酒肉朋友

上星期六，忽然接到朋友電話，原來佢當時喺醫院嘅手術室門口，正等緊入去照MRI，佢話佢有啲擔心，唔知自已會有乜嘢事，又話佢好虧欠只係新婚咗幾個月嘅老婆…我心諗，條友仔有事嘅時候先會搵吓我，佢總算都當我係朋友。

前晚，應該係我朋友檢查完嘅放榜日子，君叫我主動打電話去問吓佢嘅結果係點，我冇咁樣做，因為如果佢嘅結果係好嘅，佢自自然然會揾我講，但假如佢真係患咗絕症，我即時搵佢咪只會攪到我同佢兩個佬玩相對無言，一個唔小心，萬一攪喊埋佢咪痾拔甩？

昨日一早，我喺MSN度見到我朋友，佢話醫生同佢講只係佢太大壓力，以致身體作出啲唔正常反應啫，佢聽咗之後一身鬆晒，啲病徵又好似冇晒咁話。我即刻同佢講，要賀賀佢，仲要大杯酒、大塊肉！

終於，昨晚去咗間德國餐廳，食大大隻豬手，大大碌香腸，一人搓著成lite啤酒係咁對，正！食飽咗些小，另一個friend教完夜校即刻飛的出嚟加入，見佢咁有義氣，大家再整多一lite再隊過，爽！