2010年2月23日

及弟粥

先幾日係正月初七「人日」,本來想去食番碗「及弟粥」應下節,點知當日走到入海皇,先發覺呢間嘢原來係冇「及弟粥」賣嘅,搞到我好鬼失望。之後,我一路都仲係心思思,總想完成我呢個心願。

今日,決定下大決心、排除萬難、不怕艱苦,點都要去食「及弟粥」架喇!終於,俾我搵到間兜兜踎踎,唔多起眼嘅粥舖,真係有「及弟粥」賣喎。於是乎我即刻走入去,揾到個喺厠所前面嘅位,立時 order 咗碗「及弟粥」。

等咗好耐碗粥先到,我見碗嘢熱辣辣,心諗:「有得食,等吓冇相干啦。」我搞吓搞吓碗粥,嘩!真係好多料,正!

食到一半,我咬住舊豬腸,個匙羹又撥住另一條豬腸,點知,條腸喺我嘅撫弄下,慢慢浮出一 pat 咖啡色嘅嘢出嚟,我愕咗一愕,點知舊去到我喉嚨椗嘅豬腸,立時跌咗落個胃度。

可能由於煲得太透,嗰 pat 咖啡色嘢喺啲粥水度浮咗一陣,即刻自動溶化。鳴鳴,我連要發爛渣都冇証據呀~~鳴鳴!!

20 則留言:

  1. >> 慢慢浮出一 pat 咖啡色嘅嘢出嚟,

    好驚嚇吓喎?

    所以我食牛雜一定會"走腸"!!!

    回覆刪除
  2. 肥貓:

    嗚嗚...我嘅心靈已經受創。

    回覆刪除
  3. 食埋d咁既野, 預左啦. 所以, 我由細到大都唔食d乜腸物腸既.

    回覆刪除
  4. 舞了:

    我以後唔敢喇...嗚嗚嗚

    回覆刪除
  5. 其妙在佢蕓花一現咁一見即散...緣份也緣份也!

    回覆刪除
  6. the8:

    唉,嗰份絕對係孽緣喇!

    回覆刪除
  7. arrgggg.....好彩我唔鐘意食及弟粥....

    回覆刪除
  8. 真係好驚嚇喎....

    我都不敢吃腸的...

    回覆刪除
  9. 明年就学捞“七彩鱼生”吧!

    哈哈哈~~~

    回覆刪除
  10. 人生難得幾回尋,
    你真係"好好運"喎!

    回覆刪除
  11. 唔駛傷心,介紹你兩個吃"及第粥"的好地方.

    上環生記
    中環羅富記(皇后大道中嗰一間)

    ^^

    回覆刪除
  12. 鄧善之:

    係呀,真係好得人驚!!

    回覆刪除
  13. 嘿嘿:

    其實我都想架,可惜香港唔多興撈七彩魚生,都唔知去邊度搵嚟食?

    回覆刪除
  14. 新鮮人:

    係呀,算係攞個意頭咁喇!

    回覆刪除
  15. Bittermelon:

    師兄,多謝介紹。But,我諗我有排都唔會去食住。

    回覆刪除
  16. 啡色嘅至係精華所在, 你唔識食嘢喇!

    回覆刪除
  17. 匿名:

    吓!乜你好果味嘢嘅咩?

    回覆刪除