色誘 Auditor

話說上文提到果間要做 Social Compliance Audit 嘅工廠，個台灣佬廠長心知不妙，佢竟然諗咗條屎橋去應付我呢個 Auditor。

個廠長懶熱情咁同我講，話即晚既酒店同埋晚飯已經 book 好晒喇，工廠一下班就即刻載我坐車去酒店食飯，佢就行先去酒店準備一下。結果，個司機車左我去附近一間４星酒店，我落車之後先至知道，原來當晚食飯既地方，係酒店既卡拉OK。我入到間卡拉OK大房，見到個廠長已經攬實兩個十五六歲嘅小妹妹，仲揸緊佢地。個台灣佬見到我，笑口淫淫咁話：「你隨便點甚麼吧，今晚我請客！」我即答：「我點些吃的就可以喇。」台灣佬轉頭指示服務員，即刻，一排六至七位小姐走左入黎，一字型咁企係我面前。我對台灣佬講：「No, thank you 喇」。「不合意？」台灣佬說，連隨又另一排六至七位小姐入黎展示係我面前。我搖頭，個台灣佬話：「廣東姑娘，同聲同氣好不好？」即刻又另一排六至七位小姐企係我面前，我心諗，呢度都算係窮鄉僻壤，但竟然有咁多女，佩服、佩服！一時間，我有d覺得自己好似韋小寶，我稍稍回一回魂，竟然發現我左右兩旁已經坐咗兩位小姐喇。台灣佬說：「她們陪你上房也可以。」

個台灣佬開始攪番果兩位小妹妹，我望著佢，腦裡面出現番份 Audit Program, 我即時幻想在刻薄童工果欄度猛咁 tick。然後，我好決絕咁企起身，同台灣佬講：「多謝你的晚飯，我要自己回房，繼續寫我的 report喇。」點知條友仔仲唔識死，夾硬質咗一堆白頭單俾我！


後話：聽講 Report 出街後冇耐，果個台灣佬俾佢公司炒左。