凍到抽筋

網上圖片

呢兩日忽然轉寒，不期然又令我記番起以前一啲凍到飛起嘅經歷。

小弟自幼家貧，細個邊有羽絨、GoreTex 呢啲咁暖嘅衫著吖，再加上以前住間公屋向正西北，到冬天就一定凍上加凍。但係又可能因為咁，從細開始凍慣，所以自己都算好捱得冷。

記得讀中四嗰年，學校唔知發咩瘟，去到成十一月咁上下先至嚟搞水運會，而嗰年天氣又有啲反常，凍得特別早，無啦啦就喺到正水運嗰日有冷風襲港，突然得番十幾度。

當年我參加咗拯溺隊，我同埋幾個隊員都俾 PE Sir 夾硬捉咗去落場參賽，仲要負責企埋喺池邊扮做 life-guard 添。老實講，天寒地凍仲要濕晒身企喺度食西北風，冇番咁上下生存意志就肯定死咗架喇，而當日，大家維持住唔怕凍死嘅信念係：一定要型仔，一定要引死女！！！

為著呢個信念，我哋好自然只係報蝶泳呢個項目啦，而落場果時，大家由跳台落水至到終點，都係游得有咁優美得咁優美，有咁型仔得咁型仔！而細老我，因為冇學其他人扭咁多屎忽花，自然會游得快人哋少少，結果，無啦啦攞咗獎，我望住看台上班女同學，幻想佢地對我好仰慕咁，哈哈，凍死都抵！





後記：
嗰日水運會，其實係我第一次經歷凍到抽筋究竟係乜嘢嘅一回事。