2011年9月8日

輸到反艇

網上圖片
昨天晚上,太太對我說,她的一位同學最近才知道她丈夫原來瞞著了她去炒股,結果,在八月那次跌市中狂蝕了,給輸掉了一層樓,氣得那同學將她的丈夫趕了出街。

在短短的最近一個月內,這已經是我所認識的,第二個真人真事「輸到反艇」的真實故事了。好有可能,在我認識以外,其實已經有千千萬萬人同樣都是輸得要命。例如有一位無名者,就曾在討論區內發出過如下令人聞者傷心的真情剖白:

好對唔住家人,兩天內將十年積蓄輸光,面對唔到自己,家人,想過自殺,但又無決心,但腦海總是浮現昨天斬倉時景象
現在輸清光,只敢同老婆講,其他家人只知道我輸錢,不知道我輸了層樓
我今天請了徦,我無法面對現實,每當在馬路經過時,有一刻念頭想衝出去俾車撞死一了百了
我真不知怎樣活下去
別人常說玩笑上IFC ,我真得想過跳樓,
身邊人無人明白我,只說錢可以再搵
我真不知怎可翻身!
天像是要我死,在昨天低位處決了我!
可能大家會說,真正自殺的人不會上黎講咁多,
我都想可以堅持活下去,我惟一顧慮是太太和父母,唔想他們傷心,我真不知道這些事可和甚麼人傾訴,願大家作為我的聆聽者
謝!

其實,人誰無過?記得索羅斯曾經說過:「承認錯誤是件值得驕傲的事情。我能承認錯誤,也就會原諒別人犯錯。這是我與他人和諧共事的基礎。犯錯誤並沒有什麼好羞恥的,只有知錯不改才是恥辱。」

但願以上的各位朋友可以在錯誤中快快翻身過來。


當年今日:
iPhone4 狂熱

37 則留言:

  1. 朋友:

    唔好覺得對唔住家人, 你都係想家人好才會輸掉畢生積蓄.

    任何投資都有風險, 當風險到來而又躲避不過, 就會輸錢. 輸錢好多時不是你的錯, 而是被大鱷或大股東欺騙了, 例如那個你仆街. 輸光了, 有時未必可以翻身, 十年不能, 廿年亦不能, 下半世也不能, 不過, 總不能死, 死了才真的對不起家人.

    還好, 你仍有個支持你的老婆, 很多輸清光的真的一無所有, 連老婆也走路了.

    輸了一層樓, 今後咪租樓住囉, 翻身無望, 唯有捱埋下半世, 等下世至翻身囉. 我唔係講風涼話, 好多人都係咁, 捱吓捱吓, 咁就過咗一世人喇. 有幾多人可以好似李渣成咁嘆世界呢? 搵埋咁多污糟錢, 正常人都唔會嘆得安樂架.

    講真, 輸光晒, 翻身機會真係微乎其微, 不過, 機會總係有的, 每期俾廿蚊買張電腦六合彩都可以買個希望吖, 我每期都買架, 希望在人間! 共勉之.

    回覆刪除
  2. 匿名:

    對!唔駛死嘅,希望在人間吖嘛:)

    回覆刪除
  3. 都係嗰句, 10蚊最多玩6蚊.

    篤手指, 玩輪, 玩孖展一定唔 Q 制!

    回覆刪除
  4. 梁巔巔:

    對!一定要事先計算好值搏同注碼先好落場。

    回覆刪除
  5. 我反過艇喇,反完仲好,睇透了成敗得失,心情平靜,少咗物質,冇埋抝撬,健康好咗,不知幾舒服!

    我真係要多謝反艇!

    回覆刪除
  6. 反艇宜早, 最好在四十歲之前, 否則好難翻身, 假如到了六十歲才反艇, 真係臨老唔過得世, 好悽慘!

    回覆刪除
  7. 匿名:

    所以,投資時要計算好可接受風險及做好風險管理。

    永遠不要孤注一擲。

    回覆刪除
  8. 唔需要扮智者,我的確係感激後生時第一次玩期指輸到嘔血,自此唔敢再掂孖展類既物體;

    手上銀行股帳面的確有蝕,不過對於預左持有到退休既根本毫無影響,更唔會影響到我日常生活。

    回覆刪除
  9. 若缺齋老人:

    輪之類嘅野係唔公平嘅東西,你唔沾手已經証明係係智者喇。

    回覆刪除
  10. 我好似反左艇好多年都返唔到岸,逐隻等佢到番位就賣,但都仲有幾隻唔聽話囉

    回覆刪除
  11. 我諗你係坐艇啫,未至於反艇:)

    回覆刪除
  12. 人哋反嗰隻艇係航母或核動潛艇, 你如果反嘅只係舢舨, 就唔好拎出嚟比較. 至少輸你三五年人工或者十年八年積蓄, 才可以叫做輸到反艇吧. 你試過未? 87, 97 及 08股災時就好多人都試過反艇嘅滋味.

    回覆刪除
  13. 噢!以便嫂冇介紹果個先知基金經理佢兩公婆識噃!

    有賭未為輸,儲夠彈藥,東山再起,雖然唔賭唔會輸,但肯定唔賭就冇得贏!

    回覆刪除
  14. 從來投資嘅錢「應該」係唔等用嘅錢,輸哂都對生活無問題。

    講到反艇,今年我都輸左幾個月人工。

    回覆刪除
  15. 講真,如果我老公係咁,我諗我會離婚。錢財事小,欺騙事大。點解咁大嘅投機唔先同我講聲?既然當日佢對自己咁有信心,今日佢都應該有足夠嘅自信去處理個結果。

    勇於承認錯誤之餘,敢於承擔結果。

    回覆刪除
  16. 匿名 at 6:58

    反艇又好坐艇又好啦,都係一個痛苦嘅經歷。

    回覆刪除
  17. Space:

    人地老婆都係等衰咗先知道佢老公件事,先知都救唔番啦!

    回覆刪除
  18. Jay:

    So bad, 勾起你d傷心事添,sorry!

    回覆刪除
  19. 卡臣 & hkeric:

    大家互勉:)

    回覆刪除
  20. 匿名 at 10:08

    錢又冇老婆又走佬,對一個男人嚟講係極刑!

    回覆刪除
  21. 哈哈哈哈! 讓我做個事後孔明。
    個位基金經理唔會是最近至幫以便嫂瓜,起碼都有有一個值得以便嫂信任的時間性。若早些介紹朋友兩公婆去買基金,就唔會有今次反艇事件發生嚕!

    回覆刪除
  22. Space 兄:

    以便嫂只係同個基金經理通過一次電話咁大把,見都未見過佢架。

    件事其實係咁嘅,在七月尾我日日嚇佢八月好有可能好大鑊,我仲身體力行清晒倉添。我都唔知以便嫂原來有d私己基金,佢靜靜自己打去問清倉好唔好,點知人地即刻叫佢快d走,咁先逃過一劫咋。

    回覆刪除
  23. 以便,

    "在七月尾我日日嚇佢八月好有可能好大鑊,我仲身體力行清晒倉添。"

    啊! 原來你也是先知!

    回覆刪除
  24. 匿名:

    我唔係先知,只係斷估。

    回覆刪除
  25. 「有斷估, 冇痛苦」, 果然係至理名言.

    回覆刪除
  26. 匿名:

    哈哈!正是,正是!!

    回覆刪除
  27. 錢財身外物,
    輸了也鯊辦法,
    自殺只會生生更多問題,
    又唔係無飯開,
    睇開點,
    玩得就有輸贏,
    做個男人大丈夫嘛。

    那大大聲話人知想死的一定唔會死,
    反而靜靜唔出聲的才有危險。

    回覆刪除
  28. 新鮮人:

    係囉,輸錢事少,輸命事大!

    回覆刪除
  29. RE: 件事其實係咁嘅,在七月尾我日日嚇佢八月好有可能好大鑊,我仲身體力行清晒倉添。

    以便兄勝過周瑜孔明多多矣!

    回覆刪除
  30. Space 兄:

    係事後孔明吖嘛。

    回覆刪除
  31. 兄台不用謙虛,勝過周瑜孔明!

    回覆刪除
  32. Space 兄:

    兄台抬舉,實在不敢當!

    老實講,我不信有人有能力對市場可以預知末來,我也不例外。

    今次的八月跌市,從技術分柝去看,離場訊號算是相當響亮,預早己經有警報的了 所以好多人都同樣收得到,因此不算是甚麼大智慧。

    回覆刪除
  33. 炒股也可以如此累人啊,和賭錢一樣,但生命絕處逢生,跌得越低,可以反彈得越勁。你是否用了新的blogger介面?

    回覆刪除
  34. 五珍 (Jan Ng):

    用了新的介面?係唔係我亂打亂撞搞到個介面有d唔同咗?

    Anyway, 我都諗緊轉吓背景介面:)

    回覆刪除