2011年11月10日

獨居回憶錄 (Part 1)

網上圖片
之前,在一篇拙文中曾略略地提過我從前曾經做過獨居青年。坦白講,未搬出去自己住之前,仲以為一條佬住一定係好自由好過癮啦,點知,原來獨居係會有好多麻煩嘢,同埋仲會好危險嘅添。

當時我班豬仔狗仔朋友,知道我決定搬出嚟住,竟然仲開心過我。曾經有一晚有個衰仔夜媽媽打嚟,話佢同阿媽鬧咗交,決定離家出走,要我收留佢喎。佢精我都唔笨,我梗係第一時間勸佢去修補番同屋企人嘅關係要緊啦,我同佢講,如果佢要上嚟,我會揾佢老母傾計,哈哈,佢真係俾我嚇窒。

又試過另一班PK仔納幾支啤酒上嚟,吹水吹到我成地都係薯片碎花生殼,不過好彩我家徙四壁,冇細妹冇電視冇卡啦OK冇機打冇賭具,麻甩仔之間邊有咁多心事傾吖?所以好快我又可以掃走呢理瘟神。

最離譜係有條友竟然問我咩時間唔喺屋企多,想我借間屋俾佢同同學溫習功課喎。「X^!#&~*?/{$#YZ你估我開豹房咩?」我即刻媽叉到佢九彩!

我當時剛剛信咗耶穌冇耐,點知阿穌哥就即刻打救我,佢令我甩咗班損友之餘,仲俾我識到個靚女,大家做埋好朋友添.....



....待績 (下次先講啲危險嘢)



當年今日:
爆竊

48 則留言:

  1. 我仲以為獨居係好正添,乜原來...

    回覆刪除
  2. 你就好喇,我咁大個人都未獨過,到我可以獨時,就要入老人院咯,又係獨唔到 :(

    回覆刪除
  3. 唔俾啲朋友知其實ok的,一知就煩啦!

    回覆刪除
  4. Bittermelon:

    獨居其實係好麻煩同好危險架,唔好亂試呀!

    回覆刪除
  5. 舞了:

    妳話我以前同巔巔一樣?抑或巔巔同我以前D豬狗朋友一樣?

    回覆刪除
  6. laulong:

    愉你好想做獨居老人咩?

    回覆刪除
  7. Him Cheng:

    歡迎光臨!

    係呀,俾啲朋友知,手尾長架!!

    回覆刪除
  8. 我都試過俾人問借屋,兩個鐘喎~傻架!

    回覆刪除
  9. l.minor:

    你真係有借俾佢? 小心傳染病喎!

    回覆刪除
  10. 你同佢一樣咁小家, 男人老狗, 借間屋出黎俾人方便吓有幾為難喎, 冇d義氣!

    回覆刪除
  11. 舞了:

    吓!乜巔巔都曾經拒絕過妳D要求咩?

    回覆刪除
  12. 哈哈,如果啲friend有個私竇,梗係慳番唔去時鐘酒店啦,呢樣最實際!

    回覆刪除
  13. 以便 你都唔係基督徒 唔好喺度搞衰人哋既形象啦

    基督徒係好顧形象架 你同癲癲物以類聚 你哋都係墮落天使

    回覆刪除
  14. Armadillo:

    乜連你都係咁諗?^^

    回覆刪除
  15. 舞了:

    吓!教人唔借地方俾人做私竇,會搞衰人哋既形象,做唔成基督徒,變埋做墮落天使?咁嚴重?

    回覆刪除
  16. 以便, 你好得閒呀?

    個市真係咁差?

    回覆刪除
  17. 哈哈,十個麻甩佬(或仔)有十一個都係咁諗啦!

    回覆刪除
  18. 舞了:

    係呀,剛剛跌咗1,011點喇。

    回覆刪除
  19. Armadillo:

    哈哈,唔通你又係D豬朋狗友嚟?^^

    回覆刪除
  20. 從來不會說給人家知搬了出來,
    也無人敢問我借屋,
    因為個個知我勁整齊,
    兼有潔癖。

    回覆刪除
  21. 浪子m:

    哈,你果然係過來人,完全明白我嘅感受^^

    回覆刪除
  22. 新鮮人:

    咁...查實你係唔係一個人住緊啫,hehe^^

    回覆刪除
  23. 哈哈,唔好屈我呀,我係第十二個囉!

    回覆刪除
  24. 兄台去中山單身赴任,唔喺獨宿?重要和同事share雙人房架?

    回覆刪除
  25. the inner space:

    出Job獨宿係另一種挑戰。哈!都係一個好好嘅題材喎^^

    回覆刪除
  26. 獨居好呀
    可以周屋條條fing

    回覆刪除
  27. 卡臣:

    But,你唔怕冷到縮吓縮吓咩?!

    回覆刪除
  28. 你哋明顯講緊男人嘢, 呢d內容女人講唔出既.

    回覆刪除
  29. 卡臣:

    係呀,凍冰冰間屋得番自己一個人,時間會覺得特別長架。

    回覆刪除
  30. 舞了:

    我地用番書面語嘅對白係咁嘅:

    我:寒地凍,獨個兒瑟縮於家中一角,怕嗎?

    臣:長夜漫漫,嫌時間過得太慢。

    回覆刪除
  31. 咩你們講獨居講到咁有趣味呀!?

    回覆刪除
  32. i. 大佬, 我唔識佢咖!

    ii. 獨居, 死嘅機會真係大好多!

    星期三晚上大約十時至十一時多,我可能已死去。

    話說這半年來每晚都睡得不好,最近更甚至失眠。那晚我在睏極之下用「咇咇煲」燒白開水,然後便躺在床上。一直以來,不要說是「咇咇煲」,即使是普通的,我也會在水滾時第一時間醒來把火關掉。

    可是,那天晚上我失手了!我睡得如死屍一樣!

    結果,因為個「咇咇煲」狂響,隔邊 B 座的鄰居在又按門鐘又拍門仍沒有回應之下,報了警。

    消防員在破了鐵閘準備破木門之際,哈,我 X!(今次 X 自己!),我忽然醒來!把火關掉然後開門 (為甚麼外面那麼吵?!),一開門,嘩!我 X 乘 ∞!有消防員有龜只差沒有飛虎隊!還記得我一開門,那消防員哥哥正準備破木門之際,剛剛好,一分一秒也沒差,他差點失去重心跌倒。

    今年,2008年,鼠年,本命年,我真係非常非常之黑!

    然,幸而,命不該絕。

    http://victorvictor.blogspot.com/2008/10/blog-post_17.html

    回覆刪除
  33. DeepC:

    下!乜妳睇唔到我地分享緊一個人孤零零住果分衰怨咩?

    回覆刪除
  34. 獨居經你們這伙兒文字上的千錘百鍊後,成為了一種人間天堂,好不好!

    回覆刪除
  35. 巔巔:

    原來你嘅獨居生活係咁多姿多采嘅,失敬!失敬!

    回覆刪除
  36. Coffee:

    獨居生活點會似人間天堂呢?箇中辛酸,真係馨竹難書,我仲有得呻架,請看下回分解:(

    回覆刪除
  37. 開豹房就開豹房啦,不過私家,不外借咋嘛,扮哂野

    回覆刪除
  38. naruto:

    No lar,我玉潔冰清,不會玷污我嘅私房。

    回覆刪除
  39. 喂,大家都離題了,你嗰標題係「獨局」喎!

    回覆刪除
  40. Coffee:

    咦!係喎,寫錯咗添:(

    改番喇,唔該晒^^

    回覆刪除
  41. 我未試過獨居,因為怕麻煩

    回覆刪除
  42. 宅男:

    試下啦,變做獨居宅男,體驗下D滋味都好吖。

    回覆刪除
  43. 獨居有另一種滋味 (尤其是在洗廁所時).

    回覆刪除
  44. 魔術師:

    話時話,我去個一個獨居嘅friend屋企,佢個厠所,充滿咗糞便嘅風味。

    回覆刪除