一個人在廟街

今晚放工嗰陣好冇mood（唔知係唔係作病？）；望吓隻錶，“咦！花花地喎，不如去老廟磨磨佢好喎。”心諗 “橫掂都好耐冇行過老廟啦！”於是就咁一個人去咗廟街。

我載緊嗰隻蛋係 Rolex 白鋼 Oysterdate （之前嗰隻係唉呀King 〔Air King〕)。千祈唔好以為只有d有錢人先載撈，咁樣諗其實係好唔啱嘅；喺我老竇嗰個年代， d地盆佬差不多都有載撈。（勞力士個名唔知係唔係咁嚟？）草根階層其實都有佢地一套獨有嘅載撈文化，而其中一個體現呢種草根載撈文化嘅地方就係廟街。細個嗰陣，記得老竇帶我行老廟都見過有幾檔賣二手撈嘅檔口，（依家就唔知仲有冇喇），而當中仍然存留至今嘅，就係我今晚要搵，老竇講可能係香港最後一個，亦係最好一個嘅專業磨撈人！

我依家隻撈係我老竇送俾我嘅，除咗我已經收埋咗好耐嗰一口流利嘅粗口之外，就係勞力士時刻提醒我自己係出身草根，佢地代表住老竇留俾我嘅傳承…我諗我一路都會載撈，希望我個仔第日都係。

今晚等咗好耐都唔見個磨撈人，之後先知佢今日休息。唉！緣慳一面！本來又想試吓文明里附近檔煲仔飯，不過今日好似病病地，食d咁污糟嘅嘢怕會出事，都係唔食算罷喇。