放榜隨想曲

今日又係中學會考放榜日，例牌動作係傳媒會先去訪問吓啲十A九A嘅所謂「狀元」，俾佢地攞攞彩，訓勉吓d後輩；然後即時又影下啲咸苦咸忽嘅失敗者對比一下，跟住就會睇吓啲同學點樣徬徨點樣四處撲學校。到夜晚又例牌地搵人教大家點樣安慰考試失敗者嘅心情。呢個程序年年如是，往返無間。

坦白講，我雖然好替嗰啲十A九A生高興，但講到佢地係「狀元」，我覺得真係有啲過份抬擧，始終，佢地叻極都仲係只得中五程度，雖然佢地係中段排位賽贏到出嚟，但學習路途其實仲係前路漫漫，咁早就封個冇乜實用價值嘅「虛朵」俾佢地，萬一搞到同學變咗驕傲晒就好唔好喇。

又講吓嗰啲考試失敗者，失敗原因縱然個個唔同，但始終都係老套嗰句，中學會考衰咗係唔駛死嘅！眼看現今好多相識嘅英雄豪傑，佢地當年會考都試過甩腳，而家，佢地咪又一條條好漢咁，一身靚朵咁出嚟行！！不過又話歸轉頭，專業資格算不得甚麼，PhD也算不得甚麼，做人個格好同埋要有品先至係最重要。

會考放榜日是苦是甜，畢竟都係每一個人喺人生經歷裡面，好獨特好獨特嘅回憶，好值得好好去珍惜，好好去保守。記得自己當年喺會考放榜日，跟兩位女同學一起去撲學校，雖然當日好熱好辛苦，但係感受到同學間互相扶持互相鼓勵，當日心中嗰份溫暖，嗰份甘甜，今日仲係好回味。