2011年1月22日

啃唔落

本文寫於一月十八日,因在國內翻牆不成功,無法即時上載至Blogger,只好留待到今天才發表。
一向以為,自已在大陸都食過唔少古靈精怪嘅嘢架啦,出得嚟行,睇怕都唔會有啲乜嘢能夠嚇得到我,叫我唔敢食喇掛?!誰不知,今鋪先發覺原來小弟一向實在太睇高自己,太睇小大陸呢個地方,太睇低住喺呢度啲陀地,罪過!罪過!
昨晚,俾位在國內做駐場嘅「港人」請我去食「地道好嘢」。下班後,司機車我去酒店 check-in 然後再去食店同「港人」會合,不幸地,間食店實在太偏僻喇,連個司機都迷咗路,要逆線行車行咗成條街先到,最後,發現間食店原來坐落在一個黑鬼掹掹、污糟邋遢、塵土飛揚,四周都係汽修站嘅地方。
一坐低,個「港人」猛咁講嗰度啲雞正,一定要叫嚟試吓咁話。點知,啲雞嚟到放上枱,原來係又老又鞋,又有幾件仍係帶住血嘅。我問個「港人」隻雞點正法?佢話間店放晒啲雞出去走地,係真正嘅走地雞。我心諗:「妖!放啲雞出條街度,唔係叫走地,係叫做企街!仲有,班雞成日在汽修站附近四維浦,佢哋即係食汽油同埋食金屬大架啦,咁嘅雞,點啃呀?」
接住,又上多碟豬油浸菜心。肥騰騰嘅菜撈埋好多好多豬油渣,又肥又老又黃。我又諗:「你雖然見我咁精壯啫,都唔等於我一定頂得順架嘛?!哥哥仔,點解你偏係喜歡咁 heavy 嘅菜呢?你想死唔好叫我陪埋你好喎!!」
最最攞命,係臨尾上嗰碟生炒豬粉腸!一碌碌肥腸條條硬掘掘,漲卜卜,清清楚楚可以見到係有晒料到嘅,皆因件件腸頭都咇咗啲咖啡色嘅嘢出嚟,好變態,好反胃,真係睇見都想作嘔!!

「大佬,你因乜解救仲可以將條粉腸放得入口,吞得落肚架?」

24 則留言:

  1. 點解d人搵美食咁唔合常識智慧? 上次去屠房隔離食豬, 已經唔好. 新鮮豬肉唔容易林, 又唔知有無衛生檢查.

    回覆刪除
  2. 點解我覺得Ebenezer你喺度寫緊黃嘢呢?/!

    回覆刪除
  3. 原來你出咗 trip,怪不得最近不見你踪影(留言)啦!

    最後果碟,我初頭睇以為你話豬賜粉,睇清楚原來係粉腸!好核突呀,你有冇食到?

    回覆刪除
  4. 「港人」全被同化左喎。

    叫雞都有咁多學問既?哈哈哈哈。

    回覆刪除
  5. 唔係正嘢啦, 可多只可說有地方特色.

    正嘢唔一定山珍海味, 但講究或認真製作.

    回覆刪除
  6. 嘩!咁你有冇食呀?
    大陸咁多好嘢食,點解揀果度!

    回覆刪除
  7. 有料嘅豬腸,諗起食神嘅karen:)

    回覆刪除
  8. haode2010:

    國內千奇百怪,咁先叫做有趣嘛,哈哈^^

    回覆刪除
  9. SKII:

    係呀,我又上大陸喇:)

    最後果碟,我一舊都冇食,唔俾面都係咁話!

    回覆刪除
  10. 鹿米館:

    係食雞,你打錯字喇:)

    回覆刪除
  11. DeepC:

    妳講得好啱!正嘢唔一定要係山珍海味, 但要講究或認真製作。

    幾日前有班大陸佬帶我去廣州去食農家菜,碟燒排骨正到一流,就係講究同埋認真製作囉!

    回覆刪除
  12. Coffee n Tea:

    點解揀果度?我都係俾人帶去架咋:(

    回覆刪除
  13. naruto:

    係呀,我都諗起 Karen 唱著:誓要去,入刀山.....

    回覆刪除
  14. 你講嗰個"港人"係咪精神有問題架?
    食屎都係正嘅?

    回覆刪除
  15. 頂最後一野先絕!我少食內臟,對大腸尤其洗唔淨既大腸天係避之則吉! XD

    btw老兄同我貼左廣告未呀?

    回覆刪除
  16. 有啲人食嘢係咁架,唔撩 nung 唔食,咁顯出佢品味唔同嘛!

    但無論點,內臟,真係要少食為妙!

    回覆刪除
  17. 新鮮人 提到...

    你講嗰個"港人"係咪精神有問題架?
    食屎都係正嘅?
    2011年1月23日上午01:15:00

    新鮮人, 我很不喜歡你在這裡提什麼精神有問題, 我很討厭這個話題.

    回覆刪除
  18. 新鮮人:

    我諗佢苦悶到上晒腦囉,哈哈^^

    回覆刪除
  19. 若缺齋老人:

    鍾意食洗唔淨既大腸,呢個口味真係出眾!!

    btw,駛唔駛貼晒全港教會咁呢,請問^^

    回覆刪除
  20. laulong:

    有 taste 屎,係唔同d架=_=!!

    回覆刪除
  21. Uncle Ray:

    即係拿些廁紙,將在口度d野"吻"左去?

    回覆刪除