2009年4月1日

麻婆島

最近,有關「港女」嘅討論熱熱烘烘,鬼咁熱鬧。不過講真,可能係由於物以類聚嘅緣故,小弟真係唔多識到d麻麻煩煩、睇人唔起又貪慕虛榮嘅「港女」;相反,一向認識到嘅女性朋友,好多都係好有愛心、好賢良淑德咁嘅,可能佢地通通都係返開教會架喇。

提起教會,算係小弟真正第一次俾人點咗去嘅,係一間位於石硤尾街市隔離,一棟舊唐樓樓上嘅二樓教會。好記得當年初初去到呢個地方,第一個好想問嘅問題係:「點解呢處有咁多女仔嘅?」當年好清純嘅我,一開始就已經好清晰咁知道,去教會係要去認識信仰,所以我係完完全全唔會、一定無可能、絕對絕對不會對呢班姊妹有半點非份之想!一dd都唔會!!

呢間教會嘅人真係好好架,我返咗冇耐啫,佢地就即刻搞咗次遊船河,好熱情咁要我一定要參加喇。我一上到船,我就受盡熱情款待,印象最深嘅,係一位姊妹好熱切嘅笑口淫淫樣。我由船頭走到去船尾,船尾走番去船頭,來來回回好多好多次,呢位姊妹都係咁跟到我實。我望住個海,架船喺海中心,發覺我其實冇乜地方好走,於是我再由船頭走去船尾,船尾走番去船頭,來來回回。

又有一次,團契完咗後一大班人齊齊食晚飯,之後差不多九點幾十點,個團長話夜喎,由佢指派咗我要送一個姊妹返屋企,我都好同意做男人要有義務同風度,因此我就義不容辭喇。當晚,果個姊妹帶咗我去搭地鐵,喺鑽石山站出,佢話佢屋企要行一陣先到嘅,我跟住佢行,佢又行得慢,條路黑鬼麻麻,一陣又要穿過公園,一陣又話整路要兜來兜去,左穿右插,最後我先至發現,原來佢係住喺黃大仙地鐵站-->樓上!我當時先知道:中伏!!

4 則留言:

  1. 點解我返咗十幾廿年教會同團契,團契長都唔指派我送任何一個姊妹返屋企,唔通信我唔過?

    回覆刪除
  2. 馬沙兄:

    我諗應該唔關信唔信得過你嘅問題。會唔會係因為你個團契長知道,d姊妹根本冇乜特別嘅「需要」呢?

    回覆刪除
  3. Haha,好想知道最後你和那位姊妹的結果如何?

    回覆刪除
  4. 結果?結果冇耐後我轉咗去另一間教會,驚驚!

    回覆刪除