投資新方向

先幾日，接到位聲線好甜美嘅陌生小姐來電，佢話佢好想見吓我，想約我放咗工之後，出嚟同佢傾吓計食吓飯做吓朋友咁喎。我問佢係乜嘢人？佢答我佢在一間同《信報》有關嘅投資公司度工作，想同我一齊去研究吓買基金嘅心得囉。

我拒絕咗呢位小姐嘅勾搭之後，即刻聯絡《信報》報告呢單料。《信報》大為緊張，冇耐仲出埋以下嘅聲明添：

我睇番《信報》份聲明先知，原來若果應承姐姐仔同佢去街街，仲可以去埋睇煙花匯演浪漫浪漫一番添。唉！我可能真係走咗寶。

近排因為市況不好，原來好多投資公司都各出奇謀，搞埋好多好有創意嘅方法去揾新客。以上睇睇煙花嘅花招可能只係小兒科啫，國內嘅先進同業所搞嘅花款，先至算叫做有睇頭。

就以大名鼎鼎嘅《光大証劵》為例，佢地最近就在國內，搞咗個探討女性內衣及泳裝嘅「品牌服飾高峰論壇」。大家淨係聽個名，都知道好有學術研究價值啦！

圖片來源：新華網

國內另一間証劵大行《中金公司》亦唔執輸，佢地安排成羣美女陪人客遊船河，一齊邊賞月邊飲紅酒邊傾投資添，幾咁有品味呢你話！

「李氏力場」失效了

特別報告：

長久以來廣受大眾所信賴，保護香港免受強烈颱風苦害的「李氏力場」，今日竟然發生故障，未能如預期般服務市民，以致今早出現了八號風波。

今次事件，令到很多分析員對「李氏力場」都大跌眼鏡，並且有機會引發新一輪的信心危機。

網上圖片

閒談用套

我本身其實唔係好鍾意用套嘅，因為唔用嘅感覺會比較 free 啲。但係，為顧及安全性嘅問題，都係事事小心啲好，尤其怕自己一時忘形撞傷咗啲心愛嘅「打令」，到時就一定心痛死。因此，我會做番個負責任嘅人，最終都會笠番個套，特別係有需要在外出應酬公幹、舟車旅遊嘅時候，就更加不可以不帶套喇！

我最鍾意超薄型嘅套，因為我覺得用起嚟又有型、又貼身、又夠順滑。不過，真係好唔容易先俾我買得到啱用架，事關細碼 size 屎嘅就到處都容易揾到，但要去到15.4吋，原來係唔常有貨嘅！

唔想太「型」仔

點解無啦啦將部 iPhone4、iPad 2 同埋 MBP 改晒行 Windows 7 咁低能？

因為唔想.....太「型」仔囉！

我的 iPad 2

當年今日：
我的 iPad

是日秋分

圖示：秋去冬來

今天是秋分，是秋天的開始。過了今天，黑夜就會越來越長，然後寒冬才會越走越近。現在可感受到的少許涼意，可能正正是為未來的冰冷，作點小小的預示。

秋天總常教人有種憂鬱的感覺，是否由於葉飛花謝，枯枝處處的場景，總在這個季節見得特別多？

我愛秋天的肅殺，因為它格外令人感覺瀟灑！

秋分是二十四節氣之一，每年9月23日前後，太陽到達黃經180°時開始.....分就是半，這是秋季九十天的中分點。天文學上規定秋分為北半球秋季的開始，在中國南方地區、台灣和日本亦在習慣上視秋分為秋天的開始。

秋分時，全球晝夜等長。秋分之後，北半球各地晝漸短夜漸長，南半球各地晝漸長夜漸短。
(維基百科)

我以後唔再睇《爽報》

網上圖片

《爽報》出街唔夠幾日，已經到處被人喊打，好些學校明言不准學生閱讀，Facebook 亦已經出現咗譴責群組，似乎呢份鹹濕報紙，都有啲出師不利之勢。

我覺得肥佬黎要搞到行鹹報呢一步棋，好有可能佢已經走投無路諗到冇得好諗，情形就好似香港舊式戲院沒落，間間執笠前都變晒做鹹片戲院咁，希望在滿足鹹濕佬呢個小眾但穩定嘅市場時，盡量爭取呼吸埋最後一啖氣。

但我覺《爽報》前途比起鹹片戲院更加難搞。鹹濕佬好快入咗戲院就唔係咁易俾人認出佢鹹濕嘅本相，但《爽報》喺鹹濕佬番工嘅時間派俾佢，佢唔通在街邊睇？在巴士睇？在港鐵睇？在公司睇？咁即係在女途人、女乘客、女同事面前承認自己嘅鹹濕身份？用份《信報》包住佢留番屋企睇都係辦法，但鹹濕佬屋企實有大把好嘢啦，番到家仲駛睇呢啲小兒科？！

我唔係鹹濕佬，所以我以後都唔會再攞《爽報》嚟睇咁鬼麻煩！

***************

後記：

壹傳媒旗下免費報紙《爽報》充斥色情內容，惹起教育界、社福界及家長團體群表不滿，淫褻物品審裁處更將《爽報》「眼兒媚」專欄的首兩期網上聲音版和第二期的文字版，暫定評級為第二類物品（不雅物品），即不得向十八歲以下人士發布或出售。（25/9/2011東方日報）

當年今日：
中秋速寫

熊市來了

網上圖片

今天收市於 18824.17 點，終於相信，熊市真的來了！

這次態市來得特別奇怪，因它跳過了「牛三」最後升浪而直接降臨。據說，這個怪現像在美國亦曾經出現過，至於在香港這是否首次，則不大清楚。

這樣也好，免去了不必要的幻想與臆測，也可能免去了好多人在「牛三」狂升後暴跌時，死在血泊之中。

秋意日濃，希望還未真正到來的冬天不會太冷吧。





(本文並非任何投資誘勸或建議）

面懵心精

前一排，捉咗個去年在 iPhone 身上搵到唔少嘅朋友上我屋企，隊咗佢兩支紅酒，先套得到佢講出點樣搵到咁多米嘅祕技，雖然現在已經過晒氣喇，但總算佢都當我 friend，肯俾材料我去做事後嘅學術研究。

又先陣子參加咗教會一個喪禮，當時後人代亡者捐獻部份遺產俾教會，大家先知道呢個在生時極之樸素嘅阿伯，原來係一個在十年間，用十萬變出一仟三佰萬嘅投資高手！

話時話，在所認識嘅朋友當中，有啲真係幾叻仔架，我發覺佢地都有一個特點，就係真係醒嗰瓣，往往就係佢最低調嘅地方。



曲 : 馮添枝 / 詞 : 黎彼得

喺香港 　 大千世界  　亂咁恰人正蠢仔
比你威 　 兼聽你吠 　 傻夾戇 　就最襟擠

睇香港 　 人生百態 　 想發通常靠扭計
抵吓諗 　肯0翳夾跪 　唔怕第日無地位

現實社會不可以貌相 　 心地難想像
水 　 不可以量 　自大就聽遭殃

舢舨 　　莫充炮艇 　 叻仔通常冇出聲
起勢充 　盞本老命 　 其實係要面懵心精

爽！

今早，如常地睡眼惺忪，Fing 吓 Fing 吓咁走去自己所住屋邨嘅巴士總站，無可奈何地等排隊迫巴士返工。點知，突然俾個著藍色背心嘅姨姨阻住，夾硬要塞份報紙俾我，我即時心裡暗罵：「過主啦！」不過睇真啲，佢唔係派開《頭條》著紅色背心嗰個，而係一個好熱情，派《爽報》嘅新姨姨。

《爽報》呢個名，一聽就下意識覺得係份唔三唔四嘅報紙啦，點襯得起我咁正經嘅人格呢？誰不知，姨姨話手揸《爽報》，搭巴士就唔洗俾錢！

「慳番十九個半喎，咁爽？！」我即時醒晒，立刻搶咗份！

如果《爽報》日日都請我搭巴士，咁就真係爽喇。





當年今日：
אמונה 信

是日 9.18

圖片來源：洛陽網

今天是 9.18 事變 80 周年的日子，以下一段《中國評論新聞網》於今天發表的文章，頗有意思：

環球時報刊發日本JCC新日本研究所副所長庚欣的評論文章稱，“9.18”對日本來說也是重要的日子。日本在此之前已是西方的鷹犬並且醞釀侵略中國，但“9.18”讓日本走上了一條到今天都沒有真正回頭的“不歸路”：1945年日本投降後，可見的戰爭形態結束了，但日本在心理、認識上都沒有清算。國家怎麼走上新道路？日本國民並沒有答案。可以說，日本再沒有侵略的行動和能力了，但是“9.18”對日本仍是一個永遠的痛，不同於中國的痛。近來，日本遭受了地震的巨大打擊，國內政治局面也有些混亂，總體情況不太好。但新首相野田佳彥上台後，還在探討戰犯、神社等歷史問題，包括有著歷史淵源的領土問題（像釣魚島），也說明日本還未擺脫“不歸路”.....“9.18”之後日本與亞洲全面對抗，侵略戰爭把亞洲搞得“滿城風雨”，卻還只是一個承上啟下的事件。實際上，占領台灣、占領朝鮮半島、日俄戰爭等等，日本在“9.18”之前的各種動作和不義，其傷害一點不亞於“9.18”。


9.18 事件其實對中日兩國的人民都帶來了苦難，但願過這份創痛，最終彼此都可以得到完滿的治癒。

當年今日：
謦欬
新年好