個 chapter 啫。

阿 Jobs 將佢所能領略到嘅玄機，通通收藏在公司嘅 logo 入面。

個 logo 係一個俾人偷食咗一啖嘅蘋果。原來，經書中有個咁嘅故仔：

耶和華神吩咐他說：園中各樣樹上的果子，你可以隨意吃，只是分別善惡樹上的果子，你不可吃，因為你吃的日子必定死！（創2:16-17）

蛇對女人說：你們不一定死；因為神知道，你們吃的日子眼睛就明亮了，你們便如神能知道善惡。於是女人見那棵樹的果子好作食物，也悅人的眼目，且是可喜愛的，能使人有智慧，就摘下果子來吃了，又給他丈夫，他丈夫也吃了。(創3:4-6)

阿 Jobs 照佢嘅理解，將產品設計成：

1) 扮到好唔想賣俾你（園中各樣樹上的果子，你可以隨意吃，只是分別善惡樹上的果子，你不可吃.....）
阿 Jobs 專登唔走大眾化路線，佢啲嘢唔係通街都買到，要同佢買嘢都麻鬼煩煩咁，又要預訂又要時不時缺貨，你同佢落到單都可以隨時被 cut 單；最近，阿 Jobs 仲玩埋唔准人買佢啲嘢添！

2) 產品扮到係智慧象徵（分別善惡樹上的果子）
佢啲產品包裝到用咗佢就會成個人變得叻晒 (intelligence)，所以通通都加個 "i " 字名。

3) 產品會俾人有種眼前一亮嘅感覺（你們吃的日子眼睛就明亮了）

4) 產品扮到係優越嘅象徵
睇唔睇到塊蘋果葉側向右面？原來，按照猶太傳統，右面係代表 Power & Virtue，所以，阿 Jobs 嘅產品吓吓都想令人揸喺手上可以扮到懶威咁。

5) 有引死女嘅功效（女人見那棵樹的果子好作食物，也悅人的眼目，且是可喜愛的）
最近有報導，原來用咗阿 Jobs 嘅產品，溝女會好易，性伴侶都多啲咁話。

6) 啲女要條仔買嚟送俾佢，仲要同埋佢一齊用（就摘下果子來吃了，又給他丈夫，他丈夫也吃了）

7) 一用佢嘅產品就必死喺阿 Jobs 手上（你吃的日子必定死）
只要一掂過阿 Jobs 嘅產品，例必不能自控，從此死心塌地。

你可能會問，非猶太人都睇聖經啦，亦即係都睇過“摩西五經”(“妥拉”），點解發現唔到祕技嘅？！答案咪係：睇嗰個唔係猶太人囉！