2010年9月2日

也談菲律賓

今日,Bittermelon在佢篇《菲律賓警察》度,分享咗佢以前去菲律賓公幹時嘅有趣見聞。我見師兄佢寫得咁鬼過癮,一於唔執輸,又學吓人哋講吓以前去菲律賓出差時啲搞笑嘢。

經過先前香港旅行團在菲律賓嘅慘劇,相信大家都會同意,呢個國家所會發生嘅嘢,絕對可以係估佢唔到嘅。

喺好多年前,有次要去菲律賓一間工廠度做審計,當抵步去到廠門口嘅時間,忽然見到佢哋門口嘅大閘度,佈滿晒子彈窿,我未入去都心知不妙。當去到辦公室嘅時間,有關負責人同我哋講,Payroll 暫時唔方便俾我哋睇住,事關個Payroll Manager 同埋 HR Manager,剛剛在幾日前因加薪問題傾唔掂數,雙雙俾人打瓜咗,所以一時間冇人招呼我哋住。

當地啲同事叫我哋入黑後唔好自己去行街,你估佢用啲咩理由勸我哋?治安唔好?唔係!原來,佢話當地好多冤魂,夜晚好易撞嘢,仲話冇幾耐之前,就識人入黑行行吓街,在路口轉角位一轉過彎,咁就俾嘢上咗喇!你話,聽佢咁講,係咪會俾佢吹漲?

菲律賓警察俾我嘅感覺係個樣個個都好友善嘅。聽人講,佢哋友善到只要你喜歡,支警槍都可以賣埋俾你做記念品添!你信唔信?

又講番嗰次出差,因為安排上嘅問題,我係要一個人到機場自己返香港。點知一去到,冇耐就有位中國阿婆,用廣東話同我講嘢,仲叫我幫吓佢拎吓嘢,等佢過關時唔駛咁辛苦喎。我心諗:「我個樣雖然老實,但係我唔係蘿拔!」我問阿婆想我拎嗰箱係乜嚟?阿婆居然話係菲律賓香蕉喎!唉,佢居然呃我拎蕉!我點會咁天真咁傻上佢當呢?!

30 則留言:

  1. 如果好心幫人拎蕉, 閣下隨時會成為另一個區永祥, 今世都好難番來香港.

    回覆刪除
  2. 匿名:

    係呀,現在想番起都抹一把汗!

    回覆刪除
  3. 每次去馬尼拉核數,都是戰戰兢兢的,有次本來 book 好機票聽朝早飛的,剛巧下午個 exit meeting 順利完成,趕到九點多晚機飛返香港。

    平日祇是酒店公司餐廳,包括午晚兩餐,全部都由公司司機,專車接送往返。

    最長個次,逗留咗一個月,要去攞 VISA extension,臨走個晚一直肚疴到天光,好似開花灑咁,最後要趴地,躝入去洗手間。

    出到機場,過移民局時,幾驚會因部門間有矛盾,當我是過期停留,要拘留慢慢審!

    如果唔喺為了搵兩餐,畀我都唔去菲律賓馬尼拉!!!

    完了 請請!

    回覆刪除
  4. 原來大家去過菲律賓做野都留有陰影嘅。

    回覆刪除
  5. wah~ 這些事好比小說內容精彩, 也許更甚.

    不過你們當時的感受一定很不一樣.

    回覆刪除
  6. 菲律賓,印尼,泰國都咁危險,愈窮的地區愈危險,停職警察都有幾枝鎗,仲要係M16機鎗!

    回覆刪除
  7. 係啦, 你好大膽竟然幫人拎野過境, 好在係蕉, 唔係你就大大劑!!!

    貓生都試過出trip去菲律賓, 佢竟然夠膽死去搭普通的士(佢公司已經出warning話只可以搭酒店車), 結果俾個的士司機濫收車資,佢仲唔識死去佢理論, 照個的士標俾錢然後走人, 搭個第二部的士!!! 真係俾佢激死.

    回覆刪除
  8. 哥斯拉:

    所以就話估佢唔到囉!

    回覆刪除
  9. 肥貓:

    我邊有咁大膽幫阿婆拎蕉,咪搞我!仲有,我打死都唔信果箱係香蕉咁簡單!!

    至於貓生搭的士單嘢,我反而覺得危險性不大。仲有,貓生咁醒目,佢邊會有事嘅呢?!^^

    回覆刪除
  10. Ebenezer,

    醒目?! 咁又係, 做得我老公唔得唔醒目, wakakakakak!!!

    唔好亂讚佢, 佢會好"hill"架!!

    回覆刪除
  11. 肥貓:

    大家都係醒字派啦,哈哈!!

    回覆刪除
  12. 賣槍就唔知,導遊帶去HK$30開一槍就試過!

    回覆刪除
  13. Coffee n Tea:

    導遊帶妳去揾菲律賓警察,俾佢HK$30,俾妳開一次警槍?

    回覆刪除
  14. Eben︰

    導遊帶我們去一個唔記得甚麼地方,有個人係度當值,然後果個人帶我哋上到天台,邊個想試開槍就俾約HK$30,就可以開一槍。

    回覆刪除
  15. 講得咁過癮,我就攞過賓佬警察枝 M16 影相,佢又俾我影喎,不過冇收我錢。

    回覆刪除
  16. Coffee n Tea:

    嘩!妳好大膽,流彃打親人點算?

    回覆刪除
  17. laulong:

    原來你地大家同d菲律賓警察咁 friend 嘅!

    回覆刪除
  18. 我梗係無咁大膽啦(主要係無興趣),我係側邊睇架,見啲人係由果個人捉實隻手,向住天,然後佢話「ok」,就手指發射咁咯。

    校長都有影張相吖,我相都冇張:p

    回覆刪除
  19. 相有呀,但依個時勢,係唔應該放出黎嘅!

    回覆刪除
  20. 中學時代去過菲律賓旅遊, 印象好好.

    另類壞印象, 好猛! 尤其是碧瑤.

    回覆刪除
  21. Coffee n Tea & laulong:

    你地參加咩團?點解有同菲律賓警察交通項目嘅?

    回覆刪除
  22. 梁巔巔 :

    有冇在碧瑤見過嘢?

    回覆刪除
  23. 行程沒寫呢樣嘅,個「熱心」導遊硬係平白生出一些項目。

    回覆刪除
  24. 行程都係沒寫呢樣嘅,見到個警察,咪去 friend 吓咯。

    回覆刪除
  25. Coffee n Tea & laulong:

    你地參加康泰?乜得咁多剌激嘢玩嘅,hehe^^

    回覆刪除
  26. 我聽到聲.

    隔嚟個團友成晚畀隻嘢分別用杯水, 用個電視機攪到佢瞓唔到.

    回覆刪除
  27. 梁巔巔:

    嘩!好得人驚!!

    回覆刪除
  28. 講開子彈洞,菲律賓人真係好鍾意用槍來解決問題.我公司在某地和當地人有爭駁,居然被當地人用槍向駛過既公司車開槍. 你話死唔死!

    回覆刪除
  29. Bittermelon:

    嘩!你仲敢唔敢過去做Audit?寫 Report 嘅時間有冇手震?

    回覆刪除