封路

剛過去嘅星期日，無無聊聊咁唔知做乜又有巡遊，搞到尖沙咀封晒啲路；咁啱嗰日有人喺文化中心註冊結婚，我要去觀禮。

喺文化中心註冊結婚係一件好快手嘅事，一對男女入房搞十五分鐘就完事，然後俾我地用電話係咁咦影幾張相，拍幾條片用嚟日後放上youtube，三扒兩撥搞多幾嘢就搞掂！

因為好特別嘅原因，離開時我陪一對新人走去搵的士撘。

等咗好耐，條路開始解封，上到的士，司機搭訕：「做完伴郎伴娘呀？乜伴娘都戴咁多金器啊？依家啲金好貴播！」

「唔係做完伴郎伴娘，係剛結完婚！」新郎好冇癮咁答。

「乜結婚唔係坐花車嘅咩？」的士司機仲喺度問。

「架花車放低咗我地去行禮之後就遇正封路，番唔切嚟pick-up我哋，其他衫又喺晒啲車度，搞到換唔到衫，仲要著成咁通街走，搵車搭。」新郎答。

「咁啲老爺奶奶屋企人呢？」司機又問。

「等唔到車，走晒去天星撘巴士！」新郎答。

「我都就嚟七十歲人喇，結婚要搭的士同巴士我都係第一次聽，哈哈！」司機喺度笑。

大家無言。＝＿＿＝！