2010年2月19日

好凍

呢個星期都好凍,今早起身時得7-8度,聽講住荃灣嘅朋友仲慘,得5-6度添。天寒地凍最磨鍊人嘅事情,相信好多人都會同意,就係莫過於喺朝頭早張開眼嗰陣,意識剛剛番嚟嗰時,知道自己今日仲要番工嘅嗰一刻!如果身邊有重未放完年假嘅人喺度就仲慘!!嗰一刻,只係電光火石間嘅幾秒,已經可以測試到一個人嘅耐力、品格同堅忍度,平時點樣巴閉都係假,點樣面對苦難來臨,先至見到真章。

喺凍冰冰嘅日子,人係會我別容易肚餓嘅,加上過年嗰幾日食大咗個胃,我昨晚半夜卒之都忍唔住,要起身去摷野食;點知,今早過到起身嘅一關之後,即刻又嚟想勁食嘅誘惑,終於,忍到番公司樓下,都係要走去大快活食一份早餐之外,仲要另加多一客通粉。

番到公司,又有兩條友話番唔到嚟,我心諗,佢地真係有病!

我寂寞地上天文台網頁睇下,唔知點樣去咗前台長林超英個網誌度,嗰處大致係想話香港會冇冬天喎,我一時間覺得,今日有緣睇到呢篇野都算係個諷刺。

家陣仲係新正頭,雖然寒流好易令人懶洋洋,喺度都要講番兩句吉利嘅說話:

恭祝大家每日起身都朝氣勃勃,熱情如火!

10 則留言:

  1. 少少凍唔會影響到什麼的,
    外國凍天雪地都是咁過,
    起不了床只是人的惰性問題!

    回覆刪除
  2. 半夜凍成咁你都可以起身去摷野食,真係服得你交關!

    回覆刪除
  3. 新鮮人:

    對!少少苦楚等於激勵呀嘛。

    回覆刪除
  4. xiao zhu:

    我諗我真係食懞咗。

    回覆刪除
  5. 我記得03年一月一日得四度, 果年十度左右既天氣仲持續至三月底; 仲有,剛剛才發現噴氣時有少少霞氣, 但以前細個時逢冬天都有。

    所以, 我真係信林超英講ka, 只不過我地太耐冇凍過, 才覺得8度好凍!

    回覆刪除
  6. 篤撐:

    係呀,我都記得細個嗰陣凍好多,四、五度係司空見慣。

    回覆刪除
  7. 嘿嘿:

    生活在熱帶嘅朋友,氣溫得8度係唔係嚇親你呢?hehe^^

    回覆刪除
  8. 唔知點解,今年比以往記憶中凍得多,是寒風入骨那一種。

    回覆刪除
  9. uncleray:

    可能先兩年仲係血氣方剛,所以先唔覺得凍啫。

    回覆刪除