睇科騷

先兩日，lunch time去咗間車仔麵舖食晏，間舖頭仔好鬼死迫人，我好辛苦先搵到張圓枱仔坐低。同一時間，又有一對男女剛剛搵咗同枱嘅位，坐正喺我隔離。

呢對男女，一坐低即刻互咀幾嘢，然後先至點嘢食，跟住又再濕咀；我見到心諗：「嘩！呢兩條友都好餓咁播！」到佢地兩碗麵嚟咗，食嘢嘅時間，兩條友仔就貼到實一實，我忽然發現女方隻手放喺枱底好似抺緊嘢咁，由於俾張枱面遮住，我睇唔清楚佢喺處抺緊啲乜嘢？我轉頭望吓男方個樣，食麵食到好冧咁！我又諗：「駛唔駛咁誇呀，你地完事未呀？」

同一日晚上夜夜哋，我一個人搭巴士返屋企，坐咗喺上層後排少少嘅位，對面前排三坐位咁啱又坐咗一對男女。開車冇耐，女嘅就開始擠迫個男嘅，迫吓迫吓最終迫咗個男瞓晒喺個位度，點知個女仲要成個人責實個男，係咁壓實佢，心口磿心口，面貼面。我同自己講：「唉！眼冤！今日究竟係乜嘢日子？唔通係月圓之夜，天下蒼生都受到影響？」我隨即望吓車外嘅月光，發覺唔係好圓喎！莫非係因為依家環境污染，影響晒啲生態平衡？