2010年7月24日

夏令會

上一篇講開啲疑似鬼靈精怪嘢,唔講由是可,一講開就好似覺得有啲意猶未盡咁,諗吓諗吓又想整多篇,希望唔好悶親大家喇。

話說小弟初初第一次俾人呃咗返去嘅教會,係一間位於深水埗嘅二樓教會嚟,我當時好單純無知,唔知道嗰間嘢原來係三山五嶽乜鬼嘢人都有。

有次間教會搞咗個夏令會,我諗住只係一班少男少女維威喂嘅活動,冇諗過就應承咗去,點知,晚晚啲人都唔知去咗邊,惟有自己一個人一就早上床瞓覺,十分冇癮。後尾好耐再提番呢單嘢,先知道原來當其時有位姊妹,因為揩咗污糟嘢先番教會嘅,佢一到夜晚就上身,當時由於我係新仔,唔駛去幫拖做嘢,好彩、好彩!!

過咗好耐,我輾轉去到我現在呢間教會,喺幾年前,又有機會去夏令會喇。

夏令會通常有一個大家都好鍾意嘅環節,就係一班少男少女唔願瞓,大家夜嘛嘛圍埋喺間房度一起傾心事。當晚,有一位剛剛返教會嘅女仔,佢係新人,大家當然好會關心佢,問佢點解咁有心返嚟教會聽耶穌呢?

個女仔嗰晚,第一次將佢嘅心事袐密講晒出嚟,佢話:「我一直都有隻男鬼跟住我,佢點點點架,我返教會,係想揾你哋睇吓幫唔幫到佢。」我聽完之後,個心離咗一離,跟住我望吓窗門對正我地嘅反影,發現,點解我地當中,有條友仔咁生面口嘅?會唔會我只係俾條女嚇到眼花呢?

其實,如果早知個女仔需要咁特別嘅幫助,就一早叫佢直接搵牧師喇,仲點會叫佢去夏令會咁阻礙佢呢?!

9 則留言:

  1. 有個外國人 (鬼佬)成日跟住佢?? :P

    回覆刪除
  2. 又真係幾奇,唔直接揾高人解決,反而揾人傾心事.

    回覆刪除
  3. DeepC:

    係喎,如果我當時識咁諗,就唔駛驚餐死啦:(

    回覆刪除
  4. hkeric:

    坦白講,其實有野跟嘅人,都未必好想甩咗佢,就好似吸毒咁,明知唔好,但又唔係好捨得從佢得番嚟嘅甜頭。

    回覆刪除
  5. "發現,點解我地當中,有條友仔咁生面口嘅?"

    咁猛?!????!!!!!!!?!

    全部人都睇到?!

    回覆刪除
  6. "..明知唔好,但又唔係好捨得從佢得番嚟嘅甜頭。.." 甜頭!?

    回覆刪除
  7. 梁巔巔:

    當晚大家突然靜晒,然後即刻一個一個返房瞓,冇人問過大家係唔係都睇到嘢喎?!

    回覆刪除
  8. HHH:

    歡迎光臨^^

    聽人講,啲嘢會扮知己朋友呀、指點吓迷津呀咁,用種艇方法務求唔會俾人飛。

    回覆刪除