食好嘢

喺大陸做 Audit，既辛苦又悶，所以一有機會，大家都會好肯去搵啲好嘢食。

記得好久之前，有次喺東莞厚街，同一位同事A君出去食晚飯。點菜嘅時候，我問A君想食乜？

佢話：「是但啦！」

我又轉個方式問佢：「咁你有啲乜嘢唔食呢？」

A君又答：「是但啦！乜都好啦！」

我同A君講：「咁我揸晒主意叫菜囉播？」

A君答：「是但啦！」

我心暗想：「咁多是但吖嗱，今舖一於撚化吓你至得！」於是由我發辦點晒啲菜。

首看嚟咗窩草龜湯，我第一時間夾個龜頭俾A君，「好嚼口呀，哈哈哈！」我好鬼衰咁笑佢。

接住又上碟炒田雞。我一睇，即刻問個服務員：「點解啲田雞仲著住件黃底黑班迷彩衣嘅？」

「呢度鄉下興連皮食架！」服務員答。

「啲田雞似青蛙多啲喎！仲應刻係亞馬遜品種潻播！！」A君寸佢。

結果，我同A君一件田雞都唔敢食。

最後上砵禾蟲蒸蛋，我夾起少少食吓，味道唔錯！A君叫我反轉件蛋嚟睇睇，「嘩！駛唔駛咁多蟲呀？仲手指尾咁大條，條條鬼咁多腳叉晒出嚟！」我越睇越反胃。

個天係有眼嘅，好快我就有報應喇。

冇耐我再到中山做Audit，個Auditee問我想食乜？我話：「是但啦。」結果，班友仔帶我去食川湘菜，樣樣菜都超勁辣，食到我由個口、落到喉嚨、食道、胃、腸、直到屎眼，都有團火！夜晚返到酒店，痾出嚟pat米田共，仲係冒住煙！嗚嗚...